Suicide : కుటుంబంలో ప్రశాంతతను నింపాల్సిన తల్లిదండ్రుల నిత్య గొడవలు ఒక నిండు ప్రాణాన్ని బలితీసుకున్నాయి. కళ్లెదుటే రోజువారీగా సాగుతున్న తగాదాలను భరించలేక, వారి వైఖరి మారకపోవడంతో తీవ్ర ఆవేదనకు గురైన ఒక 15 ఏళ్ల బాలుడు ప్రాణాలు తీసుకున్న దారుణ ఘటన హైదరాబాద్లోని రాయదుర్గం పోలీస్ స్టేషన్ పరిధిలో వెలుగుచూసింది. ఈ విషాదకర ఘటన స్థానికంగా తీవ్ర దిగ్భ్రాంతిని, శోకసంద్రాన్ని నింపింది.
పోలీసులు తెలిపిన వివరాల ప్రకారం.. గచ్చిబౌలి సమీపంలోని రాజీవ్నగర్ వడ్డెర బస్తీలో ఎల్లయ్య దంపతులు నివాసముంటున్నారు. భవన నిర్మాణ రంగంలో రోజువారీ కూలీలుగా పనిచేస్తూ జీవనం సాగిస్తున్న ఈ దంపతులకు ఒక కుమార్తెతో పాటు మోహన్ (15) అనే కుమారుడు ఉన్నాడు. మోహన్ స్థానిక గచ్చిబౌలి ప్రభుత్వ పాఠశాలలో 9వ తరగతి చదువుతున్నాడు. అయితే, ఎల్లయ్య దంపతుల మధ్య గత కొంతకాలంగా కుటుంబ సమస్యల కారణంతో తరచూ తీవ్ర స్థాయిలో వివాదాలు జరుగుతుండేవి.
ఈ క్రమంలో శనివారం (జులై 11) రాత్రి వేళ ఎల్లయ్య మద్యం సేవించి ఇంటికి వచ్చాడు. మద్యం మత్తులో ఉన్న ఆయన మళ్లీ భార్యతో తీవ్ర వాగ్వాదానికి దిగాడు. దంపతుల మధ్య గొడవ పెద్దదిగా మారడంతో, వారిని వారించి గొడవను సర్దుమొగడం చేసేందుకు కుమారుడు మోహన్ మధ్యలోకి వచ్చాడు. రోజూ ఇలా గొడవపడటం సరికాదని, ఎందుకు ప్రతిరోజూ దెబ్బలాడుకుంటున్నారని తండ్రిని ప్రశ్నించేందుకు ప్రయత్నించాడు.
అయితే, మద్యం మత్తులో ఉన్న తండ్రి ఎల్లయ్య కుమారుడి మాటలను పట్టించుకోకపోగా, ఆగ్రహంతో మోహన్ను అసభ్యకరమైన పదజాలంతో తీవ్రంగా దూషించాడు. కంటికి రెప్పలా చూసుకోవాల్సిన తండ్రి ప్రవర్తన, ఇంట్లో వాతావరణం ఏమాత్రం మారకపోవడంతో మోహన్ తీవ్ర తీవ్ర మనస్తాపానికి గురయ్యాడు. “ఇక మీరు ఎప్పటికీ మారరా?” అంటూ తీవ్ర ఆవేదనతో ఆక్రోశం వ్యక్తం చేస్తూ, ఇంటి నుంచి సమీపంలోనే ఉన్న తన అమ్మమ్మ ఇంటికి వెళ్లిపోయాడు.
కొంత సమయం గడిచిన తర్వాత కుమారుడిని ఇంటికి పిలుచుకుని వద్దామని తల్లి అమ్మమ్మ ఇంటికి వెళ్లి చూసింది. అక్కడ గదిలోకి వెళ్లి చూడగా, మోహన్ గదిలోని ఐరన్ రాడ్కు చీరతో ఉరివేసుకుని వేలాడుతూ కనిపించాడు. అది చూసి దిగ్భ్రాంతి చెందిన తల్లి గట్టిగా కేకలు వేయడంతో కుటుంబసభ్యులు, పొరుగువారు వెంటనే అక్కడికి చేరుకుని బాలుడిని కిందకు దించారు. అత్యవసర చికిత్స నిమిత్తం వెంటనే స్థానిక ప్రైవేట్ ఆసుపత్రికి తరలించగా, పరీక్షించిన వైద్యులు బాలుడు అప్పటికే మృతి చెందినట్లు ధృవీకరించారు.
సమాచారం అందుకున్న రాయదుర్గం పోలీసులు వెంటనే ఆసుపత్రికి మరియు ఘటనా స్థలానికి చేరుకుని ప్రాథమిక వివరాలు సేకరించారు. మృతదేహాన్ని పంచనామా అనంతరం పోస్టుమార్టం నిమిత్తం ఉస్మానియా జనరల్ ఆస్పత్రికి తరలించారు. ఈ విషాద ఘటనపై కేసు నమోదు చేసుకున్న పోలీసులు, అన్ని కోణాల్లోనూ లోతుగా విచారణ జరుపుతున్నారు. పసివాడి ప్రాణం బలవడానికి కారణమైన ఈ సంఘటన స్థానిక బస్తీవాసులను తీవ్రంగా కలిచివేసింది.
