Mudragada Padmanabham : ఆంధ్రప్రదేశ్ రాజకీయాల్లో సుదీర్ఘ ప్రస్థానం కలిగిన సీనియర్ నాయకుడు, కాపు ఉద్యమ సారథి, మాజీ మంత్రి ముద్రగడ పద్మనాభం (ముద్రగడ పద్మనాభ రెడ్డి) కన్నుమూశారు. గత కొంతకాలంగా శ్వాసకోశ,కిడ్నీ సంబంధిత తీవ్ర అనారోగ్య సమస్యలతో బాధపడుతున్న ఆయన, హైదరాబాద్లోని ప్రైవేట్ ఆస్పత్రిలో చికిత్స పొందుతూ మంగళవారం (జూలై 14, 2026) సాయంత్రం 6 గంటలకు తుదిశ్వాస విడిచారు. గత నెల 16న ఆస్పత్రిలో చేరిన ఆయనకు వైద్యులు చికిత్స అందించినప్పటికీ, ఇవాళ సాయంత్రం పరిస్థితి విషమించడంతో 73 ఏళ్ల వయస్సులో ప్రాణాలు కోల్పోయారు. ఆయన మృతి పట్ల వైఎస్సార్ సీపీ నాయకులతో పాటు పలువురు రాజకీయ ప్రముఖులు తీవ్ర దిగ్భ్రాంతి, సంతాపం వ్యక్తం చేస్తున్నారు.
ముద్రగడ ప్రస్థానం & రాజకీయ జీవితం
1953 జనవరి 22న ఉమ్మడి తూర్పుగోదావరి జిల్లా కిర్లంపూడిలోని ఒక రాజకీయ నేపథ్యం ఉన్న కుటుంబంలో ముద్రగడ జన్మించారు. ఆయన తండ్రి వీర రాఘవరావు గతంలో స్వతంత్ర ఎమ్మెల్యేగా పనిచేశారు. తండ్రి మరణానంతరం 1977లో ప్రత్యక్ష రాజకీయాల్లోకి వచ్చిన ముద్రగడ, 1978లో జనతా పార్టీ తరఫున ప్రత్తిపాడు నియోజకవర్గం నుండి తొలిసారి ఎమ్మెల్యేగా విజయం సాధించారు. 1982లో తెలుగుదేశం పార్టీ (TDP)లో చేరిన ఆయన 1983, 1985, 1989 ఎన్నికల్లో వరుసగా ఎమ్మెల్యేగా గెలుపొందారు. ఎన్టీఆర్ క్యాబినెట్లో మంత్రిగా కీలక బాధ్యతలు నిర్వర్తించిన ఆయన, ఆ తర్వాతి కాలంలో పదవితో పాటు తెదేపాకు రాజీనామా చేసి ప్రజారక్షణ సమితి, తెలుగునాడు పార్టీలను స్థాపించారు. తన సుదీర్ఘ ప్రస్థానంలో తెదేపా, కాంగ్రెస్, బీజేపీలలో క్రియాశీలకంగా పనిచేసిన ఆయన, 1999లో కాకినాడ నియోజకవర్గం నుండి లోక్సభ సభ్యుడిగా (MP) కూడా ఎన్నికయ్యారు. మొత్తం మీద తన జీవితకాలంలో 4 సార్లు ఎమ్మెల్యేగా, రెండు సార్లు మంత్రిగా, ఒకసారి ఎంపీగా సేవలందించారు.
కాపు రిజర్వేషన్ల ఉద్యమం & సవాల్
కాపు సామాజిక వర్గాన్ని వెనుకబడిన తరగతుల (BC) జాబితాలో చేర్చాలనే డిమాండ్తో ముద్రగడ చేసిన పోరాటాలు రాష్ట్ర చరిత్రలో నిలిచిపోయాయి. ముఖ్యంగా 2016లో తునిలో నిర్వహించిన “కాపు ఐక్య గర్జన” సభ, ఆ తర్వాత కిర్లంపూడిలోని తన నివాసంలో ఆయన చేపట్టిన ఆమరణ నిరాహార దీక్ష ఆంధ్రప్రదేశ్ రాజకీయాలను కుదిపేసాయి. ఒక వర్గం హక్కుల కోసం రాజీలేని పోరాటం చేసిన నేతగా ఆయనకు ప్రత్యేక గుర్తింపు లభించింది. 2014 తర్వాత కొంతకాలం తటస్థంగా ఉన్న ఆయన, 2024 మార్చి 16న వైఎస్సార్ కాంగ్రెస్ పార్టీ (YSRCP) లో చేరారు. 2024 సార్వత్రిక ఎన్నికల సమయంలో పిఠాపురం నియోజకవర్గంలో పవన్ కళ్యాణ్ను ఓడించకపోతే తన పేరు మార్చుకుంటానని సవాల్ చేసిన ఆయన, ఎన్నికల ఫలితాల అనంతరం తన మాట ప్రకారం అధికారికంగా తన పేరును “ముద్రగడ పద్మనాభ రెడ్డి”గా మార్చుకుని వార్తల్లో నిలిచారు.
