Miami Airport : అమెరికాలోని ఫ్లోరిడా రాష్ట్రం మయామి అంతర్జాతీయ విమానాశ్రయంలో అమెజాన్‌కు చెందిన కార్గో విమానం ప్రమాదానికి గురైంది. విమానం రన్‌వేపై నుంచి అదుపుతప్పి బయటకు దూసుకెళ్లి కూలిపోయింది. ఈ ప్రమాదంలో ఐదుగురు మృతి చెందగా, మరో ఐదుగురు గాయపడ్డారు. ఈ ప్రమాదం ఆదివారం మధ్యాహ్నం 1:58 గంటలకు జరిగింది. ప్రమాదం జరిగిన వెంటనే సహాయక బృందాలు అక్కడికి చేరుకున్నాయి. గాయపడిన ఐదుగురిని ఆసుపత్రికి తరలించారు.
ప్రమాదం తర్వాత విమానం నుంచి భారీగా పొగలు వెలువడిన దృశ్యాలు వీడియోల్లో కనిపించాయి. మయామి-డేడ్ ఫైర్ రెస్క్యూ సిబ్బంది తెలిపిన వివరాల ప్రకారం, 60కి పైగా అత్యవసర వాహనాలు, సుమారు 200 మంది అగ్నిమాపక సిబ్బంది ఘటనాస్థలికి చేరుకుని సహాయక చర్యలు చేపట్టారు. అమెరికా ఫెడరల్ ఏవియేషన్ అడ్మినిస్ట్రేషన్ ప్రకారం, అమెజాన్‌కు చెందిన ఎయిర్ ఫ్లైట్ 7598 విమానం ఆదివారం మధ్యాహ్నం 2 గంటల సమయంలో మయామి విమానాశ్రయంలో దిగేందుకు ప్రయత్నించింది. అయితే ల్యాండింగ్ సమయంలో విమానం రన్‌వేపై నుంచి బయటకు వెళ్లిపోయింది.
ఈ విమానం బోయింగ్ 767-300 కార్గో విమానం. ఇది ప్యూర్టో రికోలోని లూయిస్ మునోజ్ మారిన్ అంతర్జాతీయ విమానాశ్రయం నుంచి బయలుదేరింది. ప్రమాదానికి గల కారణాలను తెలుసుకునేందుకు దర్యాప్తు చేపట్టనున్నట్లు ఎఫ్‌ఏఏ తెలిపింది. విమానం ల్యాండ్ అవుతున్న సమయంలో ప్రమాదం జరిగిందని అమెజాన్ ప్రతినిధి కెల్లీ నాంటెల్ తెలిపారు. ఘటనపై పూర్తి వివరాలు సేకరిస్తున్నామని ఆమె చెప్పారు.
ఇదిలా ఉండగా, శనివారం అమెరికాలోని కాలిఫోర్నియా రాష్ట్రం ఫ్రెస్నో నగరంలో కూడా మరో విమాన ప్రమాదం జరిగింది. ఈ ప్రమాదంలో ఇద్దరు మృతి చెందగా, మరో ఇద్దరు తీవ్రంగా గాయపడ్డారు. ఫ్రెస్నో కౌంటీ షెరీఫ్ కార్యాలయం తెలిపిన వివరాల ప్రకారం, శాన్ జోక్విన్ నది సమీపంలోని ఎత్తైన ప్రదేశంలో ఒక చిన్న సింగిల్ ఇంజిన్ విమానం మంటల్లో చిక్కుకుని కనిపించింది. అగ్నిమాపక సిబ్బంది మంటలను అదుపులోకి తీసుకుని, సమీపంలోని ఇళ్లకు మంటలు వ్యాపించకుండా చర్యలు తీసుకున్నారు.
ఆ చిన్న విమానంలో మొత్తం నలుగురు ప్రయాణిస్తున్నారు. వారిలో ఇద్దరు పిల్లలు ప్రమాదస్థలంలోనే మృతి చెందినట్లు అధికారులు తెలిపారు. మరో ఇద్దరు పెద్దలకు తీవ్ర గాయాలు కావడంతో ఆసుపత్రికి తరలించారు. వారి పరిస్థితి విషమంగా ఉన్నట్లు అధికారులు చెప్పారు. ఈ ప్రమాదానికి అసలు కారణం ఏమిటన్నది తెలుసుకునేందుకు అమెరికా నేషనల్ ట్రాన్స్‌పోర్టేషన్ సేఫ్టీ బోర్డు దర్యాప్తు చేస్తోంది.
