
ప్రస్తుతం అమెరికా, ఇజ్రాయెల్ దేశాలు తీవ్రమైన రాజకీయ సంక్షోభం ఎదుర్కొంటున్నప్పటికీ, ఇరాన్పై తమ వ్యూహాలకు పదును పెడుతున్నాయి. తాజా నివేదికల ప్రకారం, ఇజ్రాయెల్ నిఘా సంస్థ మొస్సాద్ డైరెక్టర్ రోమన్ గోఫ్మన్ రహస్యంగా వాషింగ్టన్, డి.సి.కి చేరుకున్నారు. అక్కడ ఆయన CIA డైరెక్టర్ జాన్ రాట్క్లిఫ్తో వరుస సీక్రెట్ మీటింగ్స్ నిర్వహిస్తున్నారు. అంతేకాకుండా, వైట్ హౌస్ ప్రత్యేక రాయబారి స్టీవ్ విట్కాఫ్ను కలిసేందుకు మయామి వెళ్లే ప్లాన్లో కూడా ఉన్నారు.
ఈ హై-ప్రొఫైల్ భేటీలపై అధికారిక ప్రకటనలు లేకపోయినా, అంతర్జాతీయ రాజకీయాల్లో ఇవి హాట్ టాపిక్గా మారాయి. ఇరాన్పై తదుపరి యాక్షన్ విషయంలో వాషింగ్టన్, టెల్ అవీవ్ మధ్య భిన్నాభిప్రాయాలు ఉన్నాయని సమాచారం. ఇజ్రాయెల్ ప్రధాని బెంజమిన్ నెతన్యాహు ఇరాన్పై డైరెక్ట్ మిలిటరీ అటాక్ చేయాలని చూస్తుండగా, అమెరికా అధ్యక్షుడు డొనాల్డ్ ట్రంప్ మాత్రం ఇందుకు భిన్నంగా ఆలోచిస్తున్నారు. సౌదీ అరేబియా, ఖతార్, యూఏఈ, బహ్రెయిన్ వంటి గల్ఫ్ దేశాల సలహా మేరకు, యుద్ధానికి బదులుగా ఆర్థిక ఆంక్షలు, నావికా దిగ్బంధనం ద్వారా ఇరాన్పై ఒత్తిడి పెంచాలని ట్రంప్ భావిస్తున్నారు. ఈ విషయాన్ని ట్రంప్ స్వయంగా ఒక ఇంటర్వ్యూలో వెల్లడిస్తూ, గల్ఫ్ దేశాల అభ్యర్థన మేరకే శాంతియుత మార్గాన్ని ఎంచుకున్నామని పేర్కొన్నారు.
మరోవైపు, ఇజ్రాయెల్లో నెతన్యాహు ప్రభుత్వం మెజారిటీ కోల్పోయి ఇబ్బందుల్లో పడింది. ప్రతిపక్ష నేత గాడి ఐసెన్కోట్ కొత్త ప్రభుత్వం ఏర్పాటు చేసేందుకు సిద్ధమవుతున్నారు. తన కుర్చీని కాపాడుకునేందుకు నెతన్యాహు ఇరాన్పై ఆకస్మిక దాడికి దిగవచ్చని ఇజ్రాయెల్ ప్రతిపక్షాలు ఆందోళన వ్యక్తం చేస్తున్నాయి. సున్నితమైన భద్రతా అంశాలను రాజకీయ లబ్ధి కోసం వాడుకోవద్దని ఐసెన్కోట్ ఇప్పటికే నెతన్యాహును హెచ్చరించారు. ఏదేమైనా, మొస్సాద్-సీఐఏ రహస్య మంతనాలు మధ్యప్రాచ్యంలో ఏ క్షణంలోనైనా పెను మార్పులకు దారితీసే అవకాశం ఉందని విశ్లేషకులు భావిస్తున్నారు.









