H-1B Visa : అమెరికాలో ట్రంప్ ప్రభుత్వం H-1B వీసా విధానంపై గట్టిగానే ఫోకస్ పెట్టింది. H-1B వీసా నిబంధనలు ఉల్లంఘించే వారికి భారీ జరిమానాలు విధించేలా అమెరికా ప్రతినిధుల సభలో కొత్త బిల్లు ప్రవేశపెట్టారు. కొన్ని తీవ్రమైన H-1B వీసా ఉల్లంఘనలకు గరిష్ఠ జరిమానాను 35 వేల డాలర్ల నుంచి 2.5 లక్షల డాలర్లకు పెంచాలని ఈ బిల్లులో ప్రతిపాదించారు. అలాగే నిబంధనలు ఉల్లంఘించిన వారిని ఇమ్మిగ్రేషన్ కార్యక్రమాల్లో పాల్గొనకుండా చేసే నిషేధ కాలాన్ని కనీసం 3 ఏళ్ల నుంచి 10 ఏళ్లకు పెంచాలని ప్రతిపాదించారు.

ప్రస్తుతం ఈ బిల్లు ప్రతినిధుల సభలోని హౌస్ జ్యుడీషియరీ కమిటీ పరిశీలనలో ఉంది. అయితే ఈ బిల్లు ఇంకా చట్టంగా మారలేదు. ముందుగా ప్రతినిధుల సభ, ఆ తర్వాత సెనేట్ ఆమోదించాలి. అనంతరం అధ్యక్షుడి ఆమోదం పొందితేనే ఇది చట్టంగా అమల్లోకి వస్తుంది. H-1B ఉల్లంఘనకు ప్రస్తుతం ఉన్న జరిమానా 5 వేల డాలర్లు. దీన్ని 1 లక్ష డాలర్లకు పెంచాలని ప్రతిపాదించారు. ఈ కేటగిరీలో ఇమ్మిగ్రేషన్ కార్యక్రమాల నుంచి నిషేధించే కాలాన్ని కూడా కనీసం 2 ఏళ్ల నుంచి 5 ఏళ్లకు పెంచాలని బిల్లు చెబుతోంది.

Also Read : అమెరికాలో పెరుగుతున్న మీజిల్స్‌.. న్యూయార్క్‌లో ఎమర్జెన్సీ

ఇమ్మిగ్రేషన్‌కు సంబంధించిన డాక్యుమెంట్లలో మోసం చేసే వారిపై కూడా జరిమానాలను పెంచాలని బిల్లులో ప్రతిపాదించారు. ఒక రకమైన డాక్యుమెంట్ మోసానికి ప్రస్తుతం 250 నుంచి 2,000 డాలర్ల వరకు జరిమానా ఉంది. దీన్ని 1,000 నుంచి 10,000 డాలర్లకు పెంచాలని ప్రతిపాదించారు. మరో తీవ్రమైన డాక్యుమెంట్ మోసానికి ప్రస్తుతం 2,000 నుంచి 5,000 డాలర్ల వరకు జరిమానా ఉంది. దీన్ని 20,000 నుంచి 50,000 డాలర్లకు పెంచాలని బిల్లులో పేర్కొన్నారు.

ఇమ్మిగ్రేషన్ అండ్ నేషనాలిటీ యాక్ట్‌లోని సెక్షన్ 274Cకి సవరణలు చేయడం ద్వారా ఈ మార్పులు తీసుకురావాలని ప్రతిపాదించారు. ప్రస్తుతం ఈ బిల్లు అమెరికా ప్రతినిధుల సభలో ప్రవేశపెట్టి, హౌస్ జ్యుడీషియరీ కమిటీకి పంపించారు. చట్టంగా మారాలంటే ముందుగా హౌస్ ఆమోదం పొందాలి. ఆ తర్వాత సెనేట్‌లో కూడా పాస్ కావాలి. చివరగా అధ్యక్షుడి ఆమోదం పొందిన తర్వాతే అమల్లోకి వస్తుంది.

అప్పటి వరకు H-1B వీసా ఉల్లంఘనలు, ఇమ్మిగ్రేషన్‌కు సంబంధించిన డాక్యుమెంట్ మోసాలపై ప్రస్తుతం ఉన్న జరిమానాలే కొనసాగుతాయి. కొన్ని H-1B నాన్-ఇమ్మిగ్రెంట్ వీసా నిబంధనల ఉల్లంఘనలకు జరిమానాలను పెంచడమే ఈ బిల్లు ప్రధాన ఉద్దేశం. ఇందుకోసం ఇమ్మిగ్రేషన్ అండ్ నేషనాలిటీ యాక్ట్‌లోని H-1B ఉల్లంఘనలు, ఇమ్మిగ్రేషన్ డాక్యుమెంట్ మోసాలకు సంబంధించిన నిబంధనలను సవరించనున్నారు. ఈ బిల్లులో ఏ కంపెనీ పేరును లేదా నిర్దిష్ట దర్యాప్తును ప్రస్తావించలేదు.

Also Read : శ్రీలంకలో ఆన్‌లైన్ బెట్టింగ్ రాకెట్ గుట్టురట్టు.. 8 మంది ఇండియన్స్ అరెస్ట్