NEET-UG : నీట్-యూజీ (NEET-UG) రీ-టెస్ట్కు సమయం దగ్గరపడుతున్న కొద్దీ విద్యార్థుల్లో గందరగోళాన్ని తగ్గించేందుకు, పరీక్షను అత్యంత పకడ్బందీగా నిర్వహించేందుకు నేషనల్ టెస్టింగ్ ఏజెన్సీ (NTA) అన్ని ఏర్పాట్లు పూర్తి చేసింది. షెడ్యూల్ ప్రకారం జూన్ 21న రీటెస్టు జరగనుండగా, పరీక్ష వాయిదా పడుతుందంటూ సోషల్ మీడియా వేదికగా వస్తున్న వదంతులను, దుష్ప్రచారాన్ని నమ్మవద్దని ఎన్టీఏ ‘ఎక్స్’ (ట్విట్టర్) ద్వారా స్పష్టం చేసింది. ఇలాంటి సమయంలో విద్యార్థులు ప్రశాంతంగా ఉంటూ, తమ ప్రిపరేషన్పై మాత్రమే దృష్టి పెట్టాలని సూచించింది. కేవలం ఎన్టీఏ విడుదల చేసే అధికారిక సమాచారాన్ని మాత్రమే విశ్వసించాలని కోరింది. మరోవైపు, ఈ పరీక్ష నిర్వహణపై కేంద్ర విద్యాశాఖ మంత్రి ధర్మేంద్ర ప్రధాన్ ఉన్నతస్థాయి సమీక్ష నిర్వహించి ఏర్పాట్లను పర్యవేక్షించారు.
మే 3న జరిగిన పరీక్షలో పేపర్ లీక్ ఆరోపణలు రావడంతో, విద్యార్థుల ప్రయోజనాలను కాపాడేందుకు ఆ పరీక్షను రద్దు చేయాల్సి వచ్చిందని ఎన్టీఏ తెలిపింది. ఈ మొత్తం వ్యవహారం నుంచి పాఠాలు నేర్చుకున్నామని, పరీక్షా ప్రక్రియను మరింత బలోపేతం చేస్తూ ఈసారి పటిష్ఠమైన, బహుళ అంచెల భద్రతా చర్యలను తీసుకుంటున్నట్లు వివరించింది. కేంద్ర మంత్రిత్వ శాఖలు, రాష్ట్ర ప్రభుత్వాలు, దేశంలోని ప్రముఖ భద్రతా సంస్థల సమన్వయంతో కట్టుదిట్టమైన ఏర్పాట్లు చేశామని, ఎవరైనా అక్రమాలకు పాల్పడితే కఠిన చర్యలు తప్పవని హెచ్చరించింది. పరీక్షల ఒత్తిడి కారణంగా మానసికంగా ఇబ్బంది పడుతున్న విద్యార్థుల కోసం ‘మానస్’ (MANAS) మానసిక ఆరోగ్య హెల్ప్లైన్ నంబర్ను (14416) అందుబాటులో ఉంచామని, దీని ద్వారా నిపుణుల సాయం కోరవచ్చని సూచించింది.
పరీక్షకు కేవలం మూడు రోజులు మాత్రమే సమయం ఉన్నందున, విద్యార్థులు ఆందోళన చెందకుండా అత్యుత్తమ ప్రదర్శన ఇవ్వడంపైనే శ్రద్ధ పెట్టాలని ఎన్టీఏ పేర్కొంది. “మీరు ఇప్పటికే బాగా సిద్ధమయ్యారు, కాబట్టి ఇప్పుడు ప్రశాంతంగా ఉంటూ, తగినంత విశ్రాంతి తీసుకోండి” అని అభ్యర్థులకు ధైర్యం చెప్పింది. కేవలం విద్యార్థులే కాకుండా తల్లిదండ్రులు, అధ్యాపకులు కూడా ఈ సమయంలో కీలక పాత్ర పోషించాలని, ధ్రువీకరించని ఏ సమాచారాన్ని పిల్లలతో పంచుకోవద్దని విజ్ఞప్తి చేసింది. విద్యార్థులు స్థిరమైన మనసుతో, ఎటువంటి నిశ్చింత లేకుండా పరీక్షా కేంద్రానికి వెళ్లేలా చూడాలని కోరింది. కాగా, మే 3నాటి నీట్ పరీక్ష రద్దుకు కారణమైన పేపర్ లీక్ ఆరోపణలపై ప్రస్తుతం సీబీఐ (CBI) దర్యాప్తు ముమ్మరంగా కొనసాగుతోంది.
