Space-To-Earth : గ్లోబల్ ఎనర్జీ రంగంలోనూ, అంతరిక్ష పరిశోధనల్లోనూ సరికొత్త సంచలనానికి తెరలేవబోతోంది. నింగిలో తిరిగే ఉపగ్రహాలకు, అలాగే భూమిపై ఉన్న వ్యూహాత్మక సైనిక స్థావరాలకు అంతరిక్షం నుంచే నేరుగా వైర్‌లెస్ పద్ధతిలో విద్యుత్‌ను సరఫరా చేసే ‘స్పేస్ పవర్ బీమింగ్’ సాంకేతికతపై అమెరికా రక్షణ శాఖ (పెంటగాన్) ముమ్మర కసరత్తు చేస్తోంది. ఇందుకోసం అమెరికా రక్షణ విభాగానికి చెందిన ‘డిఫెన్స్ ఇన్నోవేషన్ యూనిట్’ (DIU) వాణిజ్య రంగంలోని ప్రైవేట్ స్పేస్‌టెక్ కంపెనీల నుంచి అధికారికంగా ప్రతిపాదనలను ఆహ్వానించింది. సుదీర్ఘ కాలంగా కేవలం సైన్స్ ఫిక్షన్ సినిమాలకే పరిమితమైన ఈ అద్భుత సాంకేతికతను వాస్తవరూపంలోకి తెచ్చేందుకు అడుగులు పడ్డాయి.

ఈ దశాబ్దం ముగిసేనాటికి (2030 నాటికి) ఈ మెగా ప్రాజెక్టును పూర్తిస్థాయిలో సైనిక అవసరాల కోసం వినియోగంలోకి తీసుకురావాలనేది అమెరికా ప్రధాన లక్ష్యం. దశాబ్దాలుగా పరిశోధనల దశలోనే ఉండిపోయిన ఈ వైర్‌లెస్ పవర్ ట్రాన్స్‌మిషన్ టెక్నాలజీ, ప్రస్తుత ప్రైవేట్ స్పేస్ విప్లవం కారణంగా వేగంగా పుంజుకుంది. అయితే ఈ పవర్ ప్లాంట్లను అమెరికా ప్రభుత్వమే సొంతంగా అంతరిక్షంలో నిర్మించి నడుపుతుందా, లేదా ప్రైవేట్ అంతరిక్ష సంస్థల నుంచి ఒక కమర్షియల్ సర్వీస్ లాగా కరెంట్ కొనుగోలు చేస్తుందా అనే అంశంపై పెంటగాన్ ఇంకా తుది నిర్ణయం తీసుకోలేదు.

సాధారణంగా మనం వైర్ల ద్వారా విద్యుత్‌ను సరఫరా చేస్తాం. కానీ ‘స్పేస్ పవర్ బీమింగ్’ విధానంలో విద్యుత్ శక్తిని లేజర్ కిరణాలు లేదా శక్తివంతమైన మైక్రోవేవ్స్ వంటి విద్యుదయస్కాంత కిరణాల (ఎలక్ట్రోమాగ్నెటిక్ రేడియేషన్) రూపంలోకి మారుస్తారు. అంతరిక్షంలో ఉండే సోలార్ ప్యానెల్స్ సేకరించిన సౌరశక్తిని ఈ కిరణాలుగా మార్చి, భూమిపై లేదా అంతరిక్షంలో ఉండే నిర్దేశిత రిసీవర్ (Rectenna) వైపు గురిపెట్టి ‘బీమ్’ చేస్తారు. ఆ రిసీవర్ ఈ కిరణాలను గ్రహించి మళ్లీ సాధారణ విద్యుత్‌గా మార్చి గ్రిడ్‌కు సరఫరా చేస్తుంది.

Also Read : పరాయి బంధం మోజులో ఘోరం: భర్తను ‘పాము’తో కరిపించి చంపిన భార్య

ఈ సాంకేతికత అందుబాటులోకి వస్తే అంతరిక్షంలో ఉండే ఉపగ్రహాల (Satellites) పనితీరు పూర్తిగా మారిపోతుంది. ప్రస్తుతం శాటిలైట్లు తమ స్వంత సోలార్ ప్యానెళ్లు, భారీ బ్యాటరీలపైనే పూర్తిగా ఆధారపడాల్సి వస్తోంది. బ్యాటరీలు పాడైపోతే ఉపగ్రహాల జీవితకాలం ముగిసిపోతుంది. కానీ పవర్ బీమింగ్ ద్వారా నిరంతరం విద్యుత్ అందుతుండటం వల్ల, శాటిలైట్లు ఎక్కువ కాలం పనిచేయడమే కాకుండా.. భారీ విద్యుత్ అవసరమయ్యే అత్యాధునిక నిఘా పరికరాలను, సెన్సార్లను సులువుగా మోసుకెళ్లగలుగుతాయి.

సైనిక పరంగా ఈ సాంకేతికత అత్యంత వ్యూహాత్మకమైనదిగా పరిగణించబడుతోంది. విద్యుత్ గ్రిడ్ల మౌలిక వసతులు లేని కొండ ప్రాంతాలు, ఎడారులు లేదా శత్రు దుర్భేద్యమైన మారుమూల యుద్ధ క్షేత్రాలలో ఉండే సైనిక విభాగాలకు అంతరిక్షం నుంచే నేరుగా కరెంట్ అందించవచ్చు. ఇంధన రవాణా చేయడం కష్టతరమైన ప్రాంతాల్లో ఉండే సైనిక వాహనాలకు, నిరంతరం నిఘా పెట్టే డ్రోన్లు వంటి స్వయంప్రతిపత్తి కలిగిన రక్షణ వ్యవస్థలకు ఇంధన కొరత లేకుండా నిరంతరాయంగా పవర్ సప్లై చేయడానికి ఇది ఒక అస్త్రంలా పనిచేస్తుంది.

ఈ ప్రాజెక్టును అమెరికా రక్షణ శాఖ మొత్తం నాలుగు కీలక విభాగాలుగా విభజించింది. మొదటి రెండు దశల్లో అంతరిక్షం నుంచి మరో అంతరిక్ష నౌకకు (Space-to-Space), అలాగే అంతరిక్షం నుంచి భూమిపై ఉన్న రిసీవర్లకు (Space-to-Earth) విద్యుత్‌ను విజయవంతంగా బదిలీ చేయడంపై దృష్టి పెట్టారు. ఇక మిగిలిన రెండు దశలు.. ఆ అంతరిక్ష విద్యుత్ శక్తిని స్వీకరించే రిసీవర్ల సామర్థ్యాన్ని పెంచడం, యుద్ధ క్షేత్రాల్లో సులభంగా తరలించడానికి వీలుగా వాటి బరువును, పరిమాణాన్ని తగ్గించడం వంటి వాణిజ్యపరమైన అంశాలకు సంబంధించినవి.

ఈ ప్రాజెక్టు కింద ఎంపికయ్యే స్పేస్‌టెక్ కంపెనీలకు పెంటగాన్ కఠినమైన గడువులను విధించింది. ఒప్పందం కుదిరిన మొదటి 12 నెలల్లోగా కంపెనీలు తమ ల్యాబొరేటరీలోనే ఈ పవర్ బీమింగ్ నమూనా పనితీరును నిరూపించాల్సి ఉంటుంది. అక్కడ ల్యాబ్ టెస్ట్ విజయవంతమైతే, తదుపరి 24 నెలల్లోగా (అంటే ఒప్పందం జరిగిన మూడేళ్లలోపు) అంతరిక్షంలోనే నేరుగా దీని ప్రోటోటైప్‌ను ప్రయోగాత్మకంగా పరీక్షించడానికి ప్రభుత్వం అన్ని ఏర్పాట్లు చేస్తుంది. 2030 ఆర్థిక సంవత్సరం నాటికల్లా దీన్ని రక్షణ రంగంలో భాగం చేయాలనేది పక్కా ప్లాన్.

ఈ ప్రతిష్టాత్మక ప్రయోగం కోసం అమెరికా స్వదేశీ కంపెనీలతో పాటు అర్హత గల అంతర్జాతీయ అంతరిక్ష పరిశోధనా సంస్థలు కూడా దరఖాస్తు చేసుకోవచ్చని అధికారులు స్పష్టం చేశారు. ప్రస్తుతం ప్రైవేట్ స్టార్టప్ కంపెనీలు, వెంచర్ క్యాపిటలిస్టులు కూడా ఈ వైర్‌లెస్ పవర్ టెక్నాలజీపై భారీగా పెట్టుబడులు పెడుతుండటంతో, గతంలో కంటే ఇప్పుడు సమర్థవంతమైన సాంకేతికత తక్కువ సమయంలోనే అందుబాటులోకి వస్తుందని రక్షణ నిపుణులు అంచనా వేస్తున్నారు. నింగి నుంచి నేరుగా కరెంట్ పంపే ఈ ప్రయోగం గనుక సక్సెస్ అయితే, కేవలం రక్షణ రంగంలోనే కాకుండా భవిష్యత్తులో భూమిపై బొగ్గు, ఇంధన కొరతను తీర్చి, కాలుష్య రహిత నిరంతర హరిత ఇంధనాన్ని అందించడంలో ఇది ఒక పెను మార్పుకు నాంది కానుంది.

Also Read : బద్రీనాథ్ విరాళాల కుంభకోణం: మాజీ అధికారి అరెస్ట్!