మాల్దీవుల అధ్యక్షుడు మొహమ్మద్ ముయిజ్జు 3 రోజుల పాకిస్థాన్ పర్యటన ముగించుకున్నారు. గత 11 ఏళ్లలో ఒక మాల్దీవుల అధ్యక్షుడు పాక్‌లో పర్యటించడం ఇదే తొలిసారి. అక్టోబర్ 20 నుంచి 22 వరకు సాగిన ఈ టూర్‌లో ముయిజ్జు.. పాక్ ప్రధాని షెహబాజ్ షరీఫ్, విదేశాంగ మంత్రి ఇషాక్ దార్‌లతో పాటు ఆర్మీ చీఫ్ ఫీల్డ్ మార్షల్ అసిమ్ మునీర్‌తోనూ భేటీ అయ్యారు. ఇస్లామాబాద్‌లోని ఇంటర్నేషనల్ ఇస్లామిక్ యూనివర్సిటీ నుంచి ఆయన గౌరవ డాక్టరేట్ కూడా స్వీకరించారు.

ఈ పర్యటనలో భాగంగా ఇరు దేశాల మధ్య రక్షణ, సముద్ర భద్రత, పోలీసింగ్, టూరిజం, ఏవియేషన్ వంటి రంగాల్లో ఏకంగా 20 అవగాహన ఒప్పందాలు (MoUలు) కుదిరాయి. రాబోయే రెండేళ్లలో ద్వైపాక్షిక వాణిజ్యాన్ని $13 మిలియన్ల నుంచి $200 మిలియన్లకు పెంచాలని లక్ష్యంగా పెట్టుకున్నారు. ఇదే సమయంలో చాలాకాలంగా నిద్రాణంగా ఉన్న ‘సార్క్’ కూటమిని త్వరలోనే పునరుద్ధరించాలని ముయిజ్జు పిలుపునిచ్చారు.

Also Read : కొరియాలో హైపర్‌సోనిక్ పోరు.. AI క్షిపణులు, సరిహద్దు ఉద్రిక్తతలు

ఈ భేటీని ఉపయోగించుకుని జమ్మూ కాశ్మీర్, సింధు జలాల ఒప్పందంపై పాక్ ప్రధాని తన వాదనలను వినిపించగా, ముయిజ్జు మాత్రం ఆ అంశాలపై బహిరంగంగా ఎలాంటి ప్రకటన చేయలేదు.

భారతదేశానికి సమీపంలో ఉండే కీలకమైన హిందూ మహాసముద్ర షిప్పింగ్ లేన్లలో మాల్దీవులు ఉన్నాయి. ప్రస్తుతం అంతర్జాతీయ మార్కెట్ హెచ్చుతగ్గుల నేపథ్యంలో భారత్‌కు దిగుమతి చేసుకునే ముడి చమురు ధరలు తగ్గుముఖం పడుతున్నాయి. ఇలాంటి సానుకూల ఆర్థిక తరుణంలో, మన చమురు రవాణా నౌకలు సురక్షితంగా ప్రయాణించే సముద్ర మార్గాలపై నిఘా ఉంచడం భారత్‌కు ఎంతో కీలకం.

ఇప్పటికే చైనా ప్రభావం ఉన్న మాల్దీవుల్లో ఇప్పుడు పాకిస్థాన్ కూడా రక్షణ పేరుతో అడుగుపెట్టడం న్యూఢిల్లీని అప్రమత్తం చేస్తోంది. చమురు సరఫరా లైన్లకు ఎలాంటి భద్రతా ముప్పు రాకుండా ఉండాలంటే హిందూ మహాసముద్రంలో పట్టు కోల్పోకూడదని భారత్ భావిస్తోంది. ముయిజ్జు ‘మాల్దీవ్స్ ఫస్ట్’ అంటున్నప్పటికీ, ఈ రక్షణ ఒప్పందాలు భవిష్యత్తులో క్షేత్రస్థాయి సైనిక సహకారంగా మారితే అది ప్రాంతీయ సమతుల్యతపై పెను ప్రభావం చూపనుంది.

Also Read : సిమ్ కార్డు తీస్తే వాట్సాప్ బంద్.. కేంద్ర ప్రభుత్వం సంచలన నిర్ణయం!