Mojtaba Khamenei : అమెరికా అధ్యక్షుడు డొనాల్డ్ ట్రంప్ వైఖరిపై ఇరాన్ సుప్రీం లీడర్ అయాతొల్లా మొజ్తబా ఖమేనీ తీవ్రస్థాయిలో విరుచుకుపడ్డారు. అమెరికా అధ్యక్షుడి సంతకానికి కనీస విలువ కూడా లేదంటూ ఆయన ఘాటుగా ఎద్దేవా చేశారు. ఇటీవల ఇరాన్, అమెరికా దేశాల మధ్య కుదిరిన తాత్కాలిక శాంతి అవగాహన ఒప్పందాన్ని (MoU) అమెరికానే స్వయంగా ఉల్లంఘించిందని ఆయన విమర్శించారు. వాషింగ్టన్ తీసుకున్న ఏకపక్ష నిర్ణయాలు, ఒప్పంద ఉల్లంఘనల నేపథ్యంలో… ట్రంప్ సంతకం కేవలం కాగితాలకే పరిమితమని, దానికి ఎలాంటి విశ్వసనీయత లేదనే విషయం మరోసారి రుజువైందంటూ సెటైర్లు వేశారు. ఇరాన్ ప్రజలను ఉద్దేశించి తాజాగా విడుదల చేసిన ఒక ప్రత్యేక సందేశంలో ఖమేనీ ఈ సంచలన వ్యాఖ్యలు చేశారు.
ఒప్పందాన్ని తుంగలో తొక్కిన అమెరికా
ఈ ఏడాది జూన్ 18న ఇరాన్ అధ్యక్షుడు మసూద్ పెజెష్కియన్, అమెరికా అధ్యక్షుడు డొనాల్డ్ ట్రంప్ మధ్య ఒక చారిత్రాత్మక తాత్కాలిక శాంతి అవగాహన ఒప్పందం కుదిరింది. అయితే ఈ ఒప్పందాన్ని అమెరికా పదేపదే ఉల్లంఘిస్తోందని మొజ్తబా ఖమేనీ తీవ్ర ఆరోపణలు చేశారు. ఈ చర్యతో అమెరికా అసలు స్వరూపం, నమ్మకద్రోహ వైఖరి ప్రపంచానికి మరోసారి బహిర్గతమయ్యాయని పేర్కొన్నారు. ఇచ్చిన మాటను నిలబెట్టుకోకపోవడం, అంతర్జాతీయ ఒప్పందాలను బేఖాతరు చేయడం అమెరికాకు అలవాటుగా మారిందని ధ్వజమెత్తారు. ఒకవేళ అమెరికా తన యుద్ధోన్మాదాన్ని ఇలాగే కొనసాగిస్తూ, ఇరాన్ను లొంగదీసుకోవడానికి మరిన్ని ఒత్తిళ్లు తీసుకురావాలని ప్రయత్నిస్తే… ఆ దేశానికి ఎప్పటికీ మరచిపోలేని గుణపాఠం నేర్పుతామని ఖమేనీ హెచ్చరించారు. తమ రక్షణ బలగాలతో పాటు ప్రాంతీయ ‘రెసిస్టెన్స్ ఫోర్సెస్’ (ప్రాతినిధ్య బలగాలు) అండతో అమెరికాకు తగిన రీతిలో బుద్ధి చెబుతామని స్పష్టం చేశారు.
ముదిరిన ఉద్రిక్తతలు.. నిలిచిపోయిన చర్చలు
నిజానికి ఇరుదేశాల మధ్య కుదిరిన ఈ తాత్కాలిక ఒప్పందం ప్రకారం.. ఒప్పందం జరిగిన 60 రోజుల్లోగా ఉభయ పక్షాలు తుది శాంతి ఒప్పందంపై చర్చలు జరిపి ఒక నిర్ణయానికి రావలసి ఉంది. కానీ, ఈ గడువు ముగిసేలోపే గల్ఫ్ ప్రాంతంలో పరిస్థితులు తలకిందులయ్యాయి. ఇటీవల ఇరాన్ లక్ష్యాలపై అమెరికా సైన్యం వరుస దాడులకు తెగబడింది. దీనికి ప్రతిచర్యగా ఇరాన్ సైన్యం కూడా గల్ఫ్ రీజియన్లో ఉన్న అమెరికా సైనిక స్థావరాలపై క్షిపణులు, ఆత్మహుతి డ్రోన్లతో విరుచుకుపడింది. ఈ పరస్పర దాడులతో పశ్చిమాసియాలో యుద్ధ మేఘాలు కమ్ముకున్నాయి.
అమెరికా ఇప్పటికే శాంతి నిబంధనలను ఉల్లంఘించినందున, తాము కూడా ఈ అవగాహన ఒప్పందం (MoU) కింద ఉన్న నియమాల అమలును పూర్తిగా నిలిపివేసినట్లు ఇరాన్ ఉప విదేశాంగ మంత్రి కాజెమ్ ఘరీబాబాది అధికారికంగా ప్రకటించారు. ప్రస్తుత తరుణంలో తమకు దేశ రక్షణే అత్యంత ప్రాధాన్యత అని, అమెరికాతో చర్చలు జరిపే ప్రసక్తే లేదని, ప్రస్తుతానికి ఎలాంటి చర్చల ప్రక్రియ కొనసాగడం లేదని ఇరాన్ ప్రభుత్వ టెలివిజన్కు ఇచ్చిన ఇంటర్వ్యూలో ఆయన తేల్చి చెప్పారు. ఈ పరిణామాలతో ఇరు దేశాల మధ్య దౌత్యపరమైన బంధం మరింత సంక్షోభంలో పడినట్లయింది.
