Karnataka : కర్ణాటకలో దారుణ ఘటన చోటుచేసుకుంది. పూర్వీకుల ఆస్తి విషయంలో కొంతకాలంగా కుటుంబ సభ్యుల మధ్య గొడవలు జరుగుతున్నాయి. ఈ గొడవ చివరకు ఇద్దరి ప్రాణాలను బలిగొంది. బెలగావి జిల్లాలో ఓ మాజీ సైనికుడు, ఆయన కూతురిని బంధువులు పంచాయతీ కార్యాలయంలోనే దారుణంగా హత్య చేసినట్లు పోలీసులు అనుమానిస్తున్నారు. మృతులను ధార్వాడకు చెందిన 67 ఏళ్ల రుద్రప్ప కుందరగి, ఆయన 26 ఏళ్ల కూతురు శశికళ కుందరగిగా గుర్తించారు. రుద్రప్ప స్వస్థలం అవరాడి గ్రామం. ఆయన గతంలో ఆర్మీలో పనిచేశారు. ఆ తర్వాత ధార్వాడలో స్థిరపడ్డారు. బుధవారం మధ్యాహ్నం అవరాడి గ్రామంలోని గ్రామ పంచాయతీ కార్యాలయంలో ఈ ఘటన జరిగింది. ఆస్తికి సంబంధించిన కొన్ని పత్రాల పని కోసం రుద్రప్ప అక్కడికి వెళ్లారు. ఆయనతో పాటు కూతురు శశికళ కూడా వెళ్లింది.
Also Read : నానక్‌రామ్‌గూడ లో భూకబ్జా యత్నం.. బన్నీ మామపై కేసు నమోదు
అక్కడే రుద్రప్ప సోదరులు సంగప్ప కుందరగి, బసప్ప కుందరగి, బసప్ప కుమారుడు మడివాళప్ప కుందరగి ఆయనపై దాడి చేసినట్లు పోలీసులు తెలిపారు. నిందితులు కొడవళ్లతో రుద్రప్పపై దాడి చేసినట్లు అనుమానిస్తున్నారు. తండ్రిపై దాడి జరగడాన్ని చూసిన శశికళ అడ్డుకునేందుకు ప్రయత్నించింది. ఈ సమయంలో ఆమెపైనా దాడి చేసినట్లు పోలీసులు తెలిపారు. అంతేకాకుండా ఆమె తలపై రాయితో కొట్టినట్లు చెప్పారు. తీవ్ర గాయాలతో తండ్రి, కూతురు ఇద్దరూ అక్కడికక్కడే మృతి చెందినట్లు పోలీసులు తెలిపారు. ఈ దాడి జరిగిన సమయంలో పంచాయతీ కార్యాలయంలో పంచాయతీ డెవలప్‌మెంట్ ఆఫీసర్‌తో పాటు మరికొందరు సిబ్బంది ఉన్నారు. వారు ఘటనను ప్రత్యక్షంగా చూశారు. కొందరు తమ ఫోన్లలో దాడికి సంబంధించిన వీడియోలను కూడా రికార్డు చేసినట్లు పోలీసులు తెలిపారు. ఈ వీడియోలను కేసులో ఆధారాలుగా పరిశీలిస్తున్నారు.
ఈ ఘటనలో రుద్రప్ప కారు డ్రైవర్ కూడా తీవ్రంగా గాయపడ్డాడు. అతడిని స్థానిక ఆసుపత్రికి తరలించి చికిత్స అందిస్తున్నారు. మరోవైపు శశికళ స్నేహితుడు రాహుల్‌పైనా దాడి జరిగినట్లు సమాచారం. ధార్వాడలోని శివగిరికి చెందిన రాహుల్ తీవ్రంగా గాయపడటంతో ధార్వాడ జిల్లా ఆసుపత్రికి తరలించారు.
ఈ హత్యలకు పూర్వీకుల వ్యవసాయ భూమికి సంబంధించిన గొడవే కారణమై ఉండొచ్చని పోలీసులు అనుమానిస్తున్నారు. కుటుంబానికి చెందిన మొత్తం 38 గుంటల భూమి విషయంలో కొంతకాలంగా వివాదం నడుస్తోంది. ఈ భూమిని కుటుంబంలోని ముగ్గురికి పంచాలని గతంలో కోర్టు ఆదేశాలు ఇచ్చింది. అందులో రుద్రప్పకు వచ్చిన వాటాను ఆయన అమ్ముకున్నట్లు పోలీసులు తెలిపారు. అయితే మిగిలిన భూమిలో కూడా తనకు వాటా ఉందని రుద్రప్ప చెప్పడంతో సోదరుల మధ్య గొడవ కొనసాగినట్లు తెలుస్తోంది. ఈ వివాదానికి సంబంధించి రుద్రప్పకు అనుకూలంగా కోర్టు ఆదేశాలు వచ్చినట్లు బెలగావి ఎస్పీ కే. రామరాజన్ తెలిపారు. ఆ ఆదేశాలను అమలు చేయించుకునేందుకు రుద్రప్ప గ్రామ పంచాయతీ కార్యాలయానికి వెళ్లారు.
కోర్టు ఆదేశాల ప్రకారం రెవెన్యూ రికార్డుల్లో తన పేరు నమోదు చేయాలని దరఖాస్తు చేసుకున్నారు. దానికి సంబంధించిన పరిశీలన, ధ్రువీకరణ కోసం పంచాయతీ కార్యాలయానికి వచ్చినట్లు పోలీసులు తెలిపారు. కోర్టు ఆదేశాలు అమలైతే ఆస్తి రుద్రప్పకు వెళ్లిపోతుందని ఆయన సోదరులు భయపడ్డారని పోలీసులు అనుమానిస్తున్నారు. ఈ కారణంగానే రుద్రప్పపై దాడి చేసి ఉండొచ్చని పోలీసులు చెబుతున్నారు.
Also Read : పాక్ లో దురంధర్ తరహా హత్యలు? ఉగ్రవాదులే టార్గెట్ గా అదృశ్యశక్తుల ఫైరింగ్
