Indian Navy : కోయంబత్తూరులో ఓ నేవీ ఉద్యోగిని పోలీసులు అరెస్ట్‌ చేశారు. పాకిస్థాన్‌కు చెందిన ఓ మహిళతో సోషల్‌ మీడియాలో పరిచయం ఏర్పడిన తర్వాత.. ఆమె మాటలు నమ్మి నేవీకి సంబంధించిన కొన్ని ముఖ్యమైన వివరాలను ఆమెకు పంపినట్లు పోలీసులు అనుమానిస్తున్నారు. ఈ కేసులో 31 ఏళ్ల ప్రదీప్‌ ముఖర్జీని అదుపులోకి తీసుకున్నారు. ప్రదీప్‌ ముఖర్జీ భారత నేవీలో పనిచేస్తున్నాడు. అతడికి తూర్పు నేవీ కమాండ్‌లోని వైజాగ్ బేస్‌తో సంబంధం ఉన్నట్లు సమాచారం. ప్రస్తుతం కోయంబత్తూరులోని ఐఎన్‌ఎస్‌ అగ్రణిలో మేనేజ్‌మెంట్‌ డెవలప్‌మెంట్‌ కోర్సు చేస్తున్న సమయంలో అతడిని అరెస్ట్‌ చేశారు.
పోలీసుల వివరాల ప్రకారం.. సోషల్‌ మీడియాలో పాకిస్థాన్‌కు చెందిన ఓ మహిళ ప్రదీప్‌కు పరిచయమైంది. కొంతకాలం ఆమెతో మాట్లాడిన తర్వాత ఆమెను నమ్మినట్లు తెలుస్తోంది. ఈ పరిచయాన్ని ఉపయోగించుకున్న మహిళ.. నేవీకి సంబంధించిన సమాచారం అడిగినట్లు పోలీసులు అనుమానిస్తున్నారు. దీంతో ప్రదీప్‌ విశాఖపట్నంలోని నేవీ బేస్‌కు సంబంధించిన కొన్ని వివరాలను ఆమెకు పంపినట్లు ఆరోపణలు వచ్చాయి. నేవీకి చెందిన ముఖ్యమైన ఆస్తులు, నౌకల కదలికలు, బేస్‌లో జరిగే కొన్ని కార్యకలాపాలకు సంబంధించిన వివరాలు కూడా పంపాడా అనే కోణంలో పోలీసులు విచారణ చేస్తున్నారు.
ప్రదీప్‌ సోషల్‌ మీడియా కార్యకలాపాలపై ఆంధ్రప్రదేశ్‌ పోలీసులు నిఘా పెట్టారు. ఈ క్రమంలో పాకిస్థాన్‌కు చెందిన వ్యక్తితో అతడికి సంబంధాలు ఉన్నట్లు గుర్తించినట్లు సమాచారం. ఆ తర్వాత అతడిని కోయంబత్తూరులో అదుపులోకి తీసుకున్నారు. ప్రదీప్‌ 2014లో నేవీలో చేరినట్లు తెలుస్తోంది. అతడు పశ్చిమ బెంగాల్‌కు చెందినవాడు. ప్రస్తుతం అతడిని ప్రశ్నిస్తూ.. ఎలాంటి సమాచారం పంపాడు? ఎవరికి పంపాడు? ఇంకా ఎవరెవరితో మాట్లాడాడు? అనే విషయాలను పోలీసులు తెలుసుకునే ప్రయత్నం చేస్తున్నారు.
ఇలాంటి ఘటన గతంలోనూ జరిగింది. మార్చిలో లాన్స్‌ నాయక్‌ ఆదర్శ్‌ కుమార్‌ అలియాస్‌ లక్కీని కేరళలోని కొచ్చిలో పోలీసులు అరెస్ట్‌ చేశారు. పాకిస్థాన్‌కు చెందిన ఐఎస్‌ఐతో సంబంధాలు ఉన్నాయనే ఆరోపణలు అతడిపై వచ్చాయి. ఆదర్శ్‌ కూడా నేవీకి సంబంధించిన కొన్ని ఫొటోలు, ముఖ్యమైన వివరాలను పాకిస్థాన్‌కు పంపినట్లు పోలీసులు ఆరోపించారు. ఇందుకు డబ్బులు తీసుకున్నట్లు కూడా కేసు నమోదైంది. ఇప్పుడు ప్రదీప్‌ కేసులోనూ ఇదే తరహాలో సోషల్‌ మీడియా ద్వారా పరిచయం పెంచుకుని సమాచారం తీసుకున్నారా అనే కోణంలో విచారణ జరుగుతోంది. అయితే ఈ ఆరోపణలు నిజమా? ఇంకా ఎలాంటి సమాచారం బయటకు వెళ్లింది? అనే విషయాలు పోలీసుల దర్యాప్తు పూర్తయ్యాకే స్పష్టమవుతాయి.
