
టెక్ ప్రపంచంలో లేఆఫ్స్ పరంపర ఇప్పట్లో ఆగేలా కనిపించడం లేదు. ప్రముఖ గ్లోబల్ చిప్ మేకర్ క్వాల్కామ్ తాజాగా ప్రపంచవ్యాప్తంగా భారీ సంఖ్యలో ఉద్యోగులను తొలగించేందుకు సిద్ధమైంది. సంస్థ మొత్తం 52 వేల మంది సిబ్బందిలో దాదాపు 7 శాతం మందిని అంటే సుమారు 3,600 మందిని తొలగించనున్నట్లు సమాచారం. ఇందులో భాగంగా ఒక్క భారత్లోనే దాదాపు 1,000 మంది ఉద్యోగులపై వేటు పడే అవకాశం ఉంది.
బెంగళూరు, హైదరాబాద్, చెన్నై, ఢిల్లీ-ఎన్సీఆర్ రీజినల్ ఆఫీసుల్లో పనిచేసే ఇంజనీర్లు ఈ తొలగింపుల ప్రభావానికి గురవుతున్నారు. లేఆఫ్కు గురైన వారికి మూడు నెలల బేసిక్ శాలరీతో పాటు, పనిచేసిన ప్రతి సంవత్సరానికి అదనంగా ఒక నెల జీతాన్ని సెవరెన్స్ ప్యాకేజ్గా ఇవ్వనున్నట్లు ఉద్యోగుల మధ్య చర్చ నడుస్తోంది. రెండు మూడు రోజుల్లోనే పేపర్లపై సైన్ చేస్తే మరో నెల జీతం బోనస్గా ఇస్తామని కంపెనీ ఆఫర్ చేసినట్లు తెలుస్తోంది.
ఐఐటీ టాపర్లకూ తప్పని తిప్పలు
టెక్ రంగంలో నెలకొన్న అభద్రతా భావానికి నిదర్శనంగా ఓ ఉదంతం నెట్టింట వైరల్గా మారింది. గేట్ (GATE) పరీక్షలో 1100 ర్యాంక్ సాధించి, ఐఐటీ హైదరాబాద్లో VLSI స్పెషలైజేషన్తో ఎంటెక్ పూర్తి చేసిన ఓ యువకుడికి క్వాల్కామ్లో రూ.26 లక్షల భారీ వార్షిక ప్యాకేజీతో జాబ్ వచ్చింది. అయితే తాజా లేఆఫ్స్లో అతను ఉద్యోగం కోల్పోయిన విషయాన్ని స్నేహితుడు వికాస్ ‘ఎక్స్’ వేదికగా పంచుకోవడంతో టెక్ సర్కిల్స్లో తీవ్ర చర్చ మొదలైంది. ప్రతిష్టాత్మక విద్యాసంస్థల నుంచి డిగ్రీలు, లక్షల ప్యాకేజీలు ఉన్నప్పటికీ ఉద్యోగ భద్రత గాల్లో దీపంలా మారిందని నెటిజన్లు ఆవేదన వ్యక్తం చేస్తున్నారు.
ఈ తొలగింపులు వ్యక్తిగత పెర్ఫార్మెన్స్ వల్ల కాదని, బిజినెస్ రీస్ట్రక్చరింగ్, ఖర్చుల తగ్గింపు, AI, డేటా సెంటర్లు వంటి కొత్త రంగాల్లో పెట్టుబడుల కోసమేనని అంతర్గతంగా ప్రచారం జరుగుతోంది. Layoffs.fyi నివేదిక ప్రకారం ఈ ఏడాది ఇప్పటికే 350కి పైగా కంపెనీల్లో 1.42 లక్షల మందికి పైగా రోడ్డున పడ్డారు. భారత్లో క్వాల్కామ్కు 20 వేల మంది ఉద్యోగులు ఉండగా, రాబోయే రోజుల్లో మరిన్ని కోతలు ఉండవచ్చనే వార్తలు టెక్కీలను తీవ్ర ఆందోళనకు గురిచేస్తున్నాయి.









