Canada : అమెరికా, కెనడా మధ్య ట్రేడ్ వార్ మరింత ముదురుతోంది. అమెరికా వస్తువులపై కెనడా భారీ టారిఫ్లు విధించింది. 600కు పైగా అమెరికా ఉత్పత్తులపై 15 శాతం నుంచి 50 శాతం వరకు పన్నులు విధిస్తూ కెనడా తీసుకున్న నిర్ణయం అమల్లోకి వచ్చింది. కెనడా విధించిన ఈ కొత్త టారిఫ్లు దాదాపు 28 బిలియన్ అమెరికన్ డాలర్ల విలువైన అమెరికా దిగుమతులపై ప్రభావం చూపనున్నాయి. అర్ధరాత్రి నుంచి ఈ పన్నులు అమల్లోకి వచ్చినట్లు కెనడా ప్రభుత్వం తెలిపింది.
ఈ టారిఫ్ల పరిధిలో స్టీల్, అల్యూమినియం వంటి పారిశ్రామిక వస్తువులతో పాటు టాయిలెట్ పేపర్ వంటి రోజువారీ అవసరాల వస్తువులు కూడా ఉన్నాయి. అలాగే నాణేలు వేసి ఆడే ఆర్కేడ్ గేమ్ మెషీన్ల వంటి ప్రత్యేక ఉత్పత్తులపై కూడా టారిఫ్లు విధించారు.
Also Read : సైనిక ట్రక్కులపై హూతీల దాడులు.. ప్రతీకారం తీర్చుకుంటామన్న సౌదీ
కెనడా నిర్ణయానికి అమెరికా అధ్యక్షుడు డొనాల్డ్ ట్రంప్ కూడా కౌంటర్ ఇచ్చారు. కెనడా నుంచి వచ్చే ఉత్పత్తులను అమెరికా ప్రభుత్వం కొనుగోలు చేయకుండా ఫెడరల్ ఏజెన్సీలను ఆదేశించారు. అమెరికా కంపెనీలు, రైతులకు కెనడా మార్కెట్లో సమాన అవకాశాలు కల్పించే వరకు ఈ నిర్ణయం కొనసాగుతుందని ట్రంప్ స్పష్టం చేశారు. కెనడా ఉత్పత్తులను అమెరికా ప్రభుత్వ కొనుగోలు జాబితా నుంచి తొలగించే ప్రక్రియను వెంటనే ప్రారంభించాలని సంబంధిత ప్రభుత్వ సంస్థలను ఆదేశించారు.
కెనడా తమ చిన్న వ్యాపారాలకు సరైన అవకాశాలు ఇవ్వడం లేదని ట్రంప్ ఆరోపించారు. కెనడాలోని కేంద్ర, రాష్ట్ర ప్రభుత్వాలు అమెరికా చిన్న కంపెనీలు ప్రభుత్వ సంస్థలకు వస్తువులు, సేవలు అమ్మకుండా అడ్డుకుంటున్నాయని అన్నారు. అదే సమయంలో కెనడా కంపెనీలకు మాత్రం అమెరికా ప్రభుత్వ కాంట్రాక్టుల్లో సులభంగా అవకాశాలు లభిస్తున్నాయని ట్రంప్ విమర్శించారు. ఇలా ఇరు దేశాలు ఒకదానిపై మరొకటి టారిఫ్లు, ఆంక్షలు విధించడంతో అమెరికా-కెనడా మధ్య వాణిజ్య వివాదం మరింత ముదిరింది.
Also Read : ఇరాన్పై గెలిస్తే పెట్రోల్ ధరలు భారీగా తగ్గుతాయ్: ట్రంప్ సంచలన ప్రకటన!
