Houthi attack: పశ్చిమాసియాలో ముదురుతున్న యుద్ధ మేఘాలు ప్రపంచ ఇంధన భద్రతను తీవ్ర ప్రమాదంలోకి నెడుతున్నాయి. ఓ వైపు అమెరికా-ఇరాన్ మధ్య సైనిక ఘర్షణలు ఉద్రిక్తంగా కొనసాగుతుండగానే, మరోవైపు సౌదీ అరేబియా మరియు యెమెన్కు చెందిన హూతీ తిరుగుబాటుదారుల మధ్య దాడులు తీవ్రరూపం దాల్చాయి. ఇరాన్ మద్దతు ఉన్న హూతీ దళాలు సౌదీ అరేబియా లక్ష్యంగా విరుచుకుపడుతుండటంతో పాటు, ఎర్రసముద్రంలో అంతర్జాతీయ నౌకల రాకపోకలపై దిగ్బంధనం విధిస్తున్నట్లు ప్రకటించడం ప్రపంచ దేశాల్లో తీవ్ర ఆందోళన కలిగిస్తోంది.
తాజాగా సౌదీ అరేబియాలోని అతిపెద్ద, అత్యంత కీలకమైన చమురు సంస్థ ‘సౌదీ అరామ్కో’ (Saudi Aramco)కు చెందిన రాస్ తనురా (Ras Tanura) రిఫైనరీపై హూతీ తిరుగుబాటుదారులు భారీ డ్రోన్ దాడికి తెగబడ్డారు. యెమెన్పై సౌదీ దళాలు జరిపిన వైమానిక దాడులకు నిరసనగానే ఈ ప్రతిదాడి చేసినట్లు వారు వెల్లడించారు. ప్రపంచ చమురు సరఫరాలో కీలక పాత్ర పోషించే ఈ రిఫైనరీపై దాడి జరగడంతో అక్కడ భారీగా అగ్నికీలలు ఎగసిపడ్డాయి. దీనికి సంబంధించిన దృశ్యాలు సామాజిక మాధ్యమాల్లో వైరల్గా మారడంతో, ముందుస్తు జాగ్రత్తగా సంస్థ యాజమాన్యం రిఫైనరీని తాత్కాలికంగా మూసివేసింది.
అగ్నిమాపక సిబ్బంది తీవ్రంగా శ్రమించి ప్రస్తుతం మంటలను అదుపులోకి తెచ్చినట్లు సమాచారం. అయితే ఈ దాడి వల్ల ప్రాణనష్టం లేదా ఎంతమొత్తంలో ఆస్తి నష్టం జరిగిందనే పూర్తి వివరాలను సౌదీ అధికారులు అధికారికంగా వెల్లడించాల్సి ఉంది. పదేపదే మౌలిక సదుపాయాలపై దాడులు జరుగుతుండటంతో సౌదీ తన ఎయిర్ డిఫెన్స్ వ్యవస్థలను అలర్ట్ చేసింది. యెమెన్పై సౌదీ అరేబియా విధిస్తున్న ఆంక్షలు, దిగ్బంధనాన్ని తక్షణమే ఎత్తివేసే వరకు దాడులు ఆపేది లేదని, ఎర్రసముద్రం గుండా వెళ్లే నౌకలను అడ్డుకుంటూనే ఉంటామని హూతీ ప్రతినిధులు స్పష్టం చేశారు.
ఈ పరిణామాలు అంతర్జాతీయ చమురు రవాణా మరియు ఇంధన మార్కెట్కు కోలుకోలేని దెబ్బగా పరిణమించాయి. ఇప్పటికే హార్ముజ్ జలసంధి (Strait of Hormuz) వద్ద ఇరాన్ సృష్టిస్తున్న ఆటంకాలతో ముడిచమురు ధరలు ఆకాశాన్ని తాకుతున్నాయి. ఇప్పుడు దానికి తోడు సౌదీ నౌకలను, అంతర్జాతీయ సరుకు రవాణాను లక్ష్యంగా చేసుకుని బాబ్ ఎల్-మాండెబ్ (Bab el-Mandeb) జలసంధిని మూసివేస్తామని హూతీలు బెదిరించడం ప్రపంచ వాణిజ్యాన్ని పక్షవాతానికి గురిచేసేలా ఉంది. ఈ జలసంధి ఎర్ర సముద్రాన్ని గల్ఫ్ ఆఫ్ ఏడెన్తో కలిపే అత్యంత వ్యూహాత్మక మార్గం.
ప్రపంచ వాణిజ్యంలో దాదాపు 12 శాతం చమురు మరియు సరుకుల రవాణా ఈ బాబ్ ఎల్-మాండెబ్ జలసంధి గుండానే సాగుతుంది. ఒకవేళ ఇక్కడ నౌకల రాకపోకలు పూర్తిగా నిలిచిపోతే, ఓడలు ఆఫ్రికా ఖండాన్ని చుట్టి సుదీర్ఘ మార్గంలో ప్రయాణించాల్సి వస్తుంది. దీనివల్ల ప్రయాణ సమయం పెరగడమే కాకుండా ఇంధన ఖర్చులు, బీమా ప్రీమియంలు భారీగా పెరిగిపోయి గ్లోబల్ సప్లై చైన్ (Global Supply Chain) తీవ్రంగా దెబ్బతింటుంది. ఇది అంతర్జాతీయంగా నిత్యావసరాలు, చమురు ధరలు మరింత ప్రియమయ్యేలా చేస్తుంది.
మరోవైపు, హూతీలను అణచివేసేందుకు అమెరికా, బ్రిటన్లతో కూడిన కూటమి ప్రయత్నిస్తున్నప్పటికీ, వారి వద్ద ఉన్న చౌకైన డ్రోన్లు మరియు మిసైల్ టెక్నాలజీ ముందు ఈ వ్యూహాలు సవాళ్లను ఎదుర్కొంటున్నాయి. ఒకే సమయంలో రెండు ప్రధాన జలసంధులలో (హార్ముజ్ మరియు బాబ్ ఎల్-మాండెబ్) ఉద్రిక్తతలు నెలకొనడం ఆధునిక చరిత్రలో ఇదే మొదటిసారి అని రక్షణ నిపుణులు విశ్లేషిస్తున్నారు. ఈ సంక్షోభం తక్షణమే సర్దుమణగకపోతే ప్రపంచ ఆర్థిక వ్యవస్థ తీవ్ర ద్రవ్యోల్బణంలోకి కూరుకుపోయే ప్రమాదం ఉందని ఆర్థిక నిపుణులు హెచ్చరిస్తున్నారు.
