BRICS : ప్రస్తుతం ప్రపంచ దేశాలను ఎక్కువగా ఆందోళనకు గురిచేస్తున్న విషయం చమురు, గ్యాస్‌ సరఫరా. ఇరాన్‌-అమెరికా మధ్య యుద్ధం తర్వాత ఇంధన భద్రతపై అన్ని దేశాలు దృష్టి పెట్టాయి. ఈ సమయంలో భారత్‌లో బ్రిక్స్‌ దేశాలు సమావేశం కావడం కీలకంగా మారింది. ఎందుకంటే బ్రిక్స్‌లోని సౌదీ అరేబియా, రష్యా, ఇరాన్‌, యూఏఈ, చైనా, బ్రెజిల్‌ వంటి దేశాలు భారీగా చమురు ఉత్పత్తి చేస్తున్నాయి.
ఈ దేశాల మధ్య చమురు సరఫరాపై మంచి అవగాహన కుదిరితే ప్రపంచ మార్కెట్‌కు కొంత ఊరట లభించే అవకాశం ఉంది. ముఖ్యంగా ఇరాన్‌, సౌదీ అరేబియా, యూఏఈ వంటి దేశాల మధ్య సమస్యలు తగ్గితే చమురు సరఫరా మరింత సులభం అవుతుంది. బ్రిక్స్‌లో చమురు ఉత్పత్తి చేసే దేశాలతో పాటు భారత్‌, చైనా వంటి భారీగా చమురును కొనుగోలు చేసే దేశాలు కూడా ఉన్నాయి.
ప్రపంచ చమురు రవాణాలో హోర్ముజ్‌ జలసంధి, బాబ్‌ అల్‌-మందెబ్‌ చాలా కీలకం. ఈ మార్గాల గుండా పెద్ద సంఖ్యలో చమురు ట్యాంకర్లు వెళ్తుంటాయి. ఈ ప్రాంతాల్లో ఏదైనా సమస్య వస్తే చమురు రవాణా దెబ్బతిని, ప్రపంచవ్యాప్తంగా ధరలు పెరిగే అవకాశం ఉంటుంది. అందుకే ఈ మార్గాల్లో రాకపోకలు సజావుగా సాగడం చాలా ముఖ్యం.
బ్రిక్స్‌లోని కొన్ని దేశాల దగ్గర భారీ చమురు నిల్వలు ఉన్నాయి. అవసరమైతే ఉత్పత్తిని పెంచడం, సరఫరాను కొనసాగించడం ద్వారా మార్కెట్‌లో కొంత స్థిరత్వం తీసుకురాగలవు. ఈ దేశాలు చమురు ఉత్పత్తి, ఎగుమతులు, సరఫరా మార్గాల విషయంలో కలిసి పనిచేస్తే చమురు కొరతపై ఉన్న భయం తగ్గొచ్చు. ఎల్‌పీజీ సరఫరాపైనా దీని ప్రభావం ఉంటుంది.
మొత్తంగా చూస్తే ప్రపంచ చమురు, గ్యాస్‌ మార్కెట్‌లో బ్రిక్స్‌ దేశాల పాత్ర చాలా కీలకం. ఈ దేశాల మధ్య మంచి ఒప్పందం కుదిరితే హోర్ముజ్‌, బాబ్‌ అల్‌-మందెబ్‌ మార్గాల ద్వారా చమురు ట్యాంకర్ల రాకపోకలు సజావుగా సాగొచ్చు. దాంతో ఇంధన సరఫరా మెరుగుపడటంతో పాటు చమురు ధరలు కూడా కొంత స్థిరంగా ఉండే అవకాశం ఉంది.
