KTR : తెలంగాణలో అధికార కాంగ్రెస్ పార్టీ తొమ్మిది నెలల పాలన పూర్తిగా వైఫల్యాలమయంగా మారిందని, ఇచ్చిన అవకాశంలో సగం సమయం గడిచినా ప్రజలకు ఏం చేశారో చెప్పుకోలేని స్థితిలో ఆ పార్టీ ఉందని బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్ తీవ్రస్థాయిలో ధ్వజమెత్తారు. బుధవారం తెలంగాణ భవన్లో ఏర్పాటు చేసిన మీడియా సమావేశంలో ఆయన మాట్లాడారు. రాష్ట్రం దివాలా తీసిందంటూ ముఖ్యమంత్రి రేవంత్ రెడ్డి చేస్తున్న వ్యాఖ్యలపై కేటీఆర్ మండిపడ్డారు. కాంగ్రెస్ ప్రభుత్వ వైఫల్యాలపై తాను ఎక్కడైనా, ఎప్పుడైనా చర్చకు సిద్ధమని, దమ్ముంటే సీఎం రేవంత్ రెడ్డి తేదీ, సమయం, స్థలాన్ని ఖరారు చేయాలని సవాల్ విసిరారు.
కేసీఆర్ హయాంలో అప్పులపై కేంద్రం స్పష్టత
రాష్ట్ర అప్పులపై ముఖ్యమంత్రి రేవంత్ రెడ్డి, డిప్యూటీ సీఎం భట్టి విక్రమార్క ప్రజలను పక్కదారి పట్టిస్తూ పచ్చి అబద్ధాలు చెపుతున్నారని కేటీఆర్ ఆరోపించారు. కేసీఆర్ అధికారం నుంచి దిగిపోయే నాటికి రాష్ట్ర అప్పులు కేవలం రూ.3.50 లక్షల కోట్లు మాత్రమేనని, ఆ విషయాన్ని పార్లమెంట్లో బీజేపీ ఎంపీ రఘునందన్ రావు అడిగిన ప్రశ్నకు కేంద్ర ప్రభుత్వం కూడా స్పష్టంగా సమాధానం ఇచ్చిందని గుర్తుచేశారు. కేంద్రం అధికారికంగా రూ.2.70 లక్షల కోట్ల అప్పు మాత్రమే ఉందని చెప్తుంటే, రేవంత్ రెడ్డి మాత్రం కాకి లెక్కలతో దుష్ప్రచారం చేస్తున్నారని దుయ్యబట్టారు.
ఢిల్లీ పర్యటనలపై సీఎంకు ప్రశ్నల వర్షం
అప్పుల కారణంగా ఢిల్లీకి వెళితే రాష్ట్ర ఇజ్జత్ పోతోందని స్వయంగా ముఖ్యమంత్రే అంటున్నారని, అలాంటప్పుడు తొమ్మిది నెలల కాలంలో ఆయన 72 సార్లు ఎందుకు ఢిల్లీకి వెళ్లారో సమాధానం చెప్పాలని కేటీఆర్ ప్రశ్నించారు. రాష్ట్ర గౌరవాన్ని, ప్రజల మనోస్థైర్యాన్ని దెబ్బతీసేలా మాట్లాడే ఏకైక ముఖ్యమంత్రి రేవంత్ రెడ్డి మాత్రమేనని విమర్శించారు. తెలంగాణ ఎదుగుదల, గొప్పతనం రేవంత్కు జీర్ణం కావడం లేదని, ఇంతటి భావదారిద్ర్యం ఉన్న సీఎంను తాను ఎప్పుడూ చూడలేదన్నారు.
వ్యవసాయ రంగంలో బీఆర్ఎస్ అద్భుతాలు
కేంద్ర ప్రభుత్వం నుంచి ఎలాంటి సహకారం అందకపోయినా కేసీఆర్ పదేళ్ల పాలనలో తెలంగాణను కోటి ఎకరాల మాగాణిగా మార్చారని కేటీఆర్ గుర్తుచేశారు. 2014-15లో రాష్ట్రంలో ధాన్యం సాగు కేవలం 26 లక్షల హెక్టార్లు మాత్రమే ఉంటే, కేసీఆర్ దిగిపోయే నాటికి అది 59 లక్షల హెక్టార్లకు చేరిందన్నారు. కేవలం నాలుగేళ్ల కాలంలోనే ప్రపంచంలోనే అతిపెద్ద లిఫ్ట్ ఇరిగేషన్ ప్రాజెక్ట్ అయిన కాళేశ్వరాన్ని నిర్మించి అద్భుతం సృష్టించామని, దీన్ని చూసి ప్రపంచమంతా ఆశ్చర్యపోయిందని తెలిపారు.
Also Read : కొత్త ఇల్లు మారారా.. SIR ప్రక్రియలో ఓటు మార్చుకోకపోతే వచ్చే ఇబ్బందులు ఇవే!
హైదరాబాద్ ప్రగతికి అంతర్జాతీయ గుర్తింపు
బీఆర్ఎస్ హయాంలో అభివృద్ధి చెందిన హైదరాబాద్ నగరాన్ని చూసి సూపర్ స్టార్ రజనీకాంత్ ‘న్యూయార్క్’ లా ఉందంటూ ప్రశంసించారని కేటీఆర్ గుర్తుచేశారు. ఇటీవల రాష్ట్ర పర్యటనకు వచ్చిన మేఘాలయ సీఎం కాన్రాడ్ సంగ్మా కమాండ్ కంట్రోల్ సెంటర్ను చూసి ముగ్ధులై తనకు ఫోన్ చేసి అభినందించారని చెప్పారు. గతంలో ఫాక్స్కాన్ ఛైర్మన్ సైతం హైదరాబాద్ మౌలిక వసతులను కొనియాడారని, ఇదంతా కేసీఆర్ విజన్ వల్లే సాధ్యమైందని స్పష్టం చేశారు.
కాంగ్రెస్ నేతల ‘దండుపాళ్యం’ ముఠా దోపిడీ
పరిపాలన చేతగాక రేవంత్ రెడ్డి ప్రతిదానికీ గత ప్రభుత్వంపై ఏడుపులు ఏడుస్తున్నారని కేటీఆర్ ఎద్దేవా చేశారు. సీఎం, ఆయన కుటుంబ సభ్యులు, మంత్రుల దోపిడీ వల్లనే ప్రస్తుతం తెలంగాణ ఆస్తులు కరిగిపోతున్నాయని ఆరోపించారు. కాంగ్రెస్ నేతలు రాష్ట్రంలో ‘దండుపాళ్యం’ ముఠాలాగ దోచుకుంటున్నారని తీవ్ర వ్యాఖ్యలు చేశారు. రాహుల్ బంధువులు, పొంగులేటి బంధువులు, సీఎం సోదరుల దోపిడీ పర్వానికి వెంటనే బ్రేక్ పడాలని డిమాండ్ చేశారు.
సవాల్ను స్వీకరిస్తున్నా.. వేదిక మీదే!
బీఆర్ఎస్, కాంగ్రెస్ పాలనపై చర్చకు సిద్ధమా అంటూ సీఎం రేవంత్ రెడ్డి విసిరిన సవాల్ను తాను పూర్తిస్థాయిలో స్వీకరిస్తున్నట్లు కేటీఆర్ ప్రకటించారు. “అసెంబ్లీనా? ప్రెస్క్లబ్ నా? జూబ్లీహిల్స్ ప్యాలెస్నా? కాంగ్రెస్ రైతు డిక్లరేషన్ ప్రకటించిన వరంగల్ చౌరస్తానా? లేక నిరుద్యోగులకు 2 లక్షల ఉద్యోగాలు ఇస్తామని రాహుల్ గాంధీ డైలాగులు కొట్టిన అశోక్నగర్ చౌరస్తానా? ఎక్కడికైనా నేను రెడీ. మీరొస్తారో, రాహుల్ గాంధీని తెచ్చుకుంటారో మీ ఇష్టం” అంటూ సవాల్ విసిరారు.
వైఫల్యాలను నిరూపించకపోతే రాజకీయ సన్యాసం
ఒకవేళ చర్చా వేదికపై కాంగ్రెస్ ప్రభుత్వ పాలనా వైఫల్యాలను, రైతాంగం పట్ల చూపిస్తున్న నిర్లక్ష్యాన్ని గణాంకాలతో సహా తాను నిరూపించలేకపోతే.. అక్కడికక్కడే తన ఎమ్మెల్యే పదవికి రాజీనామా చేసి, శాశ్వతంగా రాజకీయాల నుంచి తప్పుకుంటానని కేటీఆర్ సంచలన ప్రకటన చేశారు. సవాల్ విసిరి పారిపోయే అలవాటు రేవంత్ రెడ్డిదేనని, ఈసారి ఆయనకు వచ్చే ఎన్నికల్లో కనీసం ప్రతిపక్ష పాత్ర కూడా మిగలదని జోస్యం చెప్పారు.
రూ.200 కోట్లతో కొత్త క్యాంప్ ఆఫీస్.. అర్ధరాత్రి పూజలు
అద్భుతమైన ప్రగతి భవన్ అందుబాటులో ఉంటే.. దాన్ని వదిలేసి ప్రజల సొమ్ము రూ.200 కోట్లతో రేవంత్ రెడ్డి సరికొత్త క్యాంప్ ఆఫీస్ను నిర్మించుకుంటున్నారని కేటీఆర్ ఆరోపించారు. కేవలం దాని కాంపౌండ్ వాల్ నిర్మాణానికే రూ.19 కోట్లు ఖర్చు చేశారని మండిపడ్డారు. ఎలాంటి తప్పు చేయనప్పుడు, ఆ నివాసంలో ముఖ్యమంత్రి తన సతీమణితో కలిసి అర్ధరాత్రి వేళ దొంగచాటుగా పూజలు నిర్వహించాల్సిన అవసరం ఏమొచ్చిందని ప్రశ్నించారు.
హామీల అమలులో దగా.. రూ.29 వేల కోట్ల రుణమాఫీ ఎగవేత
రాష్ట్ర ఖజానాలో డబ్బులు లేవంటూనే కాంగ్రెస్ ప్రభుత్వం రూ.200 కోట్లతో అందాల పోటీలు నిర్వహించిందని కేటీఆర్ దుయ్యబట్టారు. రుణమాఫీ పేరుతో రాష్ట్రంలోని రైతులకు సీఎం రేవంత్ రెడ్డి రూ.29 వేల కోట్లు ఎగ్గొట్టారని, మొత్తం రైతాంగానికి రూ.1.13 లక్షల కోట్ల మేర దగా చేశారని ఆరోపించారు. బీఆర్ఎస్ హయాంలో నెలవారీ ఆదాయం రూ.18,500 కోట్లుగా ఉండేదని, ప్రస్తుతం ఆదాయం వస్తున్నా రైతులకు, విద్యార్థులకు, ప్రభుత్వ ఉద్యోగులకు పైసలు ఇవ్వడం లేదని విమర్శించారు.
Also Read : డెలివరీ బాయ్పై ‘రాజు వెడ్స్ రాంబాయి’ హీరో భౌతిక దాడి: నెట్టింట వైరల్ అవుతోన్న షాకింగ్ వీడియో!
రాహుల్ గాంధీకి రూ.1,000 కోట్ల కప్పం?
తెలంగాణలోని నిరుద్యోగులకు, మహిళలకు, రిటైర్డ్ ఉద్యోగులకు ఇచ్చేందుకు నిధులు లేవంటున్న సీఎం.. దిల్లీ పెద్దలను ప్రసన్నం చేసుకునేందుకు, రాహుల్ గాంధీకి మాత్రం రూ.1,000 కోట్లు ఇస్తానని చెప్తున్నారని కేటీఆర్ ఆరోపించారు. రేవంత్ రెడ్డి మాట్లాడుతున్న తీరు చూస్తుంటే ఆయన మానసిక స్థితి సరిగ్గా లేదనిపిస్తోందని, ఆయనకు ఏమైనా మానసిక జబ్బు ఉందేమోనన్న అనుమానం కలుగుతోందని ఎద్దేవా చేశారు. నిజంగానే సీఎంకు చిత్తశుద్ధి ఉంటే రాష్ట్రంలో మద్యం అమ్మకాలను తక్షణమే నిషేధించాలని డిమాండ్ చేశారు.
రేవంత్ రెడ్డికి భల్లాలదేవుడు, హిట్లర్ గతే!
ముఖ్యమంత్రి కేసీఆర్తో కూర్చుని చర్చిస్తే తన స్థాయి పెరుగుతుందనే ‘ఐడెంటిటీ క్రైసిస్’ (అస్తిత్వ భయం) రేవంత్ రెడ్డిలో స్పష్టంగా కనిపిస్తోందని, అందుకే ప్రతిసారీ కేసీఆర్ పేరును వాడుకుంటున్నారని కేటీఆర్ అన్నారు. రాష్ట్ర ప్రజలంతా కాంగ్రెస్ అరాచక పాలనపై తీవ్ర కోపంతో ఉన్నారని పేర్కొన్నారు. రేవంత్ రెడ్డి అనుసరిస్తున్న తీరు వల్ల భవిష్యత్తులో ఆయనకు ‘బాహుబలి’ సినిమాలో భల్లాలదేవుడికి పట్టిన గతే పడుతుందని, ఆయన ఆదర్శంగా భావించే హిట్లర్ తరహాలోనే రేవంత్ రాజకీయ జీవితానికి ప్రజలు త్వరలోనే ముగింపు పలుకుతారని కేటీఆర్ హెచ్చరించారు.
