Assam : అస్సాంలో దారుణ ఘటన వెలుగులోకి వచ్చింది. హైలాకాండి జిల్లాలో 15 ఏళ్ల మైనర్ బాలికపై అఘాయిత్యానికి పాల్పడి అత్యంత క్రూరంగా హత్య చేసిన ఘటన స్థానికంగా తీవ్ర భయాందోళనలను రేకెత్తించింది. కుటుంబ సభ్యులు బంధువుల ఇంటికి విందుకు వెళ్లిన సమయంలో ఈ రాక్షస క్రీడ చోటుచేసుకుంది. మృతురాలి ముఖాన్ని గుర్తుపట్టలేని విధంగా ఛిద్రం చేసి, అత్యంత కిరాతకంగా ప్రవర్తించిన తీరు అందరినీ తీవ్ర దిగ్భ్రాంతికి గురిచేసింది.
Also Read : ప్రియుడి మోజులో.. 6 నెలల కొడుకుని చంపిన కసాయి తల్లి
పోలీసులు తెలిపిన వివరాల ప్రకారం.. కట్లిచెరా పోలీస్ స్టేషన్ పరిధిలోని అలోయిచోరా ప్రాంతంలో శనివారం రాత్రి 11 గంటల సమయంలో ఈ ఘోరం జరిగింది. బాలిక తన కుటుంబ సభ్యులతో కలిసి సమీపంలోని బంధువుల ఇంటికి విందుకు వెళ్లినప్పటికీ, అక్కడ ఒక కజిన్తో జరిగిన చిన్న గొడవ కారణంగా ఆమె ఒంటరిగా ఇంటికి తిరిగి వచ్చేసింది. ఆ తర్వాత రాత్రి కుటుంబ సభ్యులు ఇంటికి తిరిగి వచ్చి చూసేసరికి, ఆ బాలిక రక్తపు మడుగులో విగతజీవిగా పడి ఉంది. ఆమె తల, ముఖాన్ని తీవ్రంగా కొట్టి నుజ్జునుజ్జు చేయడంతో పాటు, శరీరంపై దారుణమైన గాయాలతో ఆమెను గుర్తుపట్టలేని స్థితిలో వదిలివెళ్లారు.
ఈ దారుణ ఘటనపై కుటుంబ సభ్యులు తీవ్ర ఆవేదన వ్యక్తం చేస్తూ, హత్యకు ముందు బాలికపై లైంగిక దాడి జరిగిందని ఆరోపించారు. ఈ అమానుష ఘటనపై ఆగ్రహం వ్యక్తం చేసిన స్థానికులు, నిందితులను వెంటనే అరెస్టు చేసి కఠినంగా శిక్షించాలని డిమాండ్ చేస్తూ నేషనల్ హైవే 6పై బైఠాయించి రాస్తారోకో నిర్వహించారు.
ఈ ఘటనపై కేసు నమోదు చేసుకున్న పోలీసులు దర్యాప్తును వేగవంతం చేశారు. ఈ కేసులో ఇప్పటివరకు ఐదుగురిని అదుపులోకి తీసుకుని విచారిస్తున్నట్లు సీనియర్ సూపరింటెండెంట్ ఆఫ్ పోలీస్ అమితాబ్ సిన్హా తెలిపారు. కుటుంబ సభ్యులు లైంగిక దాడి జరిగినట్లు ఆరోపిస్తున్నప్పటికీ, మెడికల్ పోస్టుమార్టం రిపోర్ట్ వస్తేనే ఆ విషయాలు పూర్తిగా స్పష్టమవుతాయని ఆయన స్పష్టం చేశారు. పోలీసులు అన్ని కోణాల్లోనూ దర్యాప్తును తీవ్రతరం చేశారు.
Also Read : మాజీ ఎమ్మెల్యే రేగా కాంతారావుపై లైంగిక వేధింపుల కేసు.. ట్విస్ట్ ఏంటంటే?
