United Nations : ఐక్యరాజ్యసమితి (ఐరాస) భద్రతా మండలిలో పాకిస్థాన్, చైనాల దౌత్యపరమైన ఉమ్మడి వ్యూహానికి తీవ్రమైన ఎదురుదెబ్బ తగిలింది. పాకిస్థాన్లోని బలోచిస్థాన్ ప్రావిన్స్ను ప్రత్యేక దేశంగా ప్రకటించాలంటూ పోరాడుతున్న ‘బలోచిస్థాన్ లిబరేషన్ ఆర్మీ’ (బీఎల్ఏ), దానికి అనుబంధంగా ఉన్న ‘మజీద్ బ్రిగేడ్’లను అంతర్జాతీయ ఉగ్రవాద సంస్థలుగా గుర్తించేలా భద్రతా మండలిని ఒప్పించేందుకు ఆ రెండు దేశాలు చేసిన ప్రయత్నాలను అమెరికా గట్టిగా అడ్డుకుంది. యూఎన్ 1267 కమిటీ నిబంధనల ప్రకారం ఆ రెండు బలోచ్ సంస్థలను ఉగ్రవాద జాబితాలో చేర్చి, అంతర్జాతీయ ఆంక్షలు విధించాలన్న చైనా, పాక్ సంయుక్త ప్రతిపాదనను అమెరికా తోసిపుచ్చింది.
బీఎల్ఏ, మజీద్ బ్రిగేడ్లను ఉగ్రసంస్థలుగా ప్రకటించేందుకు తగిన ఆధారాలు లేవని అమెరికా స్పష్టం చేసింది. ఐక్యరాజ్యసమితి సంప్రదాయాల ప్రకారం అల్ఖైదా లేదా ఇస్లామిక్ స్టేట్ (ఐసిస్) వంటి గ్లోబల్ ఉగ్రవాద సంస్థలతో సంబంధాలున్న సంస్థలపై మాత్రమే ‘ఉగ్ర ముద్ర’ వేసి ఆంక్షలు విధిస్తారని గుర్తుచేసింది. ఈ బలోచ్ సంస్థలకు అల్ఖైదాతో గానీ, ఐసిస్తో గానీ ఎలాంటి సంబంధాలు ఉన్నట్లు స్పష్టమైన సాక్ష్యాలు లేవని అమెరికా కుండబద్దలు కొట్టింది. గతంలో ‘ది రెసిస్టెన్స్ ఫ్రంట్’, ‘లష్కరే తోయిబా’లను విదేశీ ఉగ్రవాద సంస్థలుగా అమెరికా గుర్తించిన నేపథ్యంలో, అదే తరహాలో బీఎల్ఏపై కూడా వేటు వేయించాలని పాక్ చేసిన భారీ లాబీయింగ్ చివరకు విఫలమైంది.
బీఎల్ఏ వెనుక భారతదేశం హస్తం ఉందంటూ పాకిస్థాన్ ఆర్మీ చీఫ్ జనరల్ ఆసీం మునీర్ అంతర్జాతీయ సమాజం ముందు తరచూ ఆరోపణలు చేస్తున్నారు. ఒకవేళ ఐక్యరాజ్యసమితి ద్వారా బీఎల్ఏను అధికారికంగా ఉగ్రవాద సంస్థగా గుర్తింపజేయగలిగితే.. భారత్ను “ఉగ్రవాదానికి మద్దతు ఇస్తున్న దేశం”గా ప్రపంచవ్యాప్తంగా దుష్ప్రచారం చేయవచ్చనేది ఆసీం మునీర్ ప్రధాన వ్యూహం. ఇటీవల పహల్గాం ఉగ్రదాడి తర్వాత భారత్ అత్యంత ప్రతిష్టాత్మకంగా నిర్వహించిన ‘ఆపరేషన్ సింధూర్’ నేపథ్యంలో, బలోచ్ సంస్థలపై అంతర్జాతీయ ఆంక్షలు విధించేలా చైనా సహాయంతో పాకిస్థాన్ తన ప్రయత్నాలను ముమ్మరం చేసింది.
పాకిస్థాన్, చైనాల కుట్రలను ముందే పసిగట్టిన భారతదేశం అంతకంటే వేగంగా తన దౌత్యపరమైన పావులను కదిపింది. ఈ విషయంలో తనకు అత్యంత కీలక మిత్రదేశమైన ఫ్రాన్స్ మద్దతును కూడగట్టింది. భారత్, ఫ్రాన్స్ దేశాలు ఉమ్మడిగా అంతర్జాతీయ వేదికలపై గట్టిగా వాదించి, అమెరికాపై ఒత్తిడి తెచ్చాయి. ఉగ్రవాదం విషయంలో పాకిస్థాన్ ఆడుతున్న ద్వంద్వ క్రీడను, బలోచ్ సంస్థల వాస్తవికతను అమెరికాకు వివరించడంలో ఇరు దేశాలు విజయం సాధించాయి. ఫలితంగా చైనా, పాక్ ఆశలపై నీళ్లు చల్లుతూ అమెరికా తన మనసు మార్చుకుని ఈ ప్రతిపాదనను వీటో చేసింది.
ఈ దౌత్య యుద్ధంలో అంతర్జాతీయంగా ఆయా దేశాల వ్యూహాలు ఆసక్తికరంగా మారాయి. భారత్, ఫ్రాన్స్ల ప్రయత్నాలకు అగ్రరాజ్యం అమెరికాతో పాటు యునైటెడ్ కింగ్డమ్ (యూకే) కూడా సానుకూలంగా స్పందించి మద్దతు పలికింది. అయితే, చైనాకు అత్యంత సన్నిహిత మిత్రదేశమైన రష్యా మాత్రం ఈ మొత్తం వ్యవహారంలో ఎలాంటి జోక్యం చేసుకోకుండా వ్యూహాత్మకంగా మౌనం వహించింది. అమెరికాతో ఇటీవల కాలంలో మెరుగుపడిన సంబంధాలను ఆసరాగా చేసుకుని, ట్రంప్ పరిపాలన ద్వారా అనుకున్నది సాధించాలనుకున్న పాకిస్థాన్ ఆశలకు ఈ అంతర్జాతీయ సమీకరణాలు గండికొట్టాయి.
ప్రస్తుతానికి భద్రతా మండలిలో చైనా సాయంతో చేసిన ప్రయత్నాలు విఫలమవడంతో పాకిస్థాన్ తీవ్ర నిరాశలో మునిగిపోయింది. ఉగ్రవాద నిర్మూలన విషయంలో అమెరికా ఇప్పటికీ భారత దేశ అభిప్రాయాలతోనే ఏకీభవిస్తోందనే గట్టి సందేశం ఈ పరిణామంతో పాకిస్థాన్కు చేరిందని అంతర్జాతీయ రాజకీయ విశ్లేషకులు అభిప్రాయపడుతున్నారు. అయితే, 1267 జాబితాలో నిరాకరణ ఎదురైనప్పటికీ, ఐక్యరాజ్యసమితిలోని ఇతర ప్రత్యామ్నాయ నిబంధనల కింద బలోచ్ సంస్థలపై ఏదో ఒక రకమైన ఆంక్షలు విధించేలా చేసేందుకు పాకిస్థాన్ ప్రస్తుతం చట్టపరమైన మార్గాలను అన్వేషిస్తోంది.
