-Ravi prakash

E20 ఫ్యూయెల్ దేశాన్ని రెండుగా విడగొట్టిందా? ఈ రోజు మీరు మీ వాహనంలో పోస్తున్న పెట్రోల్… రెండేళ్ల క్రితం మీరు వాడిన అదే పెట్రోల్ కాదని మీకు తెలుసా..? దేశంలోని కోట్లాది మంది భారతీయులు… తమకు తెలిసినా తెలియకపోయినా… ఇప్పటికే ఈ20 పెట్రోల్‌ను ఉపయోగిస్తున్నారని చెబితే నమ్ముతారా..? కొన్ని వారాలుగా సోషల్ మీడియాలో వైరల్ అవుతున్న వీడియోల్లో… కార్లు, ఎస్‌యూవీలు, ఖరీదైన లగ్జరీ వాహనాలు… చివరికి మోటార్‌సైకిళ్లు కూడా… ఈ ఇంధనం వల్ల సమస్యలు ఎదుర్కొంటున్నాయని మీకు తెలుసా..? ఈ వివాదం ఇప్పుడు అత్యున్నత న్యాయస్థానానికి చేరుకుంది మరియు రాజకీయంగా కూడా తీవ్ర దుమారం రేపుతోంది. ప్రతిపక్ష పార్టీలు దీనిని ఒక కుంభకోణం అంటుంటే, ఇది దేశ ఇంధన భవిష్యత్తు అని కేంద్ర ప్రభుత్వం చెబుతోంది. ఇంతకీ, నిజం ఎవరు చెబుతున్నారు? దేశంలోని లక్షలాది మంది వాహనదారులపై అత్యంత ప్రభావం చూపుతుంది.

బీహార్‌కు చెందిన ప్రముఖ యూట్యూబర్, సోషల్ మీడియా ఇన్‌ఫ్లూయెన్సర్ మనీష్ కశ్యప్ తన ఖాతాలో పోస్ట్ చేసిన వైరల్ వీడియోలో… దాదాపు ₹40 లక్షల విలువైన తన టయోటా ఇన్నోవా హైక్రాస్ వాహనం ఈ20 ఇంధనానికి అనుకూలమని ప్రచారం చేసినప్పటికీ… కేవలం 12 వేల కిలోమీటర్లు నడిచిన తర్వాత చాలా సమస్యలను ఫేస్‌ చేస్తోందని మనీష్‌ ఆరోపిస్తున్నారు. అంతేకాదు… ఎథనాల్ విధానం వల్ల భారతదేశవ్యాప్తంగా వాహనాలు దెబ్బతింటున్నాయని కూడా ఆయన చెబుతున్నారు. మనీష్ కశ్యప్ ఒక్కరే ఇలాంటి ఆరోపణలు చేయడం లేదు. పుష్పరాజ్ శర్మ అనే ఎక్స్ వినియోగదారుడు కూడా 69 సెకన్ల వీడియోను పంచుకున్నారు. ఆ వీడియోలో… ఈ20 ఇంధనం కారణంగా ఒక మెర్సిడెస్ కార్ ఇంజన్ దెబ్బతిన్నట్లు ఆరోపిస్తున్నారు. తన ఎక్స్ పోస్టులో… కేంద్ర మంత్రి నితిన్ గడ్కరీపై విమర్శలు చేస్తూ… ప్రభుత్వ ఎథనాల్ విధానంపైనా ప్రశ్నలు లేవనెత్తుతున్నారు. ఇవి పుష్పరాజ్ శర్మ తన సామాజిక మాధ్యమ పోస్టులో చేసిన ఆరోపణలు మాత్రమే.

ఈ వివాదం ఖరీదైన కార్లకే పరిమితం కాలేదు. శివఠాకూర్‌ అనే మరో వ్యక్తి ఇన్‌స్టాగ్రామ్‌లో laila_three60 పేరుతో పోస్ట్ చేసిన మరో వైరల్ వీడియోను పంచుకున్నారు. ఆ పోస్టులో… ఈ20 ఇంధనానికి అనుకూలంగా తయారైన కొత్త బైక్.. పెట్రోల్ నింపిన కొద్దిసేపటికే ఆగిపోయిందని ఆయన ఆరోపిస్తున్నారు. ఈ20 కోసం ప్రత్యేకంగా రూపొందించిన వాహనాలకే ఇలాంటి సమస్యలు వస్తున్నాయా అని కూడా ప్రశ్నిస్తున్నారు. అయితే, ఇవి సామాజిక మాధ్యమాల పోస్టుల్లో చేసిన ఆరోపణలు మాత్రమే. అంతటితో ఈ వీడియోల పరంపర ఆగిపోలేదు. అభినయ్‌ అనే మరో ఎక్స్ వినియోగదారుడు కూడా ఒక పెట్రోల్ బంక్ దగ్గర నుంచి తీసిన రెండు వేర్వేరు వీడియోలను పోస్ట్ చేశారు. ఆ పోస్టుల్లో… ఈ20 పెట్రోల్ వాడిన తర్వాత అనేక మంది వాహన యజమానులు ఇంజన్ సమస్యలపై ఫిర్యాదు చేస్తున్నారని అభినయ్‌ ఆరోపిస్తున్నారు. సాధారణ భారతీయులు… తమకు తెలియకుండానే… ఒక ప్రయోగంలో భాగమవుతున్నారా అని కూడా అభినయ్‌ ప్రశ్నిస్తున్నారు. ఇవి అభినయ్‌ తన ఎక్స్ పోస్టుల్లో చేసిన ఆరోపణలు మాత్రమే.

దేశంలోని వివిధ ప్రాంతాల నుంచి… ఇలాంటి ఆరోపణలు సామాజిక మాధ్యమాలలో వరుసగా వెలుగులోకి వస్తున్నాయి. కొంతమంది… మైలేజ్ భారీగా తగ్గిపోయిందని అంటున్నారు. మరికొందరు… ఇంజన్ సమస్యలు వచ్చాయని చెబుతున్నారు. ఇంకొందరు… వారంటీ విషయంలో వివాదాలు ఎదురవుతున్నాయని ఆరోపిస్తున్నారు. అందరి ప్రశ్న ఒక్కటే—ఈ20 పెట్రోల్ నిజంగానే ఇండియా వాహనాలను దెబ్బతీస్తుందా? లేక… ఇది సామాజిక మాధ్యమాలలో వైరల్‌ అవుతున్న మరో తప్పుడు ప్రచారమా? ఆ ప్రశ్నకు సమాధానం తెలుసుకోవాలంటే… ముందుగా ఒక ప్రాథమిక అంశాన్ని అర్థం చేసుకోవాలి. అసలు ఈ20 పెట్రోల్ అంటే ఏమిటి? ప్రభుత్వం దీన్ని ఇంత దూకుడుగా ఎందుకు అమలు చేస్తోంది? ఇది ఒక్కసారిగా దేశంలో ఎందుకింత దుమారం రేపుతోంది? అదేంటో క్షుణ్ణంగా తెలుసుకుందాం..

అసలు ఈ20 అంటే ఏంటి? ప్రభుత్వం దీన్ని ఎందుకు ప్రోత్సహిస్తోంది? వైరల్‌ వీడియోలు నిజమేనా..? లేక… అవసరానికి మించి ప్రచారం అవుతున్నాయా? దీనిపై ఓ నిర్ణయానికి వచ్చే ముందు… ముందుగా ఒక సాధారణ ప్రశ్నకు (జనరల్‌ క్వశ్చన్‌కు) సమాధానం (ఆన్సర్‌) తెలుసుకోవాలి. అసలు… ఈ20 అంటే ఏంటో అర్థం కాకపోతే… ఈ మొత్తం వివాదం కూడా అర్థం కావు. 20 శాతం ఎథనాల్ 80 శాతం పెట్రోల్ కలిగిన ఇంధనం. ఇథనాల్ అనేది… ఆల్కహాల్ ఆధారిత ఇంధనం. ఇండియాలో… దీనిని ప్రధానంగా చెరకు, మొలాసిస్, ఆహార ధాన్యాల నుంచి తయారు చేస్తారు. ఇప్పటివరకు… భారత్‌లో తక్కువ శాతం ఎథనాల్ కలిపిన పెట్రోల్ అమ్మేవారు. కానీ ఇప్పుడు… 20 శాతం వరకు ఇథనాల్ మిశ్రమంతో కూడిన పెట్రోల్ వైపు దేశాన్ని తీసుకెళ్లాలని కేంద్ర ప్రభుత్వం లక్ష్యంగా పెట్టుకుంది. దీన్నే.. ఈ20 విధానంగా పిలుస్తారు. ఈ ఈ20 ఇంధనాన్ని తీసుకురావడానికి ప్రభుత్వం నాలుగు ముఖ్యమైన కారణాలను చెబుతోంది.

మొదటిది: భారత్ ప్రతి సంవత్సరం భారీ మొత్తంలో ముడి చమురును (క్రూడ్ ఆయిల్‌ను) విదేశాల నుంచి దిగుమతి చేసుకుంటోంది. దీనివల్ల… విదేశీ మారకద్రవ్యంగా వేల కోట్ల రూపాయలు ఖర్చవుతున్నాయి. పెట్రోల్‌లో ఎక్కువ ఇథనాల్ కలిస్తే… ముడి చమురు దిగుమతుల అవసరం తగ్గుతుంది.

రెండోది: ఇథనాల్ వల్ల కార్బన్ ఉద్గారాలు (కార్బన్ ఎమిషన్స్) తగ్గుతాయని… పర్యావరణ లక్ష్యాలను చేరుకోవడంలో ఇది సహాయపడుతుందని ప్రభుత్వం చెబుతోంది.

మూడోది: ఇది భారత రైతులకు భారీ మార్కెట్‌ను కల్పిస్తుందని ప్రభుత్వం వాదిస్తోంది. చెరకు కర్మాగారాలు… డిస్టిలరీలు… ధాన్య ఉత్పత్తిదారులు… ఇథనాల్‌కు పెరిగే డిమాండ్ వల్ల లాభపడతారని చెబుతోంది.

నాలుగోది: ముడి చమురుపై ఆధారపడటాన్ని తగ్గించడం ద్వారా… భారత్ దీర్ఘకాలిక ఇంధన భద్రతను మరింత బలోపేతం చేసుకుంటుందని ప్రభుత్వం భావిస్తోంది.

ప్రభుత్వ దృష్టిలో… ఇది అందరికీ లాభదాయకమైన విధానం. అందుకే దీన్ని ప్రోత్సహిస్తోంది.

అన్నీ సానుకూలంగానే కనిపిస్తున్నాయి. మరి, వివాదం ఎక్కడ మొదలైంది? విమర్శకులు చెబుతున్నది ఏమిటంటే… సమస్య ఇథనాల్‌లో కాదని… ఈ20 అమలు చేసిన విధానంలో ఉందని. వారి వర్షన్‌ ప్రకారం… ప్రస్తుతం భారత రోడ్లపై తిరుగుతున్న లక్షలాది వాహనాలు… పూర్తిగా పెట్రోల్… లేదా… చాలా తక్కువ శాతంలో ఇథనాల్ కలిగిన ఇంధనం కోసం మాత్రమే తయారు చేశారు. అలాంటి పాత కార్లు… బైకులు నిరంతరం ఈ20 ఇంధనం ఉపయోగించేలా తయారు కాలేదని వారు అంటున్నారు.

ఆటోమొబైల్ నిపుణులు కూడా… కొన్ని అంశాలపై ఆందోళన వ్యక్తం చేస్తున్నారు. ఇంజన్ సామర్థ్యం తగ్గే అవకాశం, ఇంధన వ్యవస్థ భాగాలు చెడిపోవడం… ఈ20 వాడితే వాహనాల్లో నిర్వహణ సమస్యలు పెరుగుతాయని వాదిస్తున్నారు. అయితే… ఈ20కు మద్దతు ఇస్తున్నవారు మాత్రం… ఈ భయాల్లో చాలా వరకు అతిశయోక్తులేనని… మిగిలిన సమస్యలను తయారీ సంస్థల మార్గదర్శకాలు… కొత్త సాంకేతికతతో అధిగమించవచ్చని చెబుతున్నారు.

వాహన యజమానుల నుంచి ఎక్కువగా వినిపిస్తున్న ఫిర్యాదు ఏంటంటే..? మైలేజ్ తగ్గిపోయిందని. ఎందుకు? ఎందుకంటే… ఒక లీటర్ పెట్రోల్‌తో పోలిస్తే… ఒక లీటర్ ఇథనాల్‌లో శక్తి తక్కువగా ఉంటుంది. అంటే… సిద్ధాంతపరంగా చూస్తే… అదే దూరం ప్రయాణించడానికి… వాహనం కొద్దిగా ఎక్కువ ఇంధనాన్ని వినియోగించే అవకాశం ఉంటుంది. సామాజిక మాధ్యమాలలో వీడియోలు పెడుతున్న చాలామంది వాహనదారులు… తాము ఇదే పరిస్థితిని ఎదుర్కొంటున్నామని చెబుతున్నారు. మైలేజ్ తగ్గిందని… తరచూ పెట్రోల్‌ కొట్టించాల్సి వస్తోందని… నిర్వహణ ఖర్చులు పెరిగాయని ఆరోపిస్తున్నారు. అయితే… ఆ అనుభవాలకు నేరుగా ఈ20నే కారణమా? లేదా… ఆ వాహన మోడల్‌ దాని అనుకూలత… నిర్వహణ డ్రైవింగ్ పరిస్థితులు… ఇతర అంశాల ప్రభావమా? అనేది… ప్రతి వాహనం విషయంలో విడివిడిగా చెక్‌ చేయాల్సిన అంశం.

చాలామంది వాహన యజమానులు చెబుతున్నదేమిటంటే… ఈ రోజుల్లో ఎథనాల్ కలపని పెట్రోల్ దొరకడం లేదని. అంటే… మీ వాహనం పాతదైనా… కొత్తదైనా… మీకు ఈ20 కావాలన్నా… వద్దన్నా… చాలా సందర్భాల్లో… మీ దగ్గర మరో ప్రత్యామ్నాయం ఉండటం లేదని వారు అంటున్నారు. అందుకే… ఈ అంశంపై దాఖలైన పిటిషన్లు ఇప్పుడు అత్యున్నత న్యాయస్థానం ముందుకు చేరాయి. కొంతమంది పిటిషనర్లు… ఇంధనంపై స్పష్టమైన ముద్ర ఉండాలని… తక్కువ ఇథనాల్ కలిగిన… లేదా… ఎథనాల్ లేని పెట్రోల్ కూడా అందుబాటులో ఉండాలని… తద్వారా వినియోగదారులు ఎంచుకునే అవకాశం కల్పించాలని కోరుతున్నారు.

ఈ చర్చలో పదేపదే వినిపిస్తున్న మరో ప్రశ్న… వారంటీ, భీమా.పాత వాహనంలో… ఇంజన్… లేదా… ఇంధన వ్యవస్థ సమస్య వస్తే… దానికి బాధ్యత ఎవరిది? తయారీ సంస్థ వారంటీని గౌరవిస్తుందా? భీమా సంస్థ క్లెయిమ్‌ను అంగీకరిస్తుందా? ఈ అంశాలన్నీ… ఈ20 కంటే ముందు తయారైన వాహనాల యజమానులకు మరింత టెన్షన్‌ పెంచుతున్నాయి.

అయితే… ఈ20 వల్ల దేశవ్యాప్తంగా వాహనాలు దెబ్బతింటున్నాయనే ఆరోపణలను… మద్దతుదారులు పూర్తిగా ఖండిస్తున్నారు. కేంద్ర మంత్రి నితిన్ గడ్కరీ వారిలో ముఖ్యులు. ఈ20 వల్ల వాహనాలకు ఎలాంటి నష్టం జరగదని… ఇథనాల్‌కు వ్యతిరేకంగా… కొన్ని స్వార్థపూరిత వర్గాలు తప్పుడు ప్రచారం చేస్తున్నాయని నితిన్‌ చెబుతున్నారు. అంతేకాదు… ఇథనాల్ విజయవంతమైతే… నష్టపోయే ఒక శక్తివంతమైన లాబీ ఉందని కూడా ఆయన ఆరోపించారు. ఒకవైపు… ఇంజన్ సమస్యలు… మైలేజ్ తగ్గుదల… వాహన నష్టం అంటూ వేలాది సామాజిక మాధ్యమ పోస్టులు… మరోవైపు… ఈ20 పూర్తిగా సురక్షితమని, ఇది తప్పుడు ప్రచారమేనని చెబుతున్న ప్రభుత్వం. అయితే… నిజం ఎవరి వైపు ఉంది? ఈ వివాదం… వాహనదారులతోనే ఆగిపోలేదు. ఇప్పుడు… ఇది పూర్తి స్థాయి రాజకీయ పోరాటంగా మారింది. ప్రభుత్వం తొందరపాటుతో ఈ విధానాన్ని అమలు చేసిందని ప్రతిపక్ష పార్టీలు ఆరోపిస్తున్నాయి. పారదర్శకతపై ప్రశ్నలు లేవనెత్తుతున్నాయి. ప్రయోజనాల సంఘర్షణ ఉందంటూ ఆరోపణలు చేస్తున్నాయి. ఈ చర్చ ఇప్పుడు… సుప్రీంకోర్టులోనూ… రాజకీయ వేదికలపైనా కొనసాగుతోంది. వాటన్నింటినీ ఒక్కసారి చూద్దాం..!

కొంతమంది వాహనదారుల ఫిర్యాదులతో ప్రారంభమైన ఈ వివాదం… ఇప్పుడు పూర్తి స్థాయి రాజకీయ చర్చగా మారింది. ప్రజల ఆందోళనలకు తగిన సమాధానాలు ఇవ్వకుండానే… ఈ విధానాన్ని కోట్లాది భారతీయులపై అమలు చేశారని ప్రతిపక్షం ప్రభుత్వంపై ఆరోపిస్తోంది. ప్రభుత్వం మాత్రం… ఆ ఆరోపణలన్నింటినీ పూర్తిగా ఖండిస్తోంది. దీంతో, ఈ అంశం సామాజిక మాధ్యమాలకే పరిమితం కాలేదు. రాజకీయ వేదికలపై కూడా అదే స్థాయిలో కొనసాగుతోంది.

కాంగ్రెస్ అధ్యక్షుడు మల్లికార్జున ఖర్గే… కేంద్ర మంత్రి నితిన్ గడ్కరీ చేసిన వ్యాఖ్యలను ప్రశ్నించారు. సుప్రీంకోర్టులో జరిగిన తాజా విచారణను ప్రస్తావిస్తూ… బయట ఒక విధంగా… కోర్టులో మరో విధంగా ప్రభుత్వం వాదిస్తోందని ఆయన ఆరోపించారు. ఆ తర్వాత… కర్ణాటక మంత్రి ప్రియాంక్ ఖర్గే… ఎక్స్‌లో ఒక పోస్టు పెట్టారు. అందులో… సుమారు 3 కోట్ల 60 లక్షల మంది భారతీయులు… తమకు తెలియకుండానే దేశవ్యాప్త ప్రయోగంలో భాగమయ్యారని ఆయన ఆరోపించారు. వాహనదారులు మైలేజ్ తగ్గడం, ఇంజన్ సమస్యల గురించి ఫిర్యాదు చేస్తున్నారని చెబుతూ… ఈ20 అమలును తప్పనిసరి చేయడాన్ని ప్రశ్నించారు. దీనిపై పూర్తి స్పష్టత వచ్చే వరకు… నిర్ణయాన్ని వెనక్కి తీసుకోవాలని కూడా డిమాండ్ చేశారు. ఇవి కాంగ్రెస్ నాయకులు చేసిన రాజకీయ ఆరోపణలు మాత్రమే. ప్రభుత్వం ఈ విమర్శలను అంగీకరించడం లేదు.

ఈ వివాదం కాంగ్రెస్‌తోనే ఆగిపోలేదు. ఝార్ఖండ్ ముక్తి మోర్చా కూడా… ఎక్స్ లో తన అభిప్రాయాన్ని స్పష్టంగా చెప్పింది. కాంగ్రెస్‌కు అనుకూలంగా భావించే రాజకీయ విశ్లేషకుడు తెహ్సీన్ పూనావాలా కూడా… ఎథనాల్ మిశ్రమ విధానానికి వ్యతిరేకంగా ప్రచారం ప్రారంభించారు. తన ఎక్స్ పోస్టులో దీనిని ఎథనాల్ స్కామ్ గా పేర్కొంటూ… జంతర్ మంతర్ వద్ద నిరసన చేపడతానని ప్రకటించారు. వాహనదారులకు… ఇథనాల్ కలిపిన పెట్రోల్ కావాలా, వద్దా అనే నిర్ణయం తీసుకునే స్వేచ్ఛ ఉండాలని డిమాండ్ చేశారు.

అయితే… సామాన్య ప్రజలు ఎవరిని నమ్మాలి? ప్రభుత్వానినా? ప్రతిపక్షానినా? లేక… సామాజిక మాధ్యమాలలో వైరల్ అవుతున్న వీడియోలనా..? బహుశా… ఈ ప్రశ్నకు సమాధానం… రాజకీయాల్లో కాదు, ప్రతి వాహనదారుడి వ్యక్తిగత అనుభవంలో ఉండొచ్చు. ఎందుకంటే..? రాజకీయాలు ఒకవైపు, మీ వాహనం మరోవైపు. మీ దగ్గర ఉన్న మోటార్‌సైకిల్ అయినా… హ్యాచ్‌బ్యాక్ అయినా… సెడాన్ అయినా… ఎస్‌యూవీ అయినా… లేదా… లగ్జరీ కారు అయినా… ప్రశ్నలు మాత్రం అందరికీ ఒకటే.

మీ వాహనం ఈ20కు అనుకూలమా? కాకపోతే… మీరు ఏ ఇంధనం ఉపయోగించాలి? మీ వాహనం మైలేజ్ తగ్గితే… దానికి నిజంగానే ఎథనాల్ కారణమా? లేక… ఇంకా ఇతర కారణాలున్నాయా? ఒకవేళ… ఇంజన్‌లో సమస్య వస్తే… దానికి ఈ20నే కారణమని ఎవరు నిర్ణయిస్తారు? తయారీ సంస్థనా? సేవా కేంద్రమా,భీమా సంస్థా? లేక… మెకానిక్‌లా? ఈ ప్రశ్నలకే… ఈ రోజు కోట్లాది భారతీయ వాహనదారులు సమాధానం వెతుకుతున్నారు.

అయితే, ఒక విషయం మాత్రం స్పష్టంగా చెప్పొచ్చు. భారతదేశ ఇంధన విధానంలో… దశాబ్దాల తర్వాత వచ్చిన అత్యంత పెద్ద మార్పుల్లో… ఇథనాల్ మిశ్రమ విధానం ఒకటని ప్రభుత్వం చెబుతోంది. దీనివల్ల చమురు దిగుమతులు తగ్గుతాయని… రైతులకు ప్రయోజనం కలుగుతుందని… దేశ ఇంధన భద్రత పెరుగుతుందని… కాలుష్యం తగ్గుతుందని బలంగా వాదిస్తోంది. విమర్శకులు మాత్రం… వినియోగదారులకు మరింత పారదర్శకత కావాలని… వాహనాల అనుకూలతపై… దీర్ఘకాలిక ప్రభావాలపై… మరింత స్పష్టమైన హామీలు అవసరమని అంటున్నారు. ఈ చర్చ ఇప్పుడే ముగిసేలా కనిపించడం లేదు. న్యాయపరమైన పోరాటం కొనసాగుతుంది, రాజకీయ వాదనలు కొనసాగుతాయి. అలాగే… దేశంలోని కోట్లాది వాహనదారుల మధ్య ఈ చర్చ కూడా కొనసాగుతూనే ఉంటుంది.