Zimbabwe : భారత క్రికెట్ దిగ్గజం సచిన్ టెండూల్కర్ పేరిట ఉన్న ప్రపంచ రికార్డును జింబాబ్వే మాజీ కెప్టెన్ బ్రెండన్ టేలర్ బద్దలు కొట్టాడు. పురుషుల వన్డే క్రికెట్‌లో అత్యంత సుదీర్ఘ కెరీర్ కొనసాగించిన ఆటగాడిగా టేలర్ కొత్త రికార్డు సృష్టించాడు. 40 ఏళ్ల టేలర్ హరారే స్పోర్ట్స్ క్లబ్‌లో ఆస్ట్రేలియాతో జరిగిన తొలి వన్డేలో బరిలోకి దిగాడు. దీంతో అతడి వన్డే కెరీర్ 22 ఏళ్ల 148 రోజులకు చేరుకుంది. సచిన్ టెండూల్కర్ కెరీర్ కంటే ఇది 57 రోజులు ఎక్కువ. టేలర్‌కు ఇది 208వ వన్డే. 2004 ఏప్రిల్ 20న ఇదే మైదానంలో శ్రీలంకతో జరిగిన మ్యాచ్ ద్వారా అతడు అంతర్జాతీయ వన్డేల్లో అరంగేట్రం చేశాడు. అప్పటి నుంచి జింబాబ్వే క్రికెట్‌లో టేలర్ కీలక ఆటగాడిగా ఎదిగాడు. ఆ దేశం తరఫున అత్యుత్తమ, నమ్మకమైన క్రికెటర్లలో ఒకడిగా గుర్తింపు పొందాడు.
2000వ దశకంలోనే టేలర్ తన ప్రతిభను నిరూపించుకున్నాడు. వికెట్ కీపర్, బ్యాటర్‌గా జింబాబ్వే జట్టులో ప్రత్యేక స్థానం సంపాదించాడు. అన్ని ఫార్మాట్లలోనూ జట్టుకు కీలకమైన ఆటగాడిగా మారాడు. ఇప్పటివరకు 207 వన్డేల్లో టేలర్ 6,704కు పైగా పరుగులు చేశాడు. ఇందులో 11 సెంచరీలు ఉన్నాయి. టెస్టు క్రికెట్‌లోనూ అతడి రికార్డు ఆకట్టుకునేలా ఉంది. 37 టెస్టు మ్యాచ్‌ల్లో 2,420 పరుగులు సాధించాడు. సచిన్ టెండూల్కర్‌తో పోలిస్తే బ్రెండన్ టేలర్ కెరీర్ ఎక్కువ కాలం కొనసాగడానికి ప్రధాన కారణం జింబాబ్వే క్రికెట్ పరిస్థితులే. ప్రపంచ క్రికెట్‌లో జింబాబ్వేకు పరిమిత అవకాశాలు లభించడంతో టేలర్ ఏడాదికి తక్కువ వన్డే మ్యాచ్‌లు ఆడేవాడు.
భారత దిగ్గజం సచిన్ తన కెరీర్‌లో సగటున ఏడాదికి 21 వన్డేలు ఆడగా.. టేలర్ ఏడాదికి పది వన్డేలు కూడా ఆడలేదు. టేలర్ చివరిసారిగా 2025 ఆగస్టులో హరారేలో శ్రీలంకతో వన్డే మ్యాచ్ ఆడాడు. అంటే ఆ మ్యాచ్ జరిగి ఏడాదికి పైగా అయింది. గాయాల కారణంగా వచ్చిన విరామాలను మినహాయిస్తే.. సచిన్‌కు ఇలాంటి సుదీర్ఘ విరామాలు పెద్దగా ఎదురుకాలేదు. టేలర్ అరుదైన రికార్డు సాధించిన మ్యాచ్‌లో ఆస్ట్రేలియా టాస్ గెలిచి ముందుగా బ్యాటింగ్ ఎంచుకుంది. ఈ మ్యాచ్‌లో బ్రెండన్ టేలర్ జింబాబ్వే తరఫున మిడిల్ ఆర్డర్‌లో బ్యాటింగ్ చేయనున్నాడు. తన అనుభవంతో జట్టు విజయావకాశాలను పెంచాలని అతడు భావిస్తున్నాడు.
