AI Voice Cloning
AI Voice Cloning

ప్రపంచ వ్యాప్తంగా టెక్నాలజీ పెరిగేకొద్దీ సైబర్ కేటుగాళ్లు కొత్త దారుల్లో రకరకాల మోసాలకు పాల్పడుతున్నారు. అందులోనూ AI టెక్నాలజీని వాడుకుంటూ ప్రజల సొమ్మును దోచుకుంటున్నారు. ఈ ఏఐ టెక్నాలజీలో ముఖ్యంగా ‘ఏఐ వాయిస్ క్లోనింగ్’ (AI Voice Cloning) అనేది పెద్ద సమస్యగా మారింది. దీనిపట్ల ప్రజలు అత్యంత జాగ్రత్తగా, దూరంగా ఉండాలని భారత ప్రభుత్వ కమ్యూనికేషన్ల శాఖ (DoT) భద్రతా హెచ్చరికలు జారీ చేసింది.

సైబర్ నేరగాళ్లు ఈ AI Voice Cloningను ఉపయోగించి తెలిసిన వ్యక్తుల మాదిరిగానే మాట్లాడి డబ్బులు గుంజేస్తున్నట్లు DoT తెలిపింది. మనకు ఎంతో సుపరిచితమైన, మన కనుసన్నల్లో ఉండే సొంత మనుషుల గొంతులతోనే ఫోన్లు చేసి డబ్బులు లాగేస్తున్నట్లు గుర్తించింది.

గొంతు మార్చే ఏఐ మాయాజాలం

సైబర్ నేరగాళ్లు ముందుగా.. సోషల్ మీడియా ప్లాట్ ఫార్మ్‌లలో లభించే చిన్న చిన్న ఆడియోలు, వీడియో క్లిప్‌ల ఆధారంగా తల్లిదండ్రులు, పిల్లలు, దగ్గరి బంధువులు, క్లోజ్ ఫ్రెండ్స్ వాయిస్‌లను ఈ ఏఐ సాయంతో అచ్చం అద్దుగుద్దినట్లు అలానే క్రియేట్ చేస్తున్నారు. దీని తర్వాత గుర్తుతెలియని ఫోన్ నెంబర్ నుంచి కాల్ చేసి.. తెలిసిన వ్యక్తి వాయిస్‌గా మార్చి మాట్లాడుతున్నారు. వాయిస్ కూడా అచ్చం అలానే ఉండటంతో.. వారిపని ఇంకాస్త సులువు అవుతుంది.

అక్కడ నుంచి కేటుగాళ్లు తమ నాటకం మొదలుపెడతున్నారు. రకరకాల డ్రామాలు ఆడుతున్నారు. ‘‘నాకు యాక్సెడెంట్ జరిగింది. వెంటనే హాస్పిటల్‌కు డబ్బులు కట్టాలి’’.. ‘‘నన్ను పోలీసులు పట్టుకున్నారు, అర్జెంట్‌గా కొంత అమౌంట్ పంపకపోతే జైల్లో పెడతారు’’.. ‘‘నేను పెద్ద ప్రమాదంలో ఉన్నాను.. వెంటనే ఈ UPI నంబర్‌కు డబ్బులు పంపించు’’ అంటూ ఎమర్జెన్సీ పరిస్థితులను క్రియేట్ చేసి ఒత్తిడికి గురిచేస్తారు. అవతల వ్యక్తి ఆలోచించే టైం కూడా ఇవ్వకుండా వేలల్లో లేదా లక్షల్లో డబ్బును నిమిషాల వ్యవధిలో గుంజేస్తున్నారు.

DoT వీడియో కోసం క్లిక్ చేయండి

ఈ సంకేతాలు ఉంటే జాగ్రత్త..!

తెలిసిన వ్యక్తి గొంతుతో కొత్త నంబర్ల నుంచి ఫోన్ కాల్ వస్తే కాసేపు ఆలోచించండి.

ఎమర్జెన్సీ అని చెప్పి క్షణాల్లో డబ్బులు పంపించమని ఒత్తిడి తెస్తే అనుమానించండి.

మీకు అకౌంట్ లేదా కొత్త యూపీఐకు డబ్బు పంపమని కోరితే అస్సలు నమ్మకండి.

తెలియని నంబర్ నుండి ఆపదలో ఉన్నామని కాల్ వస్తే వెంటనే ఆ కాల్‌ను కట్ చేయండి. వెనువెంటనే మీ ఫోన్‌లో ఉన్న వారి అసలు నంబర్‌కు కాల్ చేసి కన్ఫార్మ్ చేసుకోండి.

ఒకవేళ ఆ వ్యక్తి ఫోన్ కలవకపోతే.. వారి స్నేహితులు లేదా కుటుంబ సభ్యులకు ఫోన్ చేసి తెలుసుకోండి.

ఎలాంటి కన్ఫర్మేషన్ లేకుండా ఎవరి అకౌంట్‌కు లేదా యూపీఐకు డబ్బులు ట్రాన్సఫర్ చేయొద్దు.

ఇలాంటి ఏఐ వాయిస్ స్కామ్‌కు గురైనా లేదా అనుమానాస్పద కాల్స్ వచ్చినా వెంటనే 1930 కి కాల్ చేయండి.