భారత్, జపాన్ దేశాల మధ్య ఎప్పటి నుంచో సత్సంబంధాలు ఉన్నాయి. అయితే ఇటీవల జపాన్ ప్రధానమంత్రి సనాయె తకైచి భారతదేశ పర్యటనకు వచ్చారు. ఈ సందర్భంగా దేశ ప్రధాని మోదీతో భేటీ అయ్యి.. పలు ఒప్పందాలు చేసుకున్నారు. రెండు దేశాల ప్రయోజనాలే కాకుండా ఆసియా పసిఫిక్ ప్రాంతంలో శాంతి, స్థిరత్వమే లక్ష్యంగా రక్షణ, కొత్త టెక్నాలజీ, బుల్లెట్ రైలు, వ్యాపారం, పర్యావరణ రంగాలపై ముఖ్యంగా చర్చలు జరిపారు.

రక్షణ రంగానికి సంబంధించి ఇరు దేశాల మధ్య అత్యంత ప్రాధాన్యమైన ఒప్పందాలు కుదిరాయి. భారత్, జపాన్ దేశాలు తమ భద్రతను పటిష్టం చేసుకునేందుకు మిలిటరీ పరంగా కలిసి నడవాలని నిర్ణయించాయి. ఇందులో భాగంగా ఇరు దేశాల ఆర్మీ, నేవీ, ఎయిర్‌ఫోర్స్ దళాలు కలిసి నిర్వహించే సంయుక్త యుద్ధ విన్యాసాలను మరింత విస్తృతం చేయనున్నారు. కేవలం విన్యాసాలకే పరిమితం కాకుండా ఆధునిక మిలిటరీ పరికరాలు, రక్షణ సాంకేతికతను రెండు దేశాలు కలిసి సొంతంగా అభివృద్ధి చేసుకునేలా అంగీకారానికి వచ్చాయి. ఇది భారతదేశ ‘మేక్ ఇన్ ఇండియా’ రక్షణ రంగానికి ఎంతో ఉపయోగపడనుంది.

భారతదేశపు మొట్టమొదటి కలల ప్రాజెక్ట్ అయిన ముంబై-అహ్మదాబాద్ హైస్పీడ్ రైలు నిర్మాణాన్ని వేగవంతం చేయడంపై ఈ పర్యటనలో ప్రత్యేక దృష్టి పెట్టారు. ఈ ప్రాజెక్ట్ వీలైనంత త్వరగా పూర్తి కావడం కోసం జపాన్ ప్రభుత్వం సరికొత్త విడత నిధులను లోన్ రూపంలో మంజూరు చేస్తూ, అధికారిక ఒప్పందాలపై సంతకాలు చేసింది. ప్రపంచంలోనే అత్యంత సురక్షితమైన, వేగవంతమైన ‘షింకన్సేన్’ బుల్లెట్ రైలు సాంకేతికతను జపాన్ మన దేశానికి అందిస్తోంది. ఈ ప్రతిష్టాత్మక ప్రాజెక్ట్ గడువులోగా పూర్తయితే భారత రవాణా రంగ రూపురేఖలు పూర్తిగా మారిపోతాయి.

రాబోయే కాలం అంతా డిజిటల్, ఆర్టిఫిషియల్ ఇంటెలిజెన్స్ దే. కాబట్టి భవిష్యత్తు సాంకేతిక అవసరాలను తీర్చడంలో రెండు దేశాలు కలవనున్నాయి. గ్లోబల్ మార్కెట్‌లో కంప్యూటర్ చిప్స్ లేదా సెమీకండక్టర్ల కొరతను అధిగమించడానికి.. భారతదేశంలో సెమీకండక్టర్ ప్లాంట్ల ఏర్పాటుతో సప్లై చైన్‌ను బలోపేతం చేయడానికి జపాన్ సహకరిస్తుంది. దీనితో పాటు ఆర్టిఫిషియల్ ఇంటెలిజెన్స్ (AI), సరికొత్త 5G, రాబోయే 6G నెట్‌వర్క్ పరిశోధనల్లో రెండు దేశాలు కలిసి పనిచేయనున్నాయి. అలాగే పెరుగుతున్న సైబర్ దాడుల నుంచి డిజిటల్ వ్యవస్థలను కాపాడుకోవడానికి సైబర్ సెక్యూరిటీ రంగంలో కూడా సమాచారాన్ని పంచుకోవాలని భావిస్తున్నారు.

Also Read : ఇజ్రాయెల్ దెబ్బకు ఇరాన్ హై అలర్ట్.. తండ్రి అంత్యక్రియలకు మొజ్తబా ఖమేనీ దూరం!

గ్లోబల్ వార్మింగ్, పూర్తి కాలుష్య నివారణ కోసం భారత్ అడుగులు వేస్తోంది. దీనికి జపాన్ పూర్తిగా సపోర్ట్ చేయనున్నట్లు తెలిపింది. పర్యావరణానికి హాని చేయని ఇంధన వనరుల అభివృద్ధిపై ఇరు దేశాలు దృష్టి పెట్టాయి. భవిష్యత్తులో పెట్రోల్, డీజిల్‌కు ప్రత్యామ్నాయంగా మారనున్న గ్రీన్ హైడ్రోజన్, సౌరశక్తి, తయారీ రంగంలో జపాన్ కంపెనీలు భారతదేశంలో భారీ పెట్టుబడులు పెట్టనున్నాయి. క్లీన్ ఎనర్జీని ప్రోత్సహించడానికి సోలార్ ప్యానెల్స్ తయారీ, విండ్ ఎనర్జీ రంగాల్లో సరికొత్త సాంకేతికతను భారత్‌కు బదిలీ చేసేందుకు జపాన్ అంగీకరించింది. దీనివల్ల కాలుష్యం తగ్గడమే కాకుండా భారత్‌లో కొత్త ఉద్యోగ అవకాశాలు లభిస్తాయి.

భారతదేశంలోని ఈశాన్య రాష్ట్రాలైన అస్సాం, మేఘాలయ, త్రిపుర వంటి ప్రాంతాల అభివృద్ధి చాలా ముఖ్యం. జపాన్ ఇంటర్నేషనల్ కోఆపరేషన్ ఏజెన్సీ ద్వారా ఈశాన్య రాష్ట్రాలలో అంతర్జాతీయ స్థాయి రోడ్లు, మెరుగైన వంతెనల నిర్మాణానికి భారీగా నిధులు కేటాయించారు. కొండ ప్రాంతాలైన ఈశాన్య రాష్ట్రాలలో రవాణా సౌకర్యాలు మెరుగైతే ఆగ్నేయాసియా దేశాలతో వ్యాపార సంబంధాలు మరింత మెరుగవుతాయి.

ఈ పర్యటన ద్వారా భారత్, జపాన్ దేశాల మధ్య కేవలం వ్యాపార బంధమే కాకుండా స్నేహ బంధం మరింత గట్టిపడింది. ఆర్థిక వృద్ధి, సాంకేతిక పురోగతి, దేశ రక్షణ వంటి అత్యంత కీలక రంగాలలో కుదిరిన ఈ ఒప్పందాలు రాబోయే రోజుల్లో ఇరు దేశాల అభివృద్ధికి ఉపయోగపడనున్నాయి.

Also Read : “అమెరికా ఆర్థిక సాయం మాకొద్దు..” ట్రంప్‌కు నెతన్యాహు బిగ్‌షాక్..