Kommidi Narasimha Reddy : యాదాద్రి భువనగిరి జిల్లా రాజకీయాల్లో ఒక సుదీర్ఘమైన, విలువలతో కూడిన శకం ముగిసింది. భువనగిరి మాజీ ఎమ్మెల్యే, సీనియర్ కాంగ్రెస్ నాయకుడు, నిరాడంబరతకు నిలువెత్తు రూపంగా నిలిచిన కొమ్మిడి నరసింహారెడ్డి మంగళవారం ఉదయం 5 గంటలకు కన్నుమూశారు. కొంతకాలంగా వృద్ధాప్య సమస్యలు, అనారోగ్యంతో బాధపడుతున్న ఆయన హైదరాబాద్‌లోని నిమ్స్ (NIMS) ఆసుపత్రిలో చికిత్స పొందుతూ తుదిశ్వాస విడిచారు. ప్రజా సమస్యల పరిష్కారమే జీవిత లక్ష్యంగా బతికిన ఆయన మరణం ఉమ్మడి నల్గొండ జిల్లాతో పాటు తెలంగాణ రాజకీయ రంగానికి తీరని లోటుగా మిగిలింది.

Also Read : ఆర్థిక పురోగతిలో సంచలనం… సుసంపన్న రాష్ట్రంగా తెలంగాణ

సొంత ఇల్లు కూడా లేని నిరాడంబర జీవితం:

యాదాద్రి భువనగిరి జిల్లా బీబీనగర్ మండలం బ్రాహ్మణపల్లి గ్రామానికి చెందిన కొమ్మిడి నరసింహారెడ్డి.. రామచంద్రరెడ్డి, లక్ష్మమ్మ దంపతుల నాల్గవ సంతానంగా జన్మించారు. ఆయన భార్య సుకన్య. రెండుసార్లు శాసనసభ సభ్యుడిగా (ఎమ్మెల్యే) పనిచేసినప్పటికీ, నేటి రాజకీయాలకు భిన్నంగా ఆయన ఎలాంటి ఆస్తులు కూడబెట్టలేదు. ఒక పాత స్కూటర్ మినహా ఆయనకు సొంత ఇల్లు కూడా లేకపోవడం గమనార్హం. ప్రజల విశ్వాసమే తన అసలైన సంపదగా భావించి, ఆఖరి శ్వాస వరకు అద్దె ఇంట్లోనే నివసిస్తూ నిజాయితీకి నిలువెత్తు నిదర్శనంగా నిలిచారు.

తెలంగాణ ఉద్యమ ప్రస్థానం.. మర్రి చెన్నారెడ్డి శిష్యరికం:

ఉస్మానియా విశ్వవిద్యాలయంలో చదువుకునే రోజుల నుంచే నరసింహారెడ్డి రాజకీయాల వైపు ఆకర్షితులయ్యారు. మాజీ ముఖ్యమంత్రి డాక్టర్ మర్రి చెన్నారెడ్డికి అత్యంత ప్రియ శిష్యుడిగా గుర్తింపు పొందారు. 1969లో ఉవ్వెత్తున ఎగసిన తొలిదశ తెలంగాణ ఉద్యమంలో చురుగ్గా పాల్గొని, కీలక పాత్ర పోషించారు. మర్రి చెన్నారెడ్డి అడుగుజాడల్లో నడుస్తూ తెలంగాణ ప్రజల ఆకాంక్షల కోసం, ప్రాంతీయ వివక్షకు వ్యతిరేకంగా క్షేత్రస్థాయిలో ఉద్యమాలను నడిపించారు.

19 ఏళ్లకే సర్పంచ్‌గా.. రెండుసార్లు ఎమ్మెల్యేగా ప్రస్థానం:

ఆయన ప్రజా జీవితం కేవలం 19 సంవత్సరాల వయసులోనే ప్రారంభమైంది. 1962లో తన సొంత గ్రామం బ్రాహ్మణపల్లి సర్పంచ్‌గా ఎన్నికై రికార్డు సృష్టించారు. 1967లో రెండోసారి కూడా సర్పంచ్‌గా గెలిచి గ్రామాభివృద్ధికి బాటలు వేశారు. ఆ తర్వాత భువనగిరి సమితి అధ్యక్షుడిగా బాధ్యతలు స్వీకరించి, నియోజకవర్గవ్యాప్తంగా పట్టు సాధించారు. తన హయాంలో ఎంతోమంది నిరుద్యోగులకు ఉద్యోగ, ఉపాధి అవకాశాలు కల్పించడమే కాకుండా, వెనుకబడిన పలు పల్లెలను, తండాలను గ్రామపంచాయతీలుగా మార్చేలా ప్రభుత్వాలపై ఒత్తిడి తెచ్చారు.

ఎన్టీఆర్ ప్రభంజనాన్ని తట్టుకొని విజయం:

1978లో కాంగ్రెస్ పార్టీ తరఫున భువనగిరి నియోజకవర్గం నుండి తొలిసారి ఎమ్మెల్యేగా గెలిచిన నరసింహారెడ్డి, తన పనితీరుతో ప్రజల గుండెల్లో స్థానం సంపాదించుకున్నారు. 1983లో ఉమ్మడి ఆంధ్రప్రదేశ్‌లో దివంగత ఎన్టీ రామారావు నేతృత్వంలోని తెలుగుదేశం పార్టీ ప్రభంజనం సృష్టించిన తరుణంలోనూ, భువనగిరిలో ఆ గాలిని తట్టుకొని కాంగ్రెస్ అభ్యర్థిగా రెండోసారి విజయం సాధించి చరిత్ర సృష్టించారు. 1978 నుండి 1985 వరకు సుమారు ఏడేళ్ల పాటు భువనగిరి శాసనసభ్యుడిగా ప్రజాసేవలో తరించారు.

గోదావరి జలాల కోసం జీవితాంతం తపన:

తెలంగాణ ప్రాంతంలో, ముఖ్యంగా భువనగిరి మెట్ట ప్రాంతంలో సాగునీటి సమస్యకు శాశ్వత పరిష్కారం కోసం ఆయన జీవితాంతం అధ్యయనం చేశారు. గోదావరి జలాలను మూసీ నదిలోకి మళ్లించి లక్షలాది ఎకరాలకు సాగునీరు అందించవచ్చనే వినూత్న ప్రణాళికను రూపొందించారు. భారీ ఖర్చు లేకుండా ఈ ప్రాజెక్టును ఎలా అమలు చేయవచ్చో స్వయంగా బ్లూప్రింట్లు, మ్యాపులు గీసి రైతులు, అధికారులు, ప్రజాప్రతినిధులకు వివరించేవారు. భువనగిరి ప్రాంతానికి గోదావరి జలాలు తేవడమే ధ్యేయంగా వచ్చిన ప్రతి ప్రభుత్వానికి వినతిపత్రాలు సమర్పిస్తూ నిరంతరం మేధోమథనం చేశారు.

నిమ్స్, సీసీఎంబీ సాధనకై అలుపెరుగని పోరాటం:

భువనగిరి ప్రాంతానికి ప్రతిష్టాత్మక కేంద్ర ప్రభుత్వ పరిశోధనా సంస్థ సీసీఎంబీ (CCMB)ని తీసుకురావడంలో ఆయన కృషి మరువలేనిది. అప్పటి ముఖ్యమంత్రి డాక్టర్ వైఎస్ రాజశేఖరరెడ్డిని కలిసి మొదట బీబీనగర్ సమీపంలో, ఆ తర్వాత ఈస్ట్ సిటీలో భూసేకరణ జరిగేలా ఒత్తిడి తెచ్చారు. అదేవిధంగా, బీబీనగర్‌లో నిమ్స్ (NIMS) విశ్వవిద్యాలయ ఏర్పాటు పనులు ఆలస్యం కావడాన్ని నిరసిస్తూ, తన వృద్ధాప్యాన్ని, ఆరోగ్యాన్ని కూడా లెక్కచేయకుండా నిమ్స్ భవనం ఎదుట ఆమరణ నిరాహార దీక్షకు దిగారు. ఆయన పోరాటానికి దిగివచ్చిన అప్పటి ప్రభుత్వం తక్షణమే స్పందించి రూ. 60 కోట్ల నిధులను విడుదల చేసింది.

భుజాన సంచి.. చేతిలో నోట్‌బుక్.. విద్యార్థిలాంటి జీవితం:

కొమ్మిడి నరసింహారెడ్డి జీవన విధానం అత్యంత సామాన్యంగా ఉండేది. భుజాన ఒక చిన్న గుడ్డ సంచి, అందులో ఒక జత బట్టలు, సద్దికట్టు (అన్నం మూట) వేసుకుని రాష్ట్రంలో ఎక్కడ సభలు, సమావేశాలు జరిగినా బస్సుల్లో, రైళ్లలో ప్రయాణించేవారు. ఏ సమావేశానికి వెళ్లినా అక్కడ చర్చించిన ముఖ్యాంశాలను, ప్రజా సమస్యలను తన చేతిలోని ఒక చిన్న నోట్‌బుక్‌లో రాసుకునేవారు. జీవితాంతం ఒక విద్యార్థిలా నిరంతరం నేర్చుకుంటూ, ప్రజా సమస్యలకు పరిష్కారాల కోసం అన్వేషించిన అరుదైన మేధావి ఆయన.

Also Read : మా జోలికొస్తే ఊరుకోం… హైడ్రాకు MIM MLA ఒవైసీ వార్నింగ్!

సాయుధ పోరాట స్ఫూర్తి గల కుటుంబం:

నరసింహారెడ్డి కుటుంబానికి తెలంగాణ సాయుధ పోరాటంతో బలమైన చారిత్రక అనుబంధం ఉంది. ఆయన పెద్దన్న కొమ్మిడి కోదండరామిరెడ్డి తెలంగాణ సాయుధ పోరాటంలో అగ్రగామిగా నిలిచారు. నిజాం నిరంకుశ పాలనకు, రజాకార్ల దౌర్జన్యాలకు, భూస్వామ్య వ్యవస్థకు వ్యతిరేకంగా పోరాడి చిన్న వయసులోనే ప్రాణత్యాగం చేశారు. తన అన్నగారి వీరోచిత పోరాట స్ఫూర్తినే వారసత్వంగా పుణికిపుచ్చుకున్న నరసింహారెడ్డి, ప్రజా ఉద్యమాలకు, మేధావులకు, సంఘసంస్కర్తలకు ఎల్లప్పుడూ అండగా నిలిచారు. పదవి ఉన్నా లేకపోయినా ప్రజల కోసమే జీవించిన కొమ్మిడి నరసింహారెడ్డి భౌతికకాయాన్ని సందర్శించేందుకు పలువురు రాజకీయ ప్రముఖులు, రైతులు, అభిమానులు తరలివస్తున్నారు.