SBI PO Jobs : బ్యాంకు ఉద్యోగాల కోసం ఎదురుచూస్తున్న నిరుద్యోగులకు స్టేట్ బ్యాంక్ ఆఫ్ ఇండియా (SBI) తీపి కబురు అందించింది. దేశంలోనే అతిపెద్ద ప్రభుత్వ రంగ బ్యాంకైన ఎస్బీఐ, ప్రొబేషనరీ ఆఫీసర్స్ (PO) పోస్టుల భర్తీకి సరికొత్త నోటిఫికేషన్ను విడుదల చేసింది. ఈ రిక్రూట్మెంట్ ద్వారా మొత్తం 1,500 పీవో పోస్టులను భర్తీ చేయనున్నారు. ఇందులో 1,446 రెగ్యులర్ పోస్టులు కాగా, మిగిలిన 54 బ్యాక్లాగ్ ఖాళీలుగా ఉన్నాయి. గుర్తింపు పొందిన యూనివర్సిటీ నుండి ఏదైనా డిగ్రీ పూర్తి చేసిన అభ్యర్థులు ఈ ఉద్యోగాలకు దరఖాస్తు చేసుకోవడానికి అర్హులు.
ఈ పోస్టులకు సంబంధించిన ఆన్లైన్ దరఖాస్తుల ప్రక్రియ, ఫీజు చెల్లింపులు నేటి నుంచే (జూన్ 18) ప్రారంభమయ్యాయి. ఆసక్తి గల అభ్యర్థులు జూలై 8వ తేదీ వరకు ఆన్లైన్ ద్వారా దరఖాస్తు చేసుకోవచ్చు. అభ్యర్థుల వయోపరిమితి విషయానికి వస్తే.. 2026 ఏప్రిల్ 1 నాటికి కనీసం 21 ఏళ్లు నిండి ఉండాలి, అలాగే 30 ఏళ్లు మించకూడదు. అయితే, ప్రభుత్వ నిబంధనల ప్రకారం వివిధ కేటగిరీల (ఎస్సీ, ఎస్టీ, ఓబీసీ, దివ్యాంగులు) అభ్యర్థులకు గరిష్ట వయోపరిమితిలో సడలింపులు ఉంటాయి. అర్హులైన ఎస్సీ, ఎస్టీ, ఓబీసీ మరియు దివ్యాంగ అభ్యర్థుల కోసం జూలై నెలలో ప్రత్యేకంగా ‘ప్రీ ఎగ్జామినేషన్ ట్రైనింగ్’ కూడా నిర్వహించనున్నారు.
ఈ ఎంపిక ప్రక్రియ మొత్తం మూడు దశల్లో అత్యంత పారదర్శకంగా సాగనుంది. మొదటి దశ (ఫేజ్-1)లో భాగంగా ఆగస్టు నెలలో ఆన్లైన్ ప్రిలిమినరీ పరీక్షను నిర్వహిస్తారు. దీనికి సంబంధించిన కాల్ లెటర్లను జూలై రెండు లేదా మూడో వారంలో డౌన్లోడ్ చేసుకోవచ్చు. ప్రిలిమ్స్లో అర్హత సాధించిన వారికి సెప్టెంబర్ నెలలో రెండవ దశ (ఫేజ్-2) కింద ఆన్లైన్ మెయిన్ పరీక్ష ఉంటుంది. చివరిగా మూడవ దశ (ఫేజ్-3)లో అక్టోబర్ లేదా నవంబర్ నెలల్లో సైకోమెట్రిక్ పరీక్ష మరియు గ్రూప్ ఇంటర్వ్యూలను నిర్వహించి అభ్యర్థులను తుది ఎంపిక చేస్తారు.
ఎస్బీఐ పీవో పోస్టులకు ఎంపికయ్యే అభ్యర్థులకు ఆకర్షణీయమైన జీతభత్యాలు లభిస్తాయి. ప్రారంభంలోనే అభ్యర్థుల మూల వేతనం (Basic Pay) రూ. 48,480 గా ఉంటుంది. దీనికి తోడుగా బ్యాంక్ అందించే అన్ని రకాల అలవెన్సులు, ఇతర ప్రయోజనాలు కలుపుకుంటే అభ్యర్థి వార్షిక ప్యాకేజీ (CTC) సుమారుగా రూ. 20 లక్షల నుండి రూ. 21.91 లక్షల వరకు అందుతుంది. ఈ రిక్రూట్మెంట్కు సంబంధించిన పరీక్షా విధానం, మార్కుల కేటాయింపు, పరీక్షా కేంద్రాల జాబితా వంటి పూర్తి వివరాల కోసం అభ్యర్థులు అధికారిక నోటిఫికేషన్ను పరిశీలించవచ్చు.
