Donald Trump :  అమెరికా అధ్యక్షుడు డొనాల్డ్ ట్రంప్ కీలక ప్రకటన చేశారు. ఇండియాకు చెందిన ఎస్సార్ గ్రూప్‌తో కలిసి అమెరికాలో భారీ స్టీల్ ప్రాజెక్ట్ ఏర్పాటు చేయనున్నట్లు తెలిపారు. ఐయోవా రాష్ట్రంలో 15 బిలియన్ డాలర్లతో, అంటే దాదాపు రూ.15 లక్షల కోట్ల విలువైన స్టీల్ కాంప్లెక్స్‌ను ఏర్పాటు చేయనున్నట్లు వెల్లడించారు. ఎస్సార్ గ్రూప్‌కు చెందిన మెసాబి మెటాలిక్స్ ఈ ప్రాజెక్టును చేపట్టనుంది. అమెరికా తయారీ రంగానికి ఇది భారీ పెట్టుబడి అని ట్రంప్ పేర్కొన్నారు. ఈ ప్రకటన సమయంలో ఎస్సార్ గ్రూప్ చైర్మన్ రేవంత్ రుయియా కూడా ట్రంప్‌తో కలిసి ఉన్నారు. అమెరికాలో తయారీ రంగాన్ని ప్రోత్సహిస్తున్నందుకు ట్రంప్‌కు ఆయన ధన్యవాదాలు తెలిపారు. ఐయోవాలో ఈ స్టీల్ కాంప్లెక్స్ అందుబాటులోకి వస్తే.. మైనింగ్ నుంచి స్టీల్ తయారీ వరకు మొత్తం ప్రక్రియ ఒకే వ్యవస్థలో జరిగేలా సరఫరా వ్యవస్థ ఏర్పడుతుందని రుయియా చెప్పారు.

మెసాబి మెటాలిక్స్ ఈ ప్రాజెక్టును పూర్తిగా సమగ్రంగా ఏర్పాటు చేయనుంది. కంపెనీ మిన్నెసోటాలోని తన ఐరన్ ఓర్ గని నుంచి తీసిన ఇనుప ఖనిజాన్ని ఐయోవాకు తరలించి అక్కడ స్టీల్‌గా తయారు చేయనుంది. మొదటి దశలో ఏడాదికి 75 లక్షల టన్నుల స్టీల్ ఉత్పత్తి చేసే సామర్థ్యం ఈ ప్లాంట్‌కు ఉంటుంది. ఆ తర్వాత దీన్ని కోటి టన్నుల వరకు పెంచే అవకాశం ఉంది. 2030లో మొదటి స్టీల్ ఉత్పత్తి ప్రారంభమయ్యే అవకాశం ఉందని కంపెనీ తెలిపింది. ఈ స్టీల్ ప్లాంట్ మిన్నెసోటాలోని నాష్‌వాక్ ప్రాంతంలో మెసాబి మెటాలిక్స్ అభివృద్ధి చేస్తున్న కొత్త ఐరన్ ఓర్ గనితో అనుసంధానమై ఉంటుంది. ఈ గని అభివృద్ధి కోసం కంపెనీ ఇప్పటికే 2.5 బిలియన్ డాలర్లకు పైగా పెట్టుబడి పెట్టింది. అమెరికాలో 50 ఏళ్లకు పైగా కాలంలో ప్రారంభమవుతున్న తొలి కొత్త ఐరన్ ఓర్ గని ఇదేనని ట్రంప్ పేర్కొన్నారు.

Also Read : వెండి ధర ఎందుకు పెరుగుతోంది?.. AI డేటా సెంటర్లకు వెండితో సంబంధం ఏంటి?

మిన్నెసోటాలోని మెసాబి ఐరన్ రేంజ్ దాదాపు 80 నుంచి 100 మైళ్ల వరకు విస్తరించి ఉంది. అమెరికా భూగర్భ సర్వే ప్రకారం.. 20వ శతాబ్దంలో అమెరికా మొత్తం ఐరన్ ఓర్ ఉత్పత్తిలో ఈ ప్రాంతం నుంచి దాదాపు 60 శాతం ఉత్పత్తి అయ్యేది. కొత్త గని నుంచి ఏడాదికి సుమారు 75 లక్షల టన్నుల ఇనుప ఖనిజం లభించే అవకాశం ఉంది. దీంతో మిన్నెసోటాలో దాదాపు 350 ఉద్యోగాలు వచ్చే అవకాశం ఉంది. ఐయోవాలో స్టీల్ ప్లాంట్ ప్రారంభమైన తర్వాత కనీసం 1,750 శాశ్వత ఉద్యోగాలు ఏర్పడే అవకాశం ఉంది. ప్లాంట్ నిర్మాణ సమయంలో మరో 5 వేల నుంచి 6 వేల వరకు అదనపు ఉద్యోగాలు లభించవచ్చని అంచనా వేస్తున్నారు. నిర్మాణం, ప్రారంభమైన తర్వాత మొదటి పదేళ్ల కార్యకలాపాలు కలిపి ఈ ప్రాజెక్టు అమెరికా ఆర్థిక వ్యవస్థపై దాదాపు 95 బిలియన్ డాలర్ల ప్రభావం చూపవచ్చని వైట్‌హౌస్ తెలిపింది.

ఎస్సార్ గ్రూప్ అమెరికాలో మొత్తం 18 బిలియన్ డాలర్ల పెట్టుబడులు పెడుతోందని ట్రంప్ చెప్పారు. ఐయోవాలో ఏర్పాటు కానున్న ఈ ప్లాంట్‌తో అమెరికా స్టీల్, మైనింగ్ రంగాల్లో ఎస్సార్ గ్రూప్ కార్యకలాపాలు మరింత పెరగనున్నాయి. ఈ నెలలోనే ఓ ఫెడరల్ ఏజెన్సీ ఈ ప్రాజెక్టుకు 10 బిలియన్ డాలర్ల వరకు ఆర్థిక సహాయం అందించే విషయాన్ని ప్రకటించింది. ఐయోవాను ప్లాంట్ కోసం ఎంపిక చేయడానికి అక్కడి విద్యుత్ ధరలు కూడా ఒక కారణం కావచ్చని చెబుతున్నారు. స్టీల్ తయారీలో విద్యుత్ ఖర్చు చాలా కీలకం. మిన్నెసోటాతో పోలిస్తే ఐయోవాలో వాణిజ్య విద్యుత్ ధర కొంత తక్కువగా ఉంది. అంతేకాకుండా అమెరికా మధ్య ప్రాంతంలోని పెద్ద మార్కెట్లు, పారిశ్రామిక సంస్థలకు ఐయోవా దగ్గరగా ఉండటం కూడా మరో కారణంగా భావిస్తున్నారు.

ఈ ప్రాజెక్టును అమెరికాలో తయారీ రంగాన్ని పెంచాలన్న ట్రంప్ విధానంలో భాగంగా చూస్తున్నారు. విదేశాల నుంచి దిగుమతి చేసుకునే స్టీల్‌పై ట్రంప్ టారిఫ్‌ను 50 శాతానికి పెంచారు. ఇతర దేశాల నుంచి స్టీల్‌ను దిగుమతి చేసుకోవడం కంటే అమెరికాలోనే ప్లాంట్లు ఏర్పాటు చేసుకునేలా ఈ టారిఫ్ కంపెనీలను ప్రోత్సహిస్తుందని ట్రంప్ చెబుతున్నారు. ప్రాజెక్టు ప్రకటన సందర్భంగా అమెరికా స్టీల్ పరిశ్రమ మళ్లీ వేగంగా బలపడుతోందని ట్రంప్ అన్నారు. ఇతర దేశాల నుంచి వచ్చే స్టీల్‌పై టారిఫ్ చెల్లించకుండా ఉండేందుకు కంపెనీలు అమెరికాలోనే కొత్త ప్లాంట్లు ఏర్పాటు చేస్తున్నాయని ఆయన పేర్కొన్నారు.

Also Read : అమెరికా మాజీ సైనికులకు రష్యా ఎర.. ఒక్కొక్కరికి 26,000 డాలర్లు!