
చైనాకు చెందిన ప్రముఖ ఎలక్ట్రిక్ కార్ల తయారీ కంపెనీ BYDకు భారత మార్కెట్లో సూపర్ క్రేజ్ ఉంది. చాలా ప్రాంతాల్లో ఈ BYD కార్లు రయ్ రయ్ మంటూ చక్కర్లు కొడుతున్నాయి. క్లాసిక్ ఇంటీరియర్, లగ్జరీ లుక్, అద్భుతమైన ఫీచర్లు వాహన ప్రియులను విశేషంగా ఆకట్టుకుంటున్నాయి. ఈ క్రమంలోనే కంపెనీ తన లైనప్లో ఉన్న మరొక లగ్జరీ బ్రాండ్ ‘డెంజా’ (Denza)ను భారత మార్కెట్లో విడుదల చేసింది. ఈ బ్రాండ్లో రెండు మోడళ్లను పరిచయం చేసింది. వాటిలో డెంజా D9 (Denza D9) ఎలక్ట్రిక్ MPV, డెంజా Z9 GT షూటింగ్ బ్రేక్ అనేవి ఉన్నాయి.
అందులో Denza D9 మోడల్ ధర, ఫీచర్ల విషయానికొస్తే.. ఇది 7-సీటర్ లగ్జరీ ఎలక్ట్రిక్ కారు. ఈ డెంజా D9 ఎక్స్-షోరూమ్ ధరను కంపెనీ రూ. 90 లక్షలుగా నిర్ణయించింది. ఈ మోడల్ లుక్ పరంగానే కాకుండా పనితీరులోనూ అద్భుతంగా ఉంటుందని కంపెనీ చెబుతోంది. ఇందులో BYDకి చెందిన సెకండ్ జనరేషన్ 115.07 kWh బ్లేడ్ LFP బ్యాటరీని అందించారు. ఈ భారీ బ్యాటరీని ఒక్కసారి పూర్తిగా ఛార్జ్ చేస్తే.. ఏకంగా 608 కిలోమీటర్ల వరకు మైలేజ్ ఇస్తుందని కంపెనీ తెలిపింది. ముందు భాగంలో అమర్చిన పర్మనెంట్ మాగ్నెట్ సింక్రోనస్ ఎలక్ట్రిక్ మోటార్ ఉంది. ఇది 462.2bhp గరిష్ట శక్తిని, 365Nm గరిష్ట టార్క్ను ప్రొడ్యూస్ చేస్తుంది. ఇది ఫ్రంట్-వీల్ డ్రైవ్ (FWD) సిస్టమ్ను కలిగి ఉంది. కేవలం 8.5 సెకన్లలోనే సున్నా నుండి 100 కిలోమీటర్ల వేగాన్ని అందుకోగలదు.
ఛార్జింగ్ ఆప్షన్లలో 11kW AC త్రీ-ఫేజ్ ఛార్జింగ్తో పాటు దీనికి అత్యంత వేగవంతమైన DC ఫాస్ట్ ఛార్జింగ్ సపోర్ట్ అందించారు. ఫాస్ట్ ఛార్జర్ సాయంతో బ్యాటరీని కేవలం 9 నిమిషాల్లోనే 10 శాతం నుండి 97 శాతం వరకు ఛార్జింగ్ చేసుకోవచ్చు. అలాగే ఇందులో మరెన్నో అద్భుతమైన ఫీచర్లు అందించారు.
ఈ కార్లో మొత్తం 7 మంది (2+2+3 లేఅవుట్) ప్రయాణించగలరు. లోపలి భాగం ఒక ఫైవ్ స్టార్ హోటల్ రూమ్లా ఉంటుంది. ముఖ్యంగా రెండో రోలో కూర్చునే ప్రయాణికుల కోసం ప్రత్యేకమైన కెప్టెన్ సీట్లు అందించారు. ఈ సీట్లకు 10 రకాలుగా సర్దుబాటు చేసుకునే పవర్ అడ్జస్ట్మెంట్, 10-పాయింట్ల మసాజ్ ఫంక్షన్, హీటింగ్, వెంటిలేషన్, మెమరీ ఫంక్షన్తో పాటు కాళ్లు చాపుకోవడానికి పవర్ అడ్జస్టబుల్ లెగ్ రెస్ట్ కూడా ఉన్నాయి. ముందు వరుస సీట్లకు కూడా మసాజ్, హీటింగ్, వెంటిలేషన్ వంటి సదుపాయాలు కల్పించారు.
.@BYDCompany luxury brand DENZA has launched the D9 electric MPV in India at Rs 90 lakh (ex-showroom). It gets a 115.07 kWh battery, claimed NEDC range of 730 km, zero-gravity captain seats and a 16-speaker Devialet audio system. Your thoughts?
#DENZA #DENZAD9 #BYDIndia https://t.co/zbysKynuRj
— Motoring World (@MyMotoringWorld) November 13, 2026
డ్యాష్బోర్డ్పై 15.6 అంగుళాల పెద్ద ఫ్లోటింగ్ టచ్స్క్రీన్, డ్రైవర్ కోసం 10.25 అంగుళాల డిజిటల్ ఇన్స్ట్రుమెంట్ క్లస్టర్ ఉన్నాయి. వెనుక సీట్లలో కూర్చునే వారి కోసం ఆర్మ్రెస్ట్లపై ప్రత్యేక స్క్రీన్లు ఇచ్చారు. కారులో థియేటర్ అనుభూతిని ఇచ్చేందుకు 16 స్పీకర్లతో కూడిన ప్రీమియం Devialet ఆడియో సిస్టమ్ అందించారు. అంతేకాకుండా కారులోనే చిన్నపాటి ఫ్రిజ్, త్రీ-జోన్ ఆటోమేటిక్ క్లైమేట్ కంట్రోల్, ఆకాశాన్ని చూస్తూ ప్రయాణించేందుకు 1.1 చదరపు మీటర్ల పెద్ద పనోరమిక్ గ్లాస్ రూఫ్, మల్టీ-కలర్ యాంబియంట్ లైటింగ్ వంటి ఫీచర్లు ఉన్నాయి.
సేఫ్టీ విషయానికొస్తే.. ఇందులో మొత్తం 9 ఎయిర్బ్యాగ్లు ఉన్నాయి. ఇది మాత్రమే కాకుండా అడాప్టివ్ క్రూయిజ్ కంట్రోల్, ప్రమాదాన్ని ముందే పసిగట్టి బ్రేకులు వేసే ఆటోమేటిక్ ఎమర్జెన్సీ బ్రేకింగ్, బ్లైండ్ స్పాట్ డిటెక్షన్, లేన్ కీపింగ్ అసిస్ట్ వంటి ఫీచర్లు అందించారు. మొత్తంగా లగ్జరీ, స్పీడ్ కోరుకునే కుబేరుల కోసం డెంజా D9 ఒక అద్భుతమైన ఎంపికగా నిలవనుంది.









