Fire accident : నల్గొండ జిల్లా నార్కట్పల్లి మండలంలోని ప్రముఖ పుణ్యక్షేత్రం చెర్వుగట్టు శ్రీ పార్వతీ జడల రామలింగేశ్వర స్వామివారి గుట్ట కింద ఆదివారం తెల్లవారుజామున (అర్ధరాత్రి వేళ) భారీ అగ్నిప్రమాదం సంభవించింది. గుట్ట కింద ఉన్న గ్రామ పంచాయతీ కార్యాలయం సమీపంలోని ఒక బొమ్మల దుకాణంలో మొదలైన మంటలు కొద్ది నిమిషాల్లోనే ఉద్ధృతంగా మారి పక్కనే ఉన్న ఇతర దుకాణాలకు శరవేగంగా వ్యాపించాయి. ఈ ఆకస్మిక ఘటనతో ఆ ప్రాంతమంతా దట్టమైన పొగ, ఎగసిపడే మంటలతో తీవ్ర కలకలం రేగింది.
ప్రమాద తీవ్రత పెరుగుతున్న క్రమంలో దుకాణాల్లో ఉన్న రెండు గ్యాస్ సిలిండర్లు ఒకదాని తర్వాత ఒకటి పేలిపోవడంతో మంటలు మరింత రౌద్రరూపం దాల్చాయి. పేలుళ్ల ధాటికి పెద్ద ఎత్తున శబ్దాలు రావడంతో స్థానికులు భయాందోళనకు గురై ఇళ్ల నుంచి బయటకు పరుగులు తీశారు. ఈ క్రమంలో మంటలు సమీపంలోని గ్రామ పంచాయతీ కార్యాలయానికి కూడా వ్యాపించడంతో, కార్యాలయంలో భద్రపరిచిన పలు కీలకమైన ప్రభుత్వ దస్త్రాలు, రికార్డులు కాలి బూడిదయ్యాయి.
సమాచారం అందుకున్న అగ్నిమాపక సిబ్బంది తక్షణమే ఘటనా స్థలానికి చేరుకుని 3 ఫైర్ ఇంజిన్ల సాయంతో మంటలను అదుపులోకి తెచ్చేందుకు శ్రమించారు. పోలీసులు, స్థానిక గ్రామస్థులు సహాయక చర్యల్లో పాలుపంచుకున్నారు. ప్రమాద సమయంలో దుకాణాల్లో ఎవరూ లేకపోవడం, వ్యాపారులు వెంటనే బయటకు రావడంతో అదృష్టవశాత్తూ ఎలాంటి ప్రాణనష్టం జరగలేదు. అయితే ఈ అగ్నికీలల్లో 17 శాశ్వత దుకాణాలు, 15 తోపుడు బండ్లు పూర్తిగా దగ్ధమయ్యాయి.
ఈ ఘోర ప్రమాదంలో దుకాణాల్లోని సరుకులు, ఫర్నిచర్, ఇతర విలువైన సామగ్రి కాలిపోవడంతో సుమారు రూ.2.5 కోట్ల మేర ఆస్తి నష్టం వాటిల్లిందని స్థానిక గ్రామ పంచాయతీ సర్పంచ్ తెలిపారు. ప్రమాదానికి గల ఖచ్చితమైన కారణాలు ఇంకా తెలియరాలేదని, షార్ట్ సర్క్యూట్ లేదా ఇతర ఏవైనా కారణాలు ఉన్నాయా అనే కోణంలో పోలీసులు, అధికారులు విచారణ వేగవంతం చేశారు. ఉపాధి కోల్పోయిన బాధితులను ప్రభుత్వం ఆదుకోవాలని స్థానికులు కోరుతున్నారు.
