ఢిల్లీలో CJP చేపట్టిన నిరసన పూర్తిగా విఫలమైందని బీజేపీ నేత సాంబిత్ పాత్ర అన్నారు. నిరసన పేరుతో ఢిల్లీని అడ్డుకోవాలని చూశారని, కానీ వారి ప్రయత్నాలు ఫలించలేదని చెప్పారు. రాహుల్ గాంధీ విదేశీ శక్తులతో కలిసి దేశంలో గొడవలు సృష్టించేందుకు ప్రయత్నిస్తున్నారని ఆరోపించారు. శనివారం జంతర్ మంతర్ వద్ద జరిగిన నిరసనకు వచ్చిన వందలాది మంది యువకులతో పాటు పలువురు రాజకీయ నాయకులను పోలీసులు అదుపులోకి తీసుకున్నారు. ఈ ఘటనపై సాంబిత్ పాత్ర స్పందిస్తూ.. ఇది ప్రజాస్వామ్యానికి, గొడవలు సృష్టించే వారికి మధ్య జరిగిన పోరాటమని, ఇందులో ప్రజాస్వామ్యమే గెలిచిందని అన్నారు.
Also Read : నెట్‌ఫ్లిక్స్‌లో భారీగా ఉద్యోగాల కోత.. 850 మంది ఔట్!
బీజేపీ ప్రధాన కార్యాలయంలో ఏర్పాటు చేసిన మీడియా సమావేశంలో ఆయన మాట్లాడారు. రాష్ట్రపతి ద్రౌపది ముర్ముతో జరిగిన సమావేశంలో ఓట్ల చోరీ ఆరోపణలపై ఆమె ఏమీ చెప్పలేదని రాహుల్ గాంధీ శుక్రవారం చేసిన వ్యాఖ్యలను సాంబిత్ పాత్ర తప్పుబట్టారు. ఈ సందర్భంగా రాహుల్ గాంధీని పనికిరాని నాయకుడు అంటూ విమర్శించారు. జంతర్ మంతర్ వద్ద జరుగుతున్న నిరసనను, టీవీల్లో, సోషల్ మీడియాలో కనిపిస్తున్న దృశ్యాలను చూసి దేశం మొత్తం అలాగే ఉందని అనుకోవద్దని సాంబిత్ పాత్ర అన్నారు. భారత్ ప్రశాంతంగా ఉందని, మంచి పాలనతో ముందుకు వెళ్తోందని చెప్పారు.
నిరసన పేరుతో ఢిల్లీని, దేశాన్ని ఇబ్బందుల్లోకి నెట్టాలని చూశారని ఆయన ఆరోపించారు. గొడవలు పెట్టడం, ఒకరిపై ఒకరు దాడులు చేసుకోవడం, రోడ్లపై కొట్లాటలకు దిగడం వంటి ఘటనలు జరిగాయని అన్నారు. చివరికి నిరసన విఫలమైందని, ఢిల్లీలో పరిస్థితి అదుపులోనే ఉందని చెప్పారు. CJP నిరసన నేపథ్యంలో శనివారం ఢిల్లీలోని మధ్య ప్రాంతంలో పోలీసులు భారీగా మోహరించారు. ఎలాంటి గొడవలు జరగకుండా వేలాది మంది పోలీసులను రంగంలోకి దించారు.
ప్రధాన ఎన్నికల కమిషనర్ జ్ఞానేశ్ కుమార్‌కు వ్యతిరేకంగా CJP ఈ నిరసన చేపట్టింది. ఓటర్ల జాబితాలో పేర్లను మార్చేందుకు ప్రత్యేక సవరణ పేరుతో ప్రయత్నాలు జరుగుతున్నాయని, ఓటరుగా పేరు నమోదు చేసుకునేందుకు ఉపయోగించే ఫారం-6లో మార్పులు చేసేటప్పుడు మిగతా ఇద్దరు ఎన్నికల కమిషనర్లను పక్కన పెట్టారని జ్ఞానేశ్ కుమార్‌పై ఆరోపణలు ఉన్నాయి. ఈ ఆరోపణలకు నిరసనగా CJP ఆందోళనకు పిలుపునిచ్చింది.
Also Read : ఫ్లై దుబాయ్‌ ఘటనలో బిగ్ ట్విస్ట్.. NIA కేసు నమోదు
