Citizenship : మన దేశంలోకి కొందరు బంగ్లాదేశీయులు, రోహింగ్యాలు దొంగతనంగా చొరబడి.. ఇక్కడి పాస్పోర్ట్లు సంపాదించుకుంటున్న వార్తలు మనం చూస్తూనే ఉన్నాం. ఈ నేపథ్యంలో కేంద్ర విదేశీ వ్యవహారాల శాఖ ఒక ముఖ్యమైన విషయం చెప్పింది. పాస్పోర్ట్ అనేది కేవలం వేరే దేశాలకు ప్రయాణం చేయడానికి పనికొచ్చే ఒక కాగితం మాత్రమేనని, అది ఉన్నంత మాత్రాన ఎవరూ తాము భారత పౌరులమని గట్టిగా చెప్పుకోలేరని స్పష్టం చేసింది. దీనిపై కోర్టులు కూడా గతంలో ఇదే మాట చెప్పాయి. అంతేకాదు, మన దగ్గరున్న ఆధార్ కార్డ్, ఓటర్ ఐడీలు కూడా పౌరసత్వాన్ని నిరూపించే పక్కా కాగితాలు కావని ప్రభుత్వం ఎప్పుడో తేల్చేసింది. ఆధార్ అనేది కేవలం మన అడ్రస్, గుర్తింపు కోసమేనని, ఓటర్ ఐడీ అనేది కేవలం ఓటు వేయడానికి మాత్రమేనని కోర్టులు స్పష్టం చేశాయి. మరి ఇవేవీ కానప్పుడు, మన దేశంలో పౌరసత్వాన్ని నిరూపించే అసలైన కాగితం ఏది? అనే అనుమానం అందరిలోనూ మొదలైంది.
మన దేశ పౌరసత్వ చట్టం 1955 ప్రకారం.. ఒక వ్యక్తికి ఐదు రకాలుగా పౌరసత్వం వస్తుంది. అవేంటంటే.. ఇక్కడే పుట్టడం వల్ల, వంశపారంపర్యంగా, రిజిస్ట్రేషన్ ద్వారా, సహజసిద్ధంగా లేదా ఏదైనా కొత్త ప్రాంతం ఇండియాలో కలవడం వల్ల పౌరసత్వం దక్కుతుంది. ఈ చట్టం ప్రకారం.. 1987 జూలై 1 కంటే ముందు మన దేశంలో పుట్టిన వారికి డైరెక్ట్గా పౌరసత్వం వచ్చేస్తుంది. ఆ తర్వాత పుట్టిన వాళ్లకైతే తల్లి లేదా తండ్రిలో ఎవరో ఒకరు ఖచ్చితంగా భారత పౌరులై ఉండాలి. ఇక 2004 డిసెంబర్ 3 తర్వాత పుట్టిన పిల్లలకైతే, తల్లిదండ్రుల్లో ఒకరు భారత పౌరుడై ఉండటంతో పాటు, మరొకరు దొంగతనంగా దేశంలోకి వచ్చిన వలసదారు కాకూడదు. పౌరసత్వం అనేది చట్టప్రకారం వచ్చే ఒక హోదా అని, ఏదో ఒక సింగిల్ కార్డు ఉంటే సరిపోదని హోంశాఖ పార్లమెంట్లో చెప్పింది. దీని కోసం ప్రత్యేకంగా ఒకే ఒక సర్టిఫికేట్ లిస్ట్ అంటూ ఏదీ లేదని, ఆయా కేసులను బట్టి చూస్తామని బోర్డు తెలిపింది.
Also Read : పిచ్చెక్కించే డిస్కౌంట్: రియల్ మీ స్మార్ట్ఫోన్పై రూ.18వేల భారీ తగ్గింపు.. ఫీచర్లు ఊరమాస్..!
అసలు పౌరసత్వాన్ని నిరూపించుకోవడానికి ఏమేం కావాలో చూస్తే.. కేంద్ర హోంశాఖ ఇచ్చే సిటిజన్షిప్ సర్టిఫికేట్ అన్నింటికంటే ముఖ్యం. ఇది సాధారణంగా విదేశాల నుండి వచ్చి ఇక్కడ సెటిల్ అయ్యే వాళ్లకు ఇస్తారు. ఇక మనలాంటి సామాన్యులకు బర్త్ సర్టిఫికేట్ చాలా ముఖ్యం. అయితే అందులో తల్లిదండ్రుల వివరాలు కరెక్ట్గా ఉండాలి. 1987 తర్వాత పుట్టిన వాళ్లయితే, అవసరమైతే వాళ్ల తల్లిదండ్రుల పౌరసత్వాన్ని కూడా నిరూపించాల్సి రావచ్చు. వీటితో పాటు రాష్ట్ర ప్రభుత్వాలు ఇచ్చే లోకల్ సర్టిఫికేట్ కూడా పనికొస్తుంది. కానీ ఏవైనా గొడవలు వస్తే దీనిని కోర్టుల్లో సవాలు చేయవచ్చు.
ఇక ఎప్పటినుంచో ఇక్కడే ఉంటున్నామని నిరూపించడానికి ప్రభుత్వ అధికారులు, కోర్టులు మన పాత రికార్డులను చెక్ చేస్తాయి. మన పాత స్కూల్ సర్టిఫికేట్లు, భూమి కాగితాలు, రేషన్ కార్డులు, పాస్పోర్ట్ కోసం అప్లై చేసినప్పుడు ఇచ్చిన కాగితాలు, మన తల్లిదండ్రుల డాక్యుమెంట్లను పరిశీలిస్తారు. వీటన్నింటిలో వివరాలు కరెక్ట్గా ఉంటే పౌరసత్వం ఇస్తారు. గతంలో అసోంలో ఎన్ఆర్సీ జరిగినప్పుడు కూడా ప్రజలను 1971 కంటే ముందు నాటి పాత ఓటర్ లిస్ట్, భూమి పత్రాలు, స్కూల్ రికార్డులనే అడిగారు. ప్రస్తుతం దేశమంతటా ఎన్ఆర్సీ లేకపోయినా, భవిష్యత్తులో ఒకవేళ పెట్టినా ఇలాంటి పాత కాగితాలనే అడుగుతారు.
మన దేశంలో 99.99 శాతం మంది సాధారణ ప్రజల దగ్గర పౌరసత్వం కోసం ప్రత్యేకంగా ఎలాంటి కార్డులు లేవు. కానీ వారంతా తరతరాలుగా ఇక్కడే బతుకుతున్నారు కాబట్టి, వాళ్ల దగ్గరున్న పాత కాగితాల లింక్ ద్వారా సహజంగానే భారతీయులుగా చెల్లుబాటవుతున్నారు. మన దగ్గరున్న పాస్పోర్ట్, బర్త్ సర్టిఫికేట్, ఓటర్ ఐడీ, ఆధార్, స్కూల్-కాలేజీ సర్టిఫికేట్ల ఆధారంగా మన పౌరసత్వం దానంతట అదే రుజువైపోతుంది. ఏదైనా పెద్ద అనుమానం వస్తేనే తల్లిదండ్రుల కాగితాలు అడుగుతారు. కాబట్టి, పాస్పోర్ట్ ఒక్కటే పౌరసత్వానికి పక్కా సాక్ష్యం కాదని విదేశీ వ్యవహారాల శాఖ చెప్పినంత మాత్రాన సామాన్య ప్రజలు కంగారు పడాల్సిన అవసరం అస్సలు లేదు. ఎందుకంటే మనం పుట్టుకతోనే భారతీయులం. కాకపోతే, భవిష్యత్తులో ఎలాంటి ఇబ్బందులు రాకుండా ఉండటానికి, రేపటి రోజున ప్రభుత్వ పనుల కోసం మన పాత కాగితాలన్నింటినీ జాగ్రత్తగా దాచుకోవడం మాత్రం చాలా ముఖ్యం.
Also Read : వర్షాకాలంలో ఇంట్లో ఈ చిన్న తప్పులు అస్సలు చేయకండి.. ప్రాణాలకే ప్రమాదం!
