దేశంలోని నిరుద్యోగ యువతకు కేంద్ర ప్రభుత్వం మళ్లీ గుడ్ న్యూస్ తెలిపింది. కేంద్ర ప్రభుత్వ పరిధిలోని విభిన్న మంత్రిత్వ శాఖలు, కీలక విభాగాల్లో సరికొత్తగా ఎంపికైన 51,000 మందికి పైగా అభ్యర్థులకు నేడు అధికారికంగా నియామక పత్రాలు అందజేయనున్నారు. 20వ రోజ్‌గార్ మేళా కార్యక్రమంలో భాగంగా ప్రధానమంత్రి నరేంద్ర మోదీ(PM Modi) వర్చువల్ విధానంలో పాల్గొని మధ్యాహ్నం 12:30 గంటలకు వీడియో కాన్ఫరెన్స్ ద్వారా ఈ ఆఫర్ లెటర్లను పంపిణీ చేయనున్నారు. ఈ సందర్భంగా నూతనంగా ప్రభుత్వ విధుల్లోకి అడుగుపెడుతున్న ఉద్యోగులను ఉద్దేశించి ప్రధాని ప్రత్యేకంగా ప్రసంగించనున్నారు.
Also Read : డెంగ్యూకి చెక్.. త్వరలోనే భారత్‌లోకి క్యూడెంగా వ్యాక్సిన్.. ఇది ఎలా పనిచేస్తుందో తెలుసా?
ఈ విస్తృత నియామక పత్రాల పంపిణీ ప్రక్రియను సుఫీలంగా నిర్వహించేందుకు దేశవ్యాప్తంగా మొత్తం 45 విభిన్న ప్రాంతాల్లో రోజ్‌గార్ మేళా ప్రత్యేక వేదికలను సిద్ధం చేశారు. ఈ విడతలో కొలువులు సాధించిన యువత కేంద్ర ప్రభుత్వంలో ఎంతో కీలకమైన రైల్వే మంత్రిత్వ శాఖ, హోం వ్యవహారాల మంత్రిత్వ శాఖ, రక్షణ మంత్రిత్వ శాఖ, రెవెన్యూ శాఖ, ఆరోగ్యం, కుటుంబ సంక్షేమ శాఖ, ఆర్థిక సేవల శాఖల్లో బాధ్యతలు చేపట్టనున్నారు. వివిధ విభాగాల్లో ఖాళీగా ఉన్న పోస్టులను వేగవంతంగా భర్తీ చేయడం ద్వారా దేశంలో పాలనా యంత్రాంగాన్ని మరింత సమర్థవంతంగా, వేగంగా మార్చడమే లక్ష్యంగా ఈ డ్రైవ్ ముమ్మరంగా కొనసాగుతోంది.
కేంద్రంలో అధికారంలోకి వచ్చిన నాటి నుండి నిరుద్యోగ యువతకు విస్తృతంగా ఉపాధి అవకాశాలు కల్పించడం, దేశ వికాస ప్రస్థానంలో వారి శక్తియుక్తులను భాగస్వామ్యం చేయడం ప్రధాన ధ్యేయంగా కేంద్ర ప్రభుత్వం పనిచేస్తోంది. ఈ నిరంతర శ్రమలో భాగమే రోజ్‌గార్ మేళా కార్యక్రమం. తాజా 20వ విడతలో అందిస్తున్న 51 వేల నియామకాలతో కలిపితే ఇప్పటివరకు ఈ పథకం కింద వివిధ ప్రభుత్వ విభాగాలు, ప్రభుత్వ రంగ సంస్థల్లో మొత్తం 12.75 లక్షల మంది యువతకు ఉద్యోగ పత్రాలు అందించినట్లవుతుంది.
ఈ భారీ నియామక మేళా ద్వారా ఉద్యోగాలు పొందిన అభ్యర్థులకు ప్రజాసేవలో నేరుగా పాలుపంచుకునే గొప్ప అవకాశం లభిస్తోంది. అంతేకాకుండా సుపరిపాలన అందించడంలోనూ, దేశ సమగ్ర వికాసం, ఆర్థిక నిర్మాణంలో యువత పాత్రను మరింత బలోపేతం చేయడంలో ఈ రోజ్‌గార్ మేళా ఎంతో కీలకంగా మారుతోంది. దేశవ్యాప్తంగా నేడు ఉద్యోగ పత్రాలు అందుకుంటున్న వేలాది మంది యువత కుటుంబాల్లో ఈ నిర్ణయం సరికొత్త కాంతులు నింపి, పండుగ వాతావరణాన్ని తేవడంతో పాటు దేశ నిర్మాణంలో భాగమయ్యే దిశగా వారిని నడిపిస్తోంది.
Also Read : బెంగాల్‌ ఉప ఎన్నిక వేళ.. మమతకు మరో బిగ్ షాక్‌
