Karnataka : కర్ణాటకలోని ధర్మస్థల ప్రాంతంలో 2012లో జరిగిన 17 ఏళ్ల సౌజన్య అత్యాచారం, హత్య కేసు మరోసారి వార్తల్లోకి వచ్చింది. ఈ కేసును తాజాగా మళ్లీ దర్యాప్తు చేయాలని సుప్రీంకోర్టు సోమవారం ఆదేశించింది. కొత్త దర్యాప్తును మూడు నెలల్లో పూర్తి చేసి, నివేదికను కోర్టుకు సమర్పించాలని ఆదేశాలు జారీ చేసింది.
2012 అక్టోబర్‌లో ఉజిరే ప్రాంతానికి చెందిన సౌజన్య అత్యాచారానికి గురై హత్యకు గురైంది. ఈ కేసును తొలుత కర్ణాటక సీఐడీ దర్యాప్తు చేసింది. ఆ తర్వాత సీబీఐ కూడా దర్యాప్తు చేపట్టింది. అయితే ఇంతకాలం గడిచినా సౌజన్యను హత్య చేసింది ఎవరో తేలలేదు. ఈ కేసులో సంతోష్ రావును పోలీసులు అరెస్ట్ చేశారు. అయితే సరైన ఆధారాలు లేవంటూ 2023 జూన్‌లో సీబీఐ ప్రత్యేక కోర్టు ఆయనను నిర్దోషిగా విడుదల చేసింది. దీంతో అసలు సౌజన్యను హత్య చేసింది ఎవరు అనే ప్రశ్న అలాగే మిగిలిపోయింది.
Also Read : తమిళనాడులో మరో రాజకీయపార్టీ… హీరో అజిత్‌ కార్యదర్శిగా టీఎంకే ?
సౌజన్య తల్లి కుసుమావతి తన కుమార్తె కేసును మళ్లీ దర్యాప్తు చేయాలని కోరుతూ కోర్టును ఆశ్రయించారు. గతంలో జరిగిన దర్యాప్తులో కొన్ని ముఖ్యమైన ఆధారాలను సరిగా పరిశీలించలేదని ఆమె ఆరోపించారు. 2024లో కర్ణాటక హైకోర్టు ఆమె పిటిషన్‌ను కొట్టివేసింది. అయితే సంతోష్ రావు నిర్దోషిగా విడుదలైన నేపథ్యంలో ఈ నేరానికి మరెవరైనా కారణమై ఉండవచ్చా అనే విషయాన్ని కూడా పరిశీలించాల్సిన అవసరం ఉందని హైకోర్టు వ్యాఖ్యానించింది.
ఇప్పుడు సుప్రీంకోర్టు తాజా ఆదేశాలతో కేసులో కొత్త దర్యాప్తు మొదలుకానుంది. గతంలో దర్యాప్తు చేసిన అధికారులు కొత్త దర్యాప్తు బృందంలో ఉండకూడదని కూడా కోర్టు ఆదేశించినట్లు నివేదికలు చెబుతున్నాయి. మూడు నెలల్లో దర్యాప్తు పూర్తి చేసి నివేదిక ఇవ్వాల్సి ఉంటుంది.
2025లో ధర్మస్థల ప్రాంతానికి చెందిన ఓ మాజీ పారిశుద్ధ్య కార్మికుడు చేసిన ఆరోపణలతో సౌజన్య కేసు మరోసారి చర్చలోకి వచ్చింది. వందలాది మృతదేహాలను పూడ్చిపెట్టడం లేదా కాల్చివేయడం జరిగిందని, వాటిలో మహిళలు, విద్యార్థుల మృతదేహాలు కూడా ఉన్నాయని అతను ఆరోపించాడు. కొన్ని ఫొటోలను కూడా అధికారులకు ఇచ్చాడు. ఈ ఆరోపణలపై కర్ణాటక ప్రభుత్వం ప్రత్యేక దర్యాప్తు బృందాన్ని ఏర్పాటు చేసింది.
అయితే ఆ SIT దర్యాప్తు ప్రధానంగా మాజీ పారిశుద్ధ్య కార్మికుడు చేసిన మృతదేహాల ఆరోపణలపైనే కొనసాగింది. సౌజన్య కేసును ప్రత్యేకంగా మళ్లీ తెరవాలంటే కోర్టు ఆదేశాలు అవసరమని అధికారులు అప్పట్లో తెలిపారు. ఆ వ్యక్తిని తర్వాత తప్పుడు వాంగ్మూలానికి సంబంధించిన కేసులో SIT అరెస్ట్ చేసింది.
Also Read : బ్యాంకు ఖాతాదారులకు బిగ్ షాక్.. వరుసగా 5 రోజులు బ్యాంకులు బంద్.. ఎందుకంటే?
