Hamas : యుద్ధంతో అతలాకుతలమైన గాజా స్ట్రిప్లో చారిత్రాత్మక సంచలన పరిణామం చోటుచేసుకుంది. గాజా ప్రాంతంపై గత రెండు దశాబ్దాలుగా సాగుతున్న తన ఏకఛత్రాధిపత్య పాలనకు ముగింపు పలుకుతున్నట్లు పాలస్తీనా మిలిటెంట్ సంస్థ ‘హమాస్’ (Hamas) అధికారికంగా ప్రకటించింది. ఇందులో భాగంగా అక్కడ రోజువారీ పరిపాలనను సాగిస్తున్న తన అత్యవసర పాలక మండలిని సోమవారం రద్దు చేసింది. 2007 నుండి గాజాలో హమాస్ వ్యవస్థలే సర్వస్వంగా సాగిన పాలన ఈ నిర్ణయంతో అధికారికంగా ముగిసింది.
దాదాపు రెండున్నరేళ్ల పాటు ఇజ్రాయెల్తో జరిగిన భీకర దాడులు, యుద్ధం కారణంగా గాజా నగరం తీవ్రంగా దెబ్బతిన్న సంగతి తెలిసిందే. గత ఏడాది అక్టోబర్లో అమెరికా చొరవతో హమాస్-ఇజ్రాయెల్ మధ్య కుదిరిన చారిత్రాత్మక అంతర్జాతీయ కాల్పుల విరమణ ఒప్పందం ప్రకారం ఈ కీలక నిర్ణయం తీసుకున్నారు. గాజా పునర్నిర్మాణం, అక్కడ శాంతి స్థాపనే ధ్యేయంగా హమాస్ ఈ పాలనా అధికారాల నుంచి వైదొలగడానికి అంగీకరించింది.
హమాస్ తాజా చర్యతో గాజా ప్రాంతంలో సరికొత్త పౌర పాలనను అమలు చేయడానికి ఏర్పాటైన ‘గాజా జాతీయ పరిపాలనా కమిటీ’ (NCAG – National Committee for Administration of Gaza) కి మార్గం సుగమమైంది. ఐక్యరాజ్యసమితి సారథ్యంలో సాంకేతిక, వృత్తి నిపుణులతో ఏర్పాటైన ఈ టెక్నికల్ కమిటీ ఇకపై గాజా పగ్గాలను చేతబట్టనుంది. కేవలం రోజువారీ పౌర అవసరాలు, పరిపాలనను చూసుకోవడానికి మాత్రమే ఈ నిపుణులు విధుల్లో ఉంటారని హమాస్ ప్రభుత్వ మీడియా కార్యాలయం జనరల్ డైరెక్టర్ ఇస్మాయిల్ అల్-తవాబ్తా స్పష్టం చేశారు.
ఈ సరికొత్త జాతీయ కమిటీ (NCAG) విధులను పర్యవేక్షించేందుకు ‘బోర్డ్ ఆఫ్ పీస్’ (BOP) బాధ్యతలు స్వీకరించనుంది. ఇది అమెరికా అధ్యక్షుడు డొనాల్డ్ ట్రంప్ నాయకత్వంలోని ఒక అంతర్జాతీయ కూటమి (శాంతి మండలి). జాతీయ కమిటీ పూర్తి స్థాయిలో తన బాధ్యతలను స్వీకరించేంతవరకు, అందరికీ ఆమోదయోగ్యమైన ఒక సమర్థుడైన వ్యక్తినే పాలకుడిగా నియమించాలని హమాస్ భావిస్తున్నట్లు అంతర్జాతీయ వార్తా సంస్థ ‘AFP’ వెల్లడించింది.
హమాస్ చేసిన ఈ కీలక ప్రకటనపై ఎన్సీఏజీ (NCAG) సానుకూలంగా స్పందించింది. గాజాలో పౌర పరిపాలన పగ్గాలను చేపట్టేందుకు తాము సిద్ధంగా ఉన్నట్లు ప్రకటించింది. అయితే, గాజాలో శాంతియుత వాతావరణం నెలకొనాలన్నా, తమ పాలన విజయవంతం కావాలన్నా.. ప్రాంతం మొత్తానికి ‘ఒకే చట్టం, ఒకే పరిపాలన వ్యవస్థ’ ఉండటం అత్యంత కీలకమని కమిటీ స్పష్టం చేసింది. క్షేత్రస్థాయిలో మారుతున్న పరిస్థితులను బట్టి తాము తదుపరి చర్యలు తీసుకుంటామని శాంతి మండలి సైతం వెల్లడించింది.
ఈ అధికార మార్పిడి సజావుగానే సాగుతున్నట్లు కనిపిస్తున్నప్పటికీ, అత్యంత కీలకమైన ‘నిరాయుధీకరణ’ (ఆయుధాలను వదిలిపెట్టడం) అంశంపై మాత్రం ఇంకా స్పష్టత రాలేదు. కాల్పుల విరమణ ఒప్పందంలో హమాస్ తన ఆయుధాలను పూర్తిగా వదిలిపెట్టాలనేది ప్రధాన డిమాండ్ కాగా, భద్రతా బాధ్యతలను అంతర్జాతీయ దళాలకు అప్పగించే విషయాలపై హమాస్ తన తాజా ప్రకటనలో నేరుగా ఎలాంటి ప్రస్తావన చేయలేదు. ఈ నేపథ్యంలో, శాంతి స్థాపన దిశగా తాము తీసుకున్న నిర్ణయాలకు ఇజ్రాయెల్ కూడా కట్టుబడి ఉండాలని హమాస్ డిమాండ్ చేస్తోంది.
