Instagram Love : హర్యానాలోని సోనిపట్‌లో ఓ మహిళ తన భర్తపై పోలీసులకు ఫిర్యాదు చేసింది. ఇన్‌స్టాగ్రామ్‌లో పరిచయమైన వ్యక్తి తన అసలు మతం, గతంలో జరిగిన పెళ్లి విషయం దాచిపెట్టి తనను హిందూ సంప్రదాయం ప్రకారం పెళ్లి చేసుకున్నాడని ఆమె ఆరోపించింది. పెళ్లి తర్వాత తనను వేధించడంతో పాటు మతం మార్చుకోవాలని ఒత్తిడి చేశారని కూడా ఆమె ఫిర్యాదులో పేర్కొంది. తనకు ఇన్‌స్టాగ్రామ్‌ ద్వారా ఆ వ్యక్తితో పరిచయం ఏర్పడిందని మహిళ తెలిపింది. మొదట అతను తన పేరు జానీ అని చెప్పాడని, తాను హిందువునని పరిచయం చేసుకున్నాడని ఆమె చెప్పింది. ఇద్దరి మధ్య పరిచయం కాస్త ప్రేమగా మారడంతో హిందూ సంప్రదాయం ప్రకారం పెళ్లి చేసుకున్నామని, ఆ తర్వాత భార్యాభర్తలుగా కలిసి ఉన్నామని తెలిపింది.
Also Read : దృశ్యం 3 సినిమా చూసి హత్య.. ఒక్క ఫోన్‌కాల్‌తో మొత్తం ప్లాన్‌ రివర్స్‌!
అయితే పెళ్లయిన ఆరు నెలల తర్వాత భర్త గురించి అసలు విషయం తనకు తెలిసిందని మహిళ ఆరోపించింది. ఒకరోజు అతని బ్యాగ్‌లో ఆధార్‌ కార్డు కనిపించిందని, అందులో పేరు జావేద్‌ ఖాన్‌ అని ఉందని చెప్పింది. దీంతో తాను జానీగా పరిచయమైన వ్యక్తి ముస్లిం అని, అంతేకాకుండా అతనికి అప్పటికే పెళ్లి అయిందని తెలుసుకున్నానని ఆమె తెలిపింది. జావేద్‌ ఖాన్‌ సోనిపట్‌కు చెందిన వ్యక్తేనని, దాదాపు 12 ఏళ్ల క్రితమే అతనికి పెళ్లి అయిందని మహిళ ఆరోపించింది. మొదటి భార్యకు ముగ్గురు పిల్లలు కూడా ఉన్నారని ఆమె చెప్పింది. ఈ విషయం బయటపడిన తర్వాత ఇద్దరి మధ్య గొడవలు మొదలయ్యాయని మహిళ తెలిపింది. తాము ఉంటున్న చోటుకు జావేద్‌ మొదటి భార్య వచ్చిందని, తనతో గొడవపడిన తర్వాత జావేద్‌ను తన వెంట తీసుకెళ్లిందని ఆమె ఆరోపించింది.
కొన్ని రోజుల తర్వాత జావేద్‌ తిరిగి వచ్చాడని మహిళ చెప్పింది. తనతో కలిసి ఉండొద్దని కుటుంబ సభ్యులు ఒత్తిడి చేస్తున్నారని అతను చెప్పినట్లు ఆమె తెలిపింది. అయినప్పటికీ ఇద్దరూ కలిసి ఉండటం కొనసాగించారని, ఆ తర్వాత ఉత్తరప్రదేశ్‌కు వెళ్లారని చెప్పింది. యూపీలోని బుధానాలో ఉన్న సమయంలో తమకు ఒక బిడ్డ పుట్టిందని మహిళ తెలిపింది. ఆ తర్వాత తిరిగి సోనిపట్‌కు వచ్చి అక్కడే కలిసి ఉంటున్నామని చెప్పింది. అయితే గత వారం రోజులుగా తన భర్త, అతని కుటుంబ సభ్యులు కనిపించడం లేదని మహిళ ఆరోపించింది. దీంతో ఆమె స్థానిక పోలీసులను ఆశ్రయించి భర్త, అతని కుటుంబంపై చర్యలు తీసుకోవాలని ఫిర్యాదు చేసింది.
తనను, తన పిల్లలను మతం మార్చుకోవాలని ఒత్తిడి చేస్తున్నారని కూడా ఆమె ఆరోపించింది. భర్త, అతని కుటుంబ సభ్యులు తన భర్త అసలు గుర్తింపును దాచారని, తనపై దాడి చేశారని, వేధించారని, బెదిరించారని ఫిర్యాదులో పేర్కొంది. హిందూ రక్షా సేనకు చెందిన ఓ ప్రతినిధి కూడా ఈ విషయాన్ని పోలీసుల దృష్టికి తీసుకెళ్లి మహిళకు మద్దతుగా నిలిచారు. మహిళ, ఆ సంస్థ ప్రతినిధి ఈ ఆరోపణల గురించి మాట్లాడారు. మహిళ ఇచ్చిన ఫిర్యాదు తమకు అందిందని పోలీసులు తెలిపారు. ఈ ఘటనపై దర్యాప్తు చేస్తున్నామని చెప్పారు. ఈ కేసుకు సంబంధించి ఇరువర్గాలను పోలీస్‌ స్టేషన్‌కు పిలిపించినట్లు వెల్లడించారు.
Also Read : అమెరికాలో రోడ్డు ప్రమాదం.. తెలంగాణ వాసి మృతి
