SIR : తెలంగాణలో ఓటర్ల జాబితా ప్రత్యేక సమగ్ర సవరణ (SSR/SIR) గడువును పొడిగిస్తూ కేంద్ర ఎన్నికల సంఘం (CEC) బుధవారం కీలక నిర్ణయం తీసుకుంది. తొలుత ప్రకటించిన షెడ్యూల్ ప్రకారం జూన్ 25 నుంచి జూలై 24 వరకు మాత్రమే క్షేత్రస్థాయి పరిశీలన జరగాల్సి ఉండగా, మారిన షెడ్యూల్ ప్రకారం బీఎల్ఓల (BLO) ఇంటింటి సర్వే గడువును ఆగస్టు 3వ తేదీ వరకు పొడిగించారు. ఈ మేరకు సవరించిన ఉత్తర్వులను జారీ చేసిన ఎన్నికల సంఘం.. నూతన షెడ్యూల్ వివరాలను రాష్ట్రవ్యాప్తంగా విస్తృతంగా ప్రచారం చేయాలని , అన్ని రాజకీయ పార్టీలకు లిఖితపూర్వకంగా సమాచారం అందించాలని అధికారులను ఆదేశించింది.
రాష్ట్ర ప్రభుత్వంతో పాటు ప్రధాన రాజకీయ పార్టీల నుంచి వచ్చిన విజ్ఞప్తుల మేరకు కేంద్ర ఎన్నికల సంఘం ఈ నిర్ణయం తీసుకుంది. హైదరాబాద్ ఇన్చార్జ్ మంత్రి పొన్నం ప్రభాకర్, ప్రభుత్వ విప్లు అద్దంకి దయాకర్, బల్మూరి వెంకట్, ఎమ్మెల్యేల బృందం రాష్ట్ర ప్రధాన ఎన్నికల అధికారి (CEO) సుదర్శన్ రెడ్డిని కలిసి గడువు పొడిగించాలని వినతిపత్రం సమర్పించారు. అదేవిధంగా, బీఆర్ఎస్ సర్ కో-ఆర్డినేషన్ కమిటీ సభ్యులు కర్నె ప్రభాకర్, ఎల్. రమణ తదితరులు కూడా సీఈఓను కలిసి ప్రక్రియలో దొర్లుతున్న లోపాలను సరిదిద్ది, ఓటర్లకు తగిన సమయం ఇవ్వాలని కోరారు. ఈ విజ్ఞప్తులపై సానుకూలంగా స్పందించిన ఈసీ గడువును పెంచుతూ షెడ్యూల్ను సవరించింది.
తాజా షెడ్యూల్ ప్రకారం, ఆగస్టు 3న ఇంటింటి సర్వే పూర్తికాగానే.. ఆగస్టు 10వ తేదీన ఓటర్ల ముసాయిదా (డ్రాఫ్ట్) జాబితాను ఎన్నికల సంఘం విడుదల చేయనుంది. ఆ తర్వాత ఆగస్టు 10 నుండి సెప్టెంబర్ 9 వరకు ఓటర్ల నుంచి అభ్యంతరాలు, క్లెయిమ్లను స్వీకరిస్తారు. వీటన్నింటినీ క్షుణ్ణంగా పరిశీలించి, అక్టోబర్ 8వ తేదీ నాటికి అభ్యంతరాలను పూర్తిగా పరిష్కరిస్తారు. అన్ని ప్రక్రియలు ముగిసిన అనంతరం, చివరగా అక్టోబర్ 12వ తేదీన తెలంగాణ ఓటర్ల తుది (ఫైనల్) జాబితాను ఎన్నికల సంఘం అధికారికంగా ప్రచురించనుంది.
Also Read : షాకింగ్ : తెలంగాణలో తగ్గుతున్న ఆడపిల్లలు.. వెయ్యికి 910 మందే!
ఈ సమగ్ర సవరణ ప్రక్రియలో ఓటర్లు కొన్ని నిబంధనలను తప్పనిసరిగా పాటించాల్సి ఉంటుంది. ఓటరు గణన ఫారంలో జనన సంవత్సరం ఆధారంగా అవసరమైన ధ్రువీకరణ పత్రాలను సమర్పించడంతో పాటు కుటుంబ సభ్యుల ఓటరు వివరాలు, ఓటరు గుర్తింపు కార్డు నంబర్, నియోజకవర్గం, భాగం సంఖ్య (Part Number), క్రమ సంఖ్య వంటి సమాచారాన్ని ఖచ్చితంగా నమోదు చేయాలి. ఒకవేళ నిర్ణీత ఫారాలు నింపకపోయినా లేదా నింపిన దరఖాస్తులను బీఎల్ఓలకు అందజేయకపోయినా ఓటరు జాబితాలో ఓటు హక్కు కోల్పోయే ప్రమాదం ఉందని ఎన్నికల సంఘం ముందే హెచ్చరించింది.
అయితే, ఈ ఫారాల నమోదు ప్రక్రియ క్షేత్రస్థాయిలో ఓటర్లకు కొంత గందరగోళాన్ని కలిగిస్తోంది. ముఖ్యంగా పెళ్లికి ముందు, ఆ తర్వాత రెండు వేర్వేరు చోట్ల ఓట్లు ఉన్నవారు ఒకదానిని రద్దు చేసుకోవాల్సి ఉండటం, వివరాల నమోదులో చిన్న తప్పులు దొర్లినా ఓటు ఎక్కడ తొలగిపోతుందోనన్న భయంతో గ్రామీణ ప్రాంతాల వారితో పాటు పట్టణాల్లోని చదువుకున్న వారు కూడా దరఖాస్తులు నింపడానికి సందిగ్ధతకు లోనవుతున్నారు. మరోవైపు, ఈ సాంకేతిక ప్రక్రియపై తమకున్న అనుమానాలను నివృత్తి చేయాలని, పెండింగ్లో ఉన్న ఫిర్యాదులను తక్షణమే పరిష్కరించాలని ప్రతిపక్షాలు డిమాండ్ చేస్తున్నాయి.
ఏది ఏమైనప్పటికీ, గడువు పెంపుతో ఓటర్లకు తమ వివరాలను సరిచూసుకోవడానికి, కొత్త ఓటు నమోదుకు తగిన సమయం లభించినట్లయింది. అర్హులైన ప్రతి ఒక్కరూ ఈ పొడిగించిన గడువును (ఆగస్టు 3) సద్వినియోగం చేసుకుని తమ ఓటు హక్కును భద్రపరుచుకోవాలని అధికారులు సూచిస్తున్నారు. క్షేత్రస్థాయిలో బీఎల్ఓలు ఇంటింటికీ వచ్చినప్పుడు సరైన సమాచారం అందించి, ఓటరు జాబితాలో ఎటువంటి తప్పులు లేకుండా చూసుకోవడం ద్వారా భవిష్యత్తులో ఓటు తొలగింపు సమస్యల నుంచి తప్పించుకోవచ్చు.
Also Read : జూనియర్ ఎన్టీఆర్ రాజకీయ ప్రవేశంపై జోరుగా ప్రచారం: స్పష్టత ఇచ్చిన ఫ్యాన్స్ అసోసియేషన్
