Mystery murder :ఆంధ్రప్రదేశ్-తమిళనాడు సరిహద్దులోని ప్రముఖ పుణ్యక్షేత్రమైన మల్లప్ప కొండ మంగళవారం నాడు జరిగిన ఒక దారుణ హత్యతో ఒక్కసారిగా ఉలిక్కిపడింది. అమావాస్య కావడంతో భక్తుల రద్దీతో కోలాహలంగా ఉన్న పవిత్ర క్షేత్రంలో, తమిళనాడు రాష్ట్రం కృష్ణగిరి జిల్లా సూలగిరికి చెందిన రమేష్ అనే యువకుడు దారుణంగా హత్యకు గురయ్యాడు. శ్రీ మల్లేశ్వరస్వామి దర్శనానికి భార్య, చిన్నారి కుమారుడితో కలిసి వచ్చిన రమేష్.. తిరుగు ప్రయాణంలో శవమై తేలడం ఇరు రాష్ట్రాల సరిహద్దు ప్రాంతాల్లో తీవ్ర సంచలనం సృష్టించింది.
పోలీసులు వెల్లడించిన వివరాల ప్రకారం.. రమేష్ రెండేళ్ల క్రితం ఆంధ్రప్రదేశ్లోని శాంతిపురం మండలం బోయినపల్లికి చెందిన యువతిని ప్రేమ వివాహం చేసుకున్నాడు. ఈ దంపతులు మంగళవారం తమ ద్విచక్ర వాహనంపై మల్లప్ప కొండకు చేరుకుని స్వామివారిని దర్శించుకున్నారు. అయితే, కొండపై నుంచి కిందకు దిగుతున్న క్రమంలో మూడవ మలుపు (హెయిర్పిన్ బెండ్) వద్ద గుర్తుతెలియని కొందరు దుండగులు వారిని అడ్డుకున్నారు. నిందితులు రమేష్పై ఒక్కసారిగా దాడి చేసి తీవ్రంగా కొట్టడంతో, అతను రక్తపు మడుగులో అక్కడికక్కడే ప్రాణాలు కోల్పోయాడు.
ఈ కేసులో అత్యంత మిస్టరీగా, ఆందోళనకరంగా మారిన అంశం ఏమిటంటే.. హత్య జరిగిన వెంటనే రమేష్ భార్య, ఆమె చిన్నారి కుమారుడు ఘటనా స్థలం నుండి అదృశ్యం కావడం. ప్రాథమిక దర్యాప్తులో మృతుడి భార్య మరో ఇద్దరు గుర్తుతెలియని యువకులతో కలిసి బైక్పై అక్కడి నుండి వెళ్లిపోయినట్లు పోలీసులు గుర్తించారు. అయితే ఆ యువకులు అమెను బలవంతంగా అపహరించి తీసుకెళ్లారా? లేక ఆమె స్వచ్ఛందంగానే ఆ నిందితులతో కలిసి వెళ్ళిపోయిందా? అనే ప్రశ్నలు ఇప్పుడు పోలీసులను వేధిస్తున్నాయి.
ఈ క్రమంలోనే ఈ దారుణ హత్య వెనుక వివాహేతర సంబంధం (అక్రమ సంబంధం) కోణం బలంగా ఉన్నట్లు పోలీసులు గట్టిగా అనుమానిస్తున్నారు. భర్తను హతమార్చడానికి భార్యే ప్రియుడితో కలిసి స్కెచ్ వేసిందా? అనే అనుమానాలు వ్యక్తమవుతున్నాయి. భార్య , ఆమె వెంట వెళ్లిన ఆ ఇద్దరు యువకుల ఆచూకీ లభిస్తే తప్ప, ఈ హత్య వెనుక ఉన్న అసలు కుట్ర ఏమిటి? పక్కా ప్లాన్ ప్రకారమే రమేష్ను కొండపైకి రప్పించి చంపేశారా? అనే విషయాలపై స్పష్టత వచ్చే అవకాశం లేదు.
ప్రస్తుతం ఈ మిస్టరీ కేసును ఛేదించేందుకు కుప్పం పోలీసులు రంగంలోకి దిగారు. ఘటనా స్థలంలో క్లూస్ టీమ్ ద్వారా సాక్ష్యాధారాలు సేకరించిన పోలీసులు.. కొండ పరిసర ప్రాంతాల్లోని సీసీటీవీ (CCTV) కెమెరాల ఫుటేజీలను క్షుణ్ణంగా పరిశీలిస్తున్నారు. అలాగే రమేష్, అతని భార్యకు చెందిన సెల్ఫోన్ కాల్ డేటా (CDR)ను విశ్లేషిస్తూ, గత కొన్ని రోజులుగా వారు ఎవరెవరితో సంప్రదింపులు జరిపారనే సాంకేతిక ఆధారాలను సేకరిస్తున్నారు.
ఆంధ్రప్రదేశ్ – తమిళనాడు సరిహద్దు ప్రాంతం కావడంతో నిందితులు పొరుగు రాష్ట్రంలోకి పారిపోయే అవకాశం ఉందని భావించిన పోలీసులు.. ఇరు రాష్ట్రాల సరిహద్దుల్లో ప్రత్యేక నిఘా ఏర్పాటు చేశారు. నిందితులను పట్టుకునేందుకు, అదృశ్యమైన తల్లి, బిడ్డల ఆచూకీ కనుగొనేందుకు కుప్పం పోలీసులు ప్రత్యేక బృందాలను రంగంలోకి దించారు. భక్తుల సమక్షంలోనే కొండపై జరిగిన ఈ ఘోర హత్యతో భయాందోళనకు గురైన స్థానికులు, నిందితులను త్వరగా పట్టుకోవాలని కోరుతున్నారు.
