Yogi Adityanath : ఉత్తరప్రదేశ్‌ సీఎం యోగి ఆదిత్యనాథ్‌ సంచలన వ్యాఖ్యలు చేశారు. యుద్ధం వస్తే దేశం, ధర్మం కోసం సన్యాసులు కూడా ఆయుధాలు పట్టేందుకు సిద్ధంగా ఉండాలని అన్నారు. డబ్బు కోసం ధర్మాన్ని వదులుకోకూడదని చెప్పారు. వారణాసిలో భారత్‌ సేవాశ్రమ సంఘ్‌ కాశీ శాఖ 100 ఏళ్ల వేడుకల్లో ఆయన మాట్లాడారు.
భారత్‌ సేవాశ్రమ సంఘ్‌ ఎన్ని కష్టాలు ఎదురైనా తన సిద్ధాంతాలను వదులుకోలేదని యోగి అన్నారు. 1926లో స్వామి ప్రణవానంద మహారాజ్‌ ఈ సంస్థ కాశీ శాఖను ప్రారంభించారని గుర్తు చేశారు. ఆ సమయంలో భారత్‌ బ్రిటిష్‌ పాలనలో ఉండేదని చెప్పారు. స్వామి ప్రణవానంద దేశమంతా తిరుగుతూ ప్రజల్లో స్వాతంత్య్ర స్ఫూర్తిని నింపారని అన్నారు. హిందువుల్లో చైతన్యం తీసుకురావడానికి కూడా కృషి చేశారని చెప్పారు. ప్రస్తుతం ఈ సంస్థ భారత్‌తో పాటు ఇతర దేశాల్లోనూ సేవా కార్యక్రమాలు చేస్తోందని తెలిపారు.
Also Read : జ్ఞానేశ్ కుమార్‌ను కాపాడేందుకే ఇదంతా చేస్తున్నావా.. మోదీపై అభిజీత్ దీప్కే సంచలన ఆరోపణలు
దేశానికి కష్టం వచ్చినప్పుడు మన సంస్కృతి, ధర్మం, చరిత్రకు కూడా ముప్పు వస్తుందని యోగి అన్నారు. కాశీ విశ్వనాథ ఆలయం, అయోధ్య రామజన్మభూమి, మథురలోని శ్రీకృష్ణుడి జన్మస్థలాన్ని ప్రస్తావించారు. విదేశీ దండయాత్రదారులు విజయం సాధించకపోయి ఉంటే కాశీ విశ్వనాథ ఆలయాన్ని ధ్వంసం చేసే పరిస్థితి వచ్చేదా? అని ప్రశ్నించారు. అయోధ్యలో రామజన్మభూమి దగ్గర, మథురలో శ్రీకృష్ణుడి జన్మస్థలంలో బానిసత్వానికి గుర్తుగా తాను పేర్కొన్న నిర్మాణాలు 500 ఏళ్లపాటు ఉండేవా? అని అన్నారు.
పూజ అంటే కేవలం దీపాలు వెలిగించడం, అగరబత్తులు పెట్టడం మాత్రమే కాదని యోగి చెప్పారు. భగవతి అమ్మవారిని ఆయుధాలతోనూ పూజించే సంప్రదాయం ఉందన్నారు. ఆ ఆయుధాలు అలంకారానికి మాత్రమే కాదని, దేశాన్ని కాపాడాల్సిన అవసరం వచ్చినప్పుడు వాటిని ఉపయోగించేందుకు కూడా సిద్ధంగా ఉండాలని వ్యాఖ్యానించారు.
పశ్చిమ బెంగాల్‌లోని తృణమూల్‌ కాంగ్రెస్‌ ప్రభుత్వంపైనా యోగి విమర్శలు చేశారు. భారత్‌ సేవాశ్రమ సంఘ్‌ సన్యాసుల పట్ల ఆ ప్రభుత్వం బెదిరింపులకు దిగినట్లు వ్యవహరించిందని ఆరోపించారు. రావణుడు, కంసుడిలా బెదిరించడం రాజకీయ పతనానికి సంకేతమని అన్నారు. ఎన్నికల ప్రచార సభల్లో సంఘ్‌ సన్యాసులు తనను కలిసేవారని, మొదట వేదికపైకి రావడానికి వెనుకాడినా తాను పిలిచిన తర్వాత వచ్చేవారని చెప్పారు.
భారత్‌ సేవాశ్రమ సంఘ్‌ చేస్తున్న సేవా కార్యక్రమాలను యోగి అభినందించారు. పేద బాలికలకు కుట్టు మిషన్లు ఇవ్వడం మంచి కార్యక్రమమని అన్నారు. సంస్థ 100 ఏళ్ల వేడుకల్లో ఇలాంటి సేవా కార్యక్రమాలను కొనసాగించాలని, ప్రముఖులను కూడా ఆహ్వానించాలని సూచించారు.
Also Read : రాహుల్ రెడీగా ఉండు.. 2029లో భారీ ఓటమిని చూపిస్తా : అమిత్ షా సవాల్
