PoK : పాక్ ఆక్రమిత కశ్మీర్ (PoK) ప్రాంతంలో పరిస్థితులు ఒక్కసారిగా పతాకస్థాయికి చేరాయి. ఇస్లామాబాద్ పాలకులు అనుసరిస్తున్న వివక్షాపూరిత విధానాలపై స్థానిక నివాసితులు తీవ్ర ఆగ్రహంతో రగిలిపోతున్నారు. ‘ది జమ్మూ కశ్మీర్ జాయింట్ ఆవామీ యాక్షన్ కమిటీ’ (JAAC) నేతృత్వంలో వేలాది మంది నిరసనకారులు రాజధాని ముజఫరాబాద్ వీధుల్లోకి వచ్చి భారీ ఆందోళనలు చేపట్టారు. పాకిస్థాన్ ప్రభుత్వం తమ డిమాండ్లకు అంగీకరించకపోతే పరిణామాలు ఊహించని విధంగా ఉంటాయని హెచ్చరిస్తూ 48 గంటల తుది అల్టిమేటమ్ జారీ చేయడం అక్కడ తీవ్ర ఉద్రిక్తతకు దారితీసింది.
పీఓకే అసెంబ్లీకి జులై 27న ఎన్నికలు జరగనుండగా, నేటి నుంచే (జులై 9) అభ్యర్థుల నామినేషన్ల స్వీకరణ ప్రక్రియ ప్రారంభమైంది. ఈ సున్నితమైన సమయంలో జేఏఏసీ ఈ పోరాటాన్ని ఉధృతం చేసింది. పాకిస్థాన్లో స్థిరపడిన శరణార్థుల కోసం పీఓకే అసెంబ్లీలో కేటాయించిన 12 రాజ్యాంగ స్థానాలను రద్దు చేయడం ఈ నిరసనల్లో ప్రధాన డిమాండ్గా మారింది. పీఓకేలో నివసించే 33 లక్షల మంది స్థానిక ప్రజలకు కేవలం 33 సీట్లు మాత్రమే ఉండగా, పాకిస్థాన్లోని వివిధ ప్రాంతాల్లో నివసించే 4.36 లక్షల మంది శరణార్థుల ఓటర్ల కోసం 12 సీట్లు కేటాయించడంపై తీవ్ర అభ్యంతరం వ్యక్తమవుతోంది.
ఈ 12 నియోజకవర్గాలకు సంబంధించిన ప్రజాప్రతినిధులను ఇస్లామాబాద్లోని పాలకులే తమకు అనుకూలంగా ఉండేలా నామినేట్ చేస్తున్నారని, దీనివల్ల పీఓకే రాజకీయాలపై తమ ఆధిపత్యాన్ని పాకిస్థాన్ కొనసాగిస్తోందని జేఏఏసీ ఆరోపిస్తోంది. గత నెల జూన్ 7న పాకిస్థాన్ సుప్రీం కోర్టు ఇచ్చిన తీర్పు ఈ అగ్నికి మరింత ఆజ్యం పోసింది. ఈ 12 శరణార్థుల సీట్లకు రాజ్యాంగ రక్షణ ఉందని, వాటిని రద్దు చేయడం కుదరదని సుప్రీం తీర్పునివ్వడం స్థానికులలో తీవ్ర ఆగ్రహాన్ని కలిగించింది.
అసెంబ్లీ సీట్ల వివాదంతో పాటు పీఓకేలో అపరిమితంగా పెరిగిపోయిన ద్రవ్యోల్బణంపై కూడా ప్రజలు మండిపడుతున్నారు. నిత్యావసర వస్తువులపై భారీగా సబ్సిడీలు పెంచాలని, అడ్డగోలుగా పెంచిన విద్యుత్ ఛార్జీలను తక్షణమే తగ్గించాలని, స్థానిక జలవిద్యుత్ ప్రాజెక్టుల పునఃసమీక్ష చేపట్టాలని జేఏఏసీ డిమాండ్ చేస్తోంది. పీఓకే ప్రాంతం నుంచి విద్యుత్ను ఉత్పత్తి చేస్తూ, స్థానికులకు మాత్రం అధిక ధరలకు విక్రయించడంపై ప్రజలు ఆగ్రహం వ్యక్తం చేస్తున్నారు.
ఈ ఆందోళనల తీవ్రత దృష్ట్యా, ప్రపంచ దృష్టిని పీఓకే వైపు మళ్లించేందుకు జేఏఏసీ సమాయత్తమైంది. ఆర్గనైజేషన్ ఆఫ్ ఇస్లామిక్ కోఆపరేషన్ (OIC), ఐక్యరాజ్యసమితి (UN) ప్రతినిధులతో పాటు అంతర్జాతీయ మీడియా, మానవ హక్కుల సంఘాలను పీఓకేకు వచ్చి అక్కడి వాస్తవ పరిస్థితులను పరిశీలించాలని ఆహ్వానించింది. అలాగే పీఓకే ప్రజలతో పాటు, ప్రపంచవ్యాప్తంగా నివసిస్తున్న ప్రవాస కశ్మీరీలు కూడా ఈ పోరాటంలో భాగం కావాలని పిలుపునిచ్చారు.
48 గంటల్లోగా పాకిస్థాన్ ప్రభుత్వం ఈ డిమాండ్లపై సానుకూలంగా స్పందించకుంటే పీఓకే వ్యాప్తంగా సార్వత్రిక సమ్మె, శాసనసభా ముట్టడి మరియు అన్ని రకాల ప్రజా రవాణాను స్తంభింపజేస్తామని జేఏఏసీ స్పష్టం చేసింది. ఈ పరిణామాలతో ఇస్లామాబాద్ పాలకులు తీవ్ర ఆందోళనలో పడ్డారు. పరిస్థితి చేయి దాటిపోకుండా ఉండేందుకు పీఓకే వ్యాప్తంగా అదనపు పోలీసు బలగాలను, భద్రతా దళాలను మొహరించారు.
