RBI : దేశంలో ధరలు పెరుగుతున్న నేపథ్యంలో రిజర్వ్‌ బ్యాంక్‌ ఆఫ్‌ ఇండియా కీలక నిర్ణయం తీసుకునే అవకాశం ఉంది. అక్టోబర్‌లో జరిగే సమావేశంలో రెపో రేటును 0.25 శాతం పెంచొచ్చని ఆర్థిక నిపుణులు, బ్యాంకర్లు అంచనా వేస్తున్నారు. ప్రపంచంలోని కొన్ని దేశాల సెంట్రల్‌ బ్యాంకులు కూడా వడ్డీ రేట్లు పెంచుతున్న నేపథ్యంలో ఆర్‌బీఐ కూడా అదే దారిలో వెళ్లొచ్చని చెబుతున్నారు. పశ్చిమాసియాలో మళ్లీ ఉద్రిక్త పరిస్థితులు పెరగడం కూడా ధరలపై ప్రభావం చూపే అవకాశం ఉందని నిపుణులు అంటున్నారు. ముఖ్యంగా చమురు ధరలు పెరిగితే దేశంలో ద్రవ్యోల్బణం మరింత పెరగొచ్చని భావిస్తున్నారు.
అక్టోబర్‌లో ఆర్‌బీఐ రెపో రేటును పెంచితే.. గత కొంతకాలంగా కొనసాగుతున్న వడ్డీ రేట్ల విధానంలో మార్పు వచ్చినట్లవుతుంది. 2025లో ఆర్‌బీఐ వడ్డీ రేట్లను తగ్గించింది. ఆ తర్వాత కొంతకాలంగా రేట్లను అలాగే ఉంచుతూ వచ్చింది. 16 మంది ఆర్థిక నిపుణులు, బ్యాంకర్ల అభిప్రాయాల ఆధారంగా నిర్వహించిన ఓ సర్వేలో.. అక్టోబర్‌ సమావేశంలో రెపో రేటును 0.25 శాతం పెంచే అవకాశం ఉందని ఎక్కువ మంది అంచనా వేసినట్లు సమాచారం.
ఆర్‌బీఐ చివరిసారిగా 2023 ఫిబ్రవరిలో రెపో రేటును పెంచింది. అప్పుడు 0.25 శాతం పెంచి 6.50 శాతానికి తీసుకెళ్లింది. ఆ తర్వాత 2023-24లో రేటును మార్చలేదు. 2025లో మాత్రం వడ్డీ రేట్లను తగ్గించడం మొదలుపెట్టింది. ప్రస్తుతం ఆర్‌బీఐ రెపో రేటు 5.25 శాతంగా ఉంది. అక్టోబర్‌లో మరోసారి 0.25 శాతం పెంచితే.. రెపో రేటు 5.50 శాతానికి చేరే అవకాశం ఉంటుంది. అయితే తుది నిర్ణయం ఆర్‌బీఐ తీసుకోవాల్సి ఉంటుంది.
